Jakop tə Ɓatliya ka Cha Ɓə na Isuwa
32
1 Jakop tə biyama na ma'i, ngə cha ɓə na chama Hyel i'i. 2 Nda Jakop tə la'a nda, ngə cha na, <<Nənna, mbwar ngya Hyel na!>> Ngə cha fəndzə nyi tləm nə mbwa nda Mahanayim.3 Kəl Jakop tə sə changhabal nyi i'i nda biya ma nyi ya da zamə nyi Isuwa nda na ngya vu Seyir tə mətla hə'i Edom. 4 Ngə cha tsau nda bar, <<Janə sənda hyo nar nyi nə tlakə ɗa Isuwa. <Mava nghə Jakop tə na, ya ki ngya na Labal ba'a tə pəchi na. 5 Janə dangal tla and kwara i'i, kətəng ana ku i'i, mavi'i ana kwatəra i'i. Sakana janə ya sətə mafakə nə tlakə ɗa, ndara ba ya uya kwambiyakur tə lya cha.> >>
6 Nda changhabal inda tə ma'i ga ɓəl shili da Jakop, ngə nda na, <<Yi tə ea da zamə nghə Isuwa, sakana cho shili da ka ana nji 400.>>
7 Kəl ngə ləvər tə səya Jakop 'ual'uləu ngə cha təkbiya nji nyi, sərshishi ana njir ɓəla sərshishi ana dləgwam dzuku mətləu. 8 Ku jigadəma nyi, <<Ma Isuwa tə shili pa dzuku zhang, dzuku zhang kwa mbəɗa.>>
9 Kəl ngə Jakop tə pətlənya, <<Yawa Hyel nə ada ɗa Ibrahim, Hyel nə ada ɗa Ishaku, YAWA TLAKƏU, nakə nda tə nar ɗa, <Ɓəl yatə hə'i ngha ana hə'i jul ngha, hinda ngya ngha kwa yi ɗa mənakəu.> 10 A ya ki na mənakur ana tsa'atsa'akur nda ka char nyi nə mava nghə wa. Ya fəliya fa'a Jodan kəl tamba ɗa ku cha ya, ya sakana, janə ya ɗatə dzuku mətləu. 11 Dləuya ɗa ku cha zamə ɗa Isuwa, ya kwa ləvər cha da shili na ɗa dla'a cha shili kuɗə nda ngulisha'a ana aman nda. 12 Kəl nda ja, ka na, <Vəlvəl ya kwa mər tə nyandəla kə danghə wi məshishiwa nya fa'a nda pa nji kwa nau jigabiya.> >>
13 Cha hənda hanyi tangnda, ngə cha ɗəmətsə ga'a ga cha yi na nyi nə zamə nyi Isuwa, 14 mahi'i kua 200, bura mətləkumnyi, mahi'i kətəng 200 ana gam 20, 15 mahi'i dləgwam 30 ana shiɗəɗənyi, tla 40, ana gyal tla 10, mahi'i kwara 20, ana bidal 10. 16 Ngə cha tsau nda ku cha mavi'i nyi, kala ɓəla na dzuku kənda i, ngə cha nar nyi nə mavi'i inda, <<Ma'i biyama ɗa ana hya fəu babal ku pama sərshishi inga.>>
17 Ngə Jakop tə tsau nyi bar nə gavərma ma'i, <<Ma zamə ɗa Isuwa tə ɓə ka hi, macha jawa, <Na hi ka wa ina, abar na hya, nə wa nə dəhə sərshishi inə man hi ina?> 18 Kəl hyo nar nyi, <Nə mava ngə Jakop ina. Ga'a inə cha sətə nyi nə tlakə ɗa Isuwa, aka angə mava nghə Jakop kwa shili hin ea.> >>
19 Əngə cha tsau nyi bar nə mətləkunyi nda, makərkunyi ana dəhə nji'inda kwa nəu sərshishi inda. <<Dəhə hi sə zhang nyo nar nyi nə Isuwa ma hya ɓə nacha. 20 Aka ənga hyo na, <Aka ənga, mava nghə Jakop kwa shili hin ea.> >> Aka Jakop kwa jigadəma, <<Yo mərtə ɗufwa twasə təwa ga'a inda biyama ɗa inga, təvi eo ɓə nacha ndara tsə'u cha dləutsə ɗa.>> 21 Əngə ga'a Jakop tə ghəya təra biyama nyi, Kəl ja, kərnyi cha hanyi tanyi ku kwapatəu nyi.
Jakop tə Ɓə Gadla ana Chama Hyel
22 Aku vu'i nda tanyi Jakop tə hətə mahi'i nyi mətləu, ana kwatəra nyi mətləu, ana nguli nyi kwabəzhang ngə cha ndəbiya biya tə ya dəl Jabok. 23 Ahir cha lənda nda, ngə cha lənda dəhə sənda nənyi biya təya dəl nda. 24 Sakan ja, Jakop tə həyadzə zhang tanyi, kəl vanya ndə tə ɓə gadla na Jakop həmhanyi. 25 Manda ndə nda tə la'a a da cha kwa nau ndəɗə dunama nyi wa, kəl ngə cha dəlabiya mədlə ɗihir ea Jakop tsa cha ɗa biyama na ɓə gadla na cha. 26 Kəl ngə ndə nda tə na, <<Ngya ɗa ya təra, aka vu'i wurti.>>
Kəl Jakop tə wum ga na, <<A yo ngya nghə ka təra wa, kəl ka səkə ɗa papa'akur.>>
27 Ngə ndə nda tə jau nyi,
<<Wa tləm ngha?>> Jacob tə wum ga na, <<Tləm ɗa Jakop.>>
28 Kəl ngə ndə nda tə na, <<A tsə'u njo nga tləm nghə Jakop wa, kəl nda Isra'ila, aka ka ɓə gadla na Hyel ya a kura tə ka.>>
29 Ngə Jakop tə na, <<Matəkuɗi dəkar ɗa tləm ngha.>> Ngə ndə tə ɓəlakə nyi, <<Kami ko jau tləm ɗa?>> Kəl ngə cha səkən papa'akur tangnda.
30 Aka ənga Jakop tə nga mbwa nda Peniyel, ngə cha na, <<Aka ya la'a Hyel li na li, ya dəhə ka ənga a da ya tə wa.>>