Jakop tə Hwi tanyi tsa Laban
31
1 Jakop tə ngatə nguli shili Laban kwa na, <<Jakop fa'aya tə sərshishi adan mən, təwa ənga ngə cha ɗa ka ndər gəna gagaɗa.>> 2 Ya Jakop la'a tə ənda tsə'u Laban da fatəfatə nə nyi wi nda parakə wa.3 Ngə Tlakə tə nar nyi nə Jakop, <<Ɓəl kyatə hə'i ada ngha ana njikə hi, ya yo ma'i tsa'a na ka.>>
4 Aka ənga, Jakop tə sətə nyi kurakə nə Rachal ana Liya nda zəbiya həya nyi tə mbwa nda sərshishi nyi ti. 5 Ngə cha nar nda, <<Ya la'a tsə'u adan nə hi da fatəfatə na'a wi nda parakə wa, kəl ja Hyel nə ada ɗa tsa'a na ya. 6 A zəndə tə hi ənda ya mər tlər nə adan nə hi ana dəhə dunama ɗa, 7 dəhə ka ənga adan hi ɗiya ɗa tə təwa həya wazəba ɗa zhaka kuma. Aka ənga, Hyel da ngya nyi cha fəndzə ɗa tyakəm wa. 8 Ma cha na, <Inda tyautyau kwa ɗa ka wazəba ngha,> kəl dəhə sərshishi inda kwa yah nguli ngulinyi tyautyau. Ma cha na tsəu, <Inda kyakyarəu ngə wazəba ngha,> kəl dəhə sərshishi inda kwa yah nguli ngulinyi kyakyarəu. 9 Təwa ənga Hyel tə fa'aya sərshishi adan hi ga na'a.
10 <<Ku bəjir hə huɗə sərshishi, vanya pəchi ku shi'uni, ya har hudəma ya, ngə ya la'a bura i'i kwa səli sərshishi inda tyautyau ndara ɗyatləɗyatləu. 11 Chama Hyel tə nar ɗa ku shi'uni, <Jakop,> ngə ya wuma, <Janə ya.> 12 Ngə cha na, <Ndzam ka la'a, dəhə bura i'i kwa səli sərshishi inda tyautyau ndara ɗyatləɗyatləu, aka a la'a tə ya dəhə sə inda Laban tə mər nə ngha. 13 Naya ngə Hyel nə Betel, tangnda nda ka dzəviya shimbal, ga səmnda ɗa fəla tə nda. Kusa hya'atə sakana ka ngyar hə'i na ka ɓəl ya tə təkəɗər hə'i ngha.> >>
14 Kəl ngə Rachal ana Liya tə ɓəlakə nyi, <<Tsəu sərfa'aki da tsa ea ku sər adan ea wa. 15 Ya janə ma cho la'a ea wi nji shilishili. A da kəl ɗəlnda ea tanyi cha ɗəlnda ea wa, səmnya tə cha ma'a sə nda nja kinda təkəra ea. 16 Vəlvəl dəhə gəna nda Hyel tə təkəbiya adan ea ni, nəkəea ngə ka nguli kəa. Aka ənga ka mər sə nda Hyel tə nar ngha.>>
17 Kəl ngə Jakop tə fa'atə nguli nyi ka mahi'i nyi gyatə ya dləgwam i'i, 18 ngə cha səu nda ku laku dəhə ka sərshishi nyi, ana dəhə sə inda cha tsəmtə vu Padan Aram, ka ga nda təra yada ada nyi Ishaku vu Kan'ana.
19 Manda Laban tə gwa ka sə shishi dza kətəng nyi, ngə Rachal tə həltə katə i'i nə ki ada nyi. 20 Jakop tsə'u tə shandə nyi kər nə Laban ndər Aram, aka a da cha nar nyi ənda cho hwi tanyi wa. 21 Kəl ngə cha hwi tanyi na dəhə sə nda cha ni, cha dləgəlbiya Dəl Yufəretis, ga dləutsə lakur ya tə hə'i nda kya tə dəgəl Giliyad.
Laban tə Nəu Hir Jakop
22 Ahir hanyi makər nja nar nyi nə Laban ənda Jakop hwi tanyi ti. 23 Kəl ngə Laban tə fa'atə njikə nda ga nəu hir Jakop hanyi mədəfa, cha dzəgwa həya nyi həyatə hə'i nda kya tə dəgəl Giliyad. 24 Kəl ngə Hyel tə shili da Laban ndər Aram ku shi'uni ga nar nyi, <<Ka gəla tsa ka da pə vanya ɓwanya nə Jakop, ndara mənakə nyi ndara ɗimi nyi.>>
25 Jakop wurta liya madləɓa nyi vu Giliyad mələm nda kyatə dəgəl təvi Laban həya nyi, ngə Laban ka nji kənda tə liya nəkənda na madləɓa tangnda tsəu. 26 Kəl ngə Laban tə nar nyi nə Jakop, <<Mi nə ka məra? Ka shandə ɗa kər ga fa'atə ku'i ɗa wi mavi'i inda nja ki səya tə mbwar dla'a. 27 Mya gwatə ka shandə ɗa kər ga ma'i tang tə ɗəwa? Mya gwa'atə aka nar ɗa tsa'aka yo ləbiya nghə na hirgyaɗi ana miya ana gədzəgədzi ana zəmbəl wa? 28 Aka i mada ya gaɓətə aji ɗa i'i ana ku'i ɗa ka ya nar nda ma'i ma kwalanghə wa. Kəkəngkur ngə ka məra. 29 Dunama da tsaya nə fəndzə nghə tyakəm, kəl ja, ku vu'i nə məna biya kwa na, Hyel nə ada nghə tə na, <Ka gəla tsa ka ɗa pə vanya ɓwanya nə Jakop, ndara mənakə nyi, ndara ɗimi nyi.> 30 Kəl ja sakana ka hwi aka ko mər hərgyaɗi ka ɓəl yo ki ada ngha. Kəl ja ya, mya gwa'atə ka həltə katə ɗa i'ea?>>
31 Ngə Jakop tə wumə nə Laban ga na, <<Ləvər nga səya ɗa, aka yo hari wi ko nda dləuya ku'i nghə tsa ya na tuku. 32 Kəl ja, maka uya ndə nda na katə nghə tsa cha, ngwa nja ngya nyi na pi wa. Ndzamar na kərnghə tə lya njikə mən, ku huɗa nji ɗa, ma ka uya dəhə sə nda nəngha, ka fa'ati.>> A Jakop da zəndə bəra Rachal ngə tə həltə katə inda wa.
33 Kəl Laban tə go madləɓa Jakop ana madləɓa Liya ana madləɓa nə kwatəra i'i, ya a cha uya wa. Ahir cha zəbiya ku madləɓa Liya, ngə cha go nə Rachal. 34 Kəl ja, nda Rachal tə fa'atə katə inda cha fəu gwa da kiɗa daɗari dləgwam ga gi ngya tanyi təkəri. Kəl nda Laban tə gwa'abiya madləɓa yi dəhəu, a cha uya wa.
35 Ngə Rachal tə nar nyi nə ada nyi, <<Ngwa huɗa kə da tla tlakə ɗa wa, a da yo nau hya'atə wa, aka a ku bəjir la'a heli nə ya.>> Ngə Laban tə gwa'a, kəl ja a da cha uya katə ki nyi inda wa.
36 Kəl ngə huɗa Jakop tə tla na Laban, ga jau nyi. <<Mi ngə bikə ɗa? Mi səpəla'a nda mər ya ko lugu ɗa? 37 Manə jan ka bakətə tə dəhə kar ɗa, mi sə nda uya kə nda nə njir ki ngha? Fiya tangnə a huɗə nji kəhi ana njikə ea, nda tlanda nəuma ku pama ma na ka.
38 <<Fa mətləkumnyi ngə ya mər tlər nə ngha. A kətəng nghə ndara ku nghə da taa səyandə huɗə wa, ya a da ya taa tlakər wulya təkəra mada gam zhang ku huɗa sərshishi nghə ga ɗinya wa. 39 A ya taa shili na sərshishi nda kum takə tə tsəya wa, ya hətə salkur sə nda tə sa na kərɗa. Ya ka gwa'a kəl ya kinda nghə kala sə nda nja həltə puchi ndara əvu'i. 40 Janə sə nda ɗa naya, əpuchi pəchi tə dəda ɗa, əvu'i gyang shishi'u tə gu dza ya, ya lya ya da ɗa michə na hanyi wa. 41 Əngə ngə ya ngya fa mətləkumnyi ku ki ngha. Ya mər tlər nə nghə fa kwabəfwaɗə aka ku'i nghə ingə mətlə inga, fa kwah tsə'u ka sərshishi ngha, ya ngə ka bəlatə wazəba ɗa zhaka kuma. 42 Macha a Hyel nə ada ɗa, Hyel nə Ibrahim ana səlir Ishaku tə nda ɗa tsa'a naya wa, ko nda səu ɗa ku laku twatwa'a chi. Kəl ja Hyel la'atə ɓwaɓwatə ɗa ana tlər cha ya, ya ngə cha tsə nghə əvu'i əna.>>
43 Ngə Laban tə wum nə Jakop, <<Mahi'i inga, ku'i ɗa inga, ngulisha ingə tsə'u nguli ɗa inga, ya sərshishi inga sərshishin ɗa inga, dəhə sə ingə ko la'a inga na'a inga. Kəl ja ya, mi yo nau mər ənya nə ku'i ɗa ingə ndara ngulisha inda nda yiyah? 44 Sakanə ja, naya na ka mi mbandəra cha ɗa ka tauli ku pama ma.>>
45 Kəl ngə Jakop hətə hangu ga fiya ka cha ɗa ka shimbal. 46 Ngə cha nar nyi nə njikə nda, <<Ɓutə ma hangu i'i.>> Ngə nda ɓutə hangu inda tuməu, ngə nda səm sərsum dzər hangu ɓuɓu inda. 47 Laban tə nga mbwa nda Jegar Sahaduta ngə Jakop tsə'u tə nga Galeed.
48 Ngə Laban tə na, <<Nəna ɓuɓur hangu tauli na ku pama ma ənya.>> Na cha ngə tə gwa'atə njo nga Galeed. 49 Kwa nga nji mbwa nda Mizpa tsəu, aka cha na, <<Kəl ga Tlakə ndzamə sə ku pama ma naka, mada sakanda ma təkəbiya dza. 50 Maka ki ɗa məndza'u na ku'i ɗa ndara ka ki ɓəla həbiya vanya mala təkəra ku'i ɗa, mada a vanya ndə da na ma wa, ɗənghatə Hyel ngə matauli nda ku pama ma naka.>>
51 Ngə Laban tə nar nyi nə Jakop, <<Janə hangu ɓuɓu ina ana janə shimbal da ya fiya ku pama ma naka. 52 Aka hangu ɓuɓu inə ngə tauli ana shimbal nə tsə'u tauli, ənda a ya kwa ndəɗiya hangu inə ka ya takasiya nghə ndara ka ndəɗiya hangu ina ana shimbal ka ga ka takasiya ɗa wa. 53 Ngwa Hyel Ibrahim ana Hyel Nahor, ana Hyel adan nda, ɗa ka ndər tla nəuma ku pama ma.>>
Kəl ngə Jakop tə səmfəla ku tləmər Hyel nda ada nyi Ishaku tə həsəli nə nyi. 54 Ngə Jakop tə handa təmachi tə dəgəl mələm nda ga nga njikə nda ka səm sərsuma. Ahir nda wur na səm sərsuma, ngə nda hanyi tangnda.
55 Tsəɗakə mbudla vanya zəkəu, Laban tə gaɓətə aji nyi inda ana ku'i nyi ngə səkə nda papa'akur. Ngə cha ngya nda ga ɓəl kyo ki nyi.