30
1 Manda Rachal tə la'a a da cho yah wa, ngə cha ngati shishir kwamə nyi. Ngə cha nar nyi nə Jakop <<Na'a Nngulisha'a, ma əngə wa yo tah!>>2 Kəl ngə Jakop tə mər huɗatla na Rachal ngə cha na, <<Naya Hyel nda tə mərtə nghə mala kəla yah ya?>>
3 Kəl ngə Rachal tə na, <<Janə Bilha, kwatəra ɗa. Piya nacha tsa'aka cha uya ɗa ngulisha'a, ga ya uya chuli təwa nyi.>>
4 Ngə cha hətə Bilha kwatəra nyi ga nə nyi nə Jakop ka cha ɗa ka mala nyi. Ngə Jakop tə piya nacha, 5 ngə cha hətə huɗə ga yiyah nyi zər. 6 Ngə Rachal tə na, <<Hyel pəliya ɗa tə, cha ngatə gədi ɗa ga na'a zər.>> Aka ənga ngə fəndzə tləm Dan.
7 Ngə Bilha kwatəra Rachal tə ɓəla hətə huɗə ga yiyah mətləkunya zər nə Jakop. 8 Ngə Rachal tə na, <<Aka 'ual'ual ya pah na kwamə ɗa, ya kura tə ya.>> Aka ənga cha fəndzə nyi tləm Naftali.
9 Manda a da Liya zhaka yah wa, ngə cha hətə Zilpa kwatəra nyi ga nə nyi nə Jakop ka cha ɗa ka mala nyi. 10 Zilpa kwatəra Liya tə yiyah nyi zərsal nə Jakop. 11 Ngə Liya tə na, <<Kara tləhi mənakəu!>> Ngə cha fəndzə nyi tləm Gad.
12 Zilpa kwatəra Liya tə yiyah mətləkunya zər. 13 Ngə Liya tə na, <<Aman chulkə hirgyaɗi nda ya na! Mahi'i kwa nga ɗa hirgyaɗi.>> Ngə cha fəndzə nyi tləm Asher.
14 Ku bəjir mər alkama, ngə Roben tə təra gwa takəu, ngə cha gwa uya wur mandəreka ngə cha shili nə nə ama nyi Liya. Ngə Rachal tə nar nyi nə Liya, <<Matəkuɗi gwa'arə ɗa wur mandərek ngə zər nghə tə shili nə nga.>>
15 Kəl ja, ngə Liya tə nar nyi, <<Sal ɗa ngə ka dləuya ngə da nji nghə wa ya? Sakan tsə'u ko gwa'a ka ɓəla dluəya mandərek nda zər ɗa tə shili nə səkəu?>>
Ngə Rachal tə na, <<Ənya sal ɗa kwa gwa piya na ka, macha ko gwa'arə ɗa wur mandərek ngə zər nghə tə shili nə nga.>>
16 Nda Jakop kwa shi kwa takəu akə nda, ngə Liya tə biya ka cha lali nyi. Ngə cha nar nyi, <<Kəl ka piya na ya, aka a kinda tə ya hanyi nə na Mandərek zər ɗa.>> Aka ənga cha gwa piya na Liya.
17 Kəl ngə Hyel tə ngatə gədi Liya, ngə cha hətə huɗə ga yiyah tufəkunya zər. 18 Kəl ngə Liya tə na, <<Hyella mər tə ɗa tə mənakəkur aka ya nə nyi kwatəra ɗa nə sal ɗa.>> Ngə cha fəndzə nyi tləm Issaka.
19 Liya tə hətə huɗə səkəu ga yiyah nyi kwakunya zərsal nə Jakop. 20 Kəl ngə Liya tə na, <<Hyel na'a tə ga'a nda na səli. Sakan ja, sal ɗa kwa la'a səli ɗa, aka ya yiyah nyi nguli shili kwah.>> Ngə cha fəndzə nyi tləm Zebulun.
21 Ahir nga, ngə cha yiyah kwamalakəu, ngə cha fəndzə nyi tləm Dina.
22 Ngə Hyel tə dənghatə na Rachal, ga ngatə gədi nyi, ga mbəɗiya mbəl yah nyi. 23 Ngə cha hətə huɗə ga yiyah zərsal, ngə cha na, <<Hyel hənda ɗa tə kuzhi.>> 24 Ngə cha fəndzə nyi tləm Yusufu, ga na, <<Ga Tlakəu tsakətə ɗa vanya zərsal.>>
Jakop ana Laban tə Təka
25 Ahir Rachal tə yiyah Yusufu, Jakop tə nar nyi nə Laban, <<Səu ɗa ku laku ka ga ya ɓəl yo ki ɗa ya tə hə'i ɗa. 26 Ka na'a mahi'i ɗa kə'i ngulisha'a ɗa, inda ya mər tlər nə nghə təkəri ya təra kə'i nda. Mana a zəndə tə kə 'ualkura tlər nda ya mər nə ngha.>>
27 Kəl ngə Laban tə nar nyi, <<Macha uya tə ya kwambiyakur tə lya ka, matikuɗi ngya. A ngabiya tə ya təwa hakəzə ənda Tlakə səkə ɗa tə papa'akur tə dəbar ngha. 28 Ka dəkar ɗa wazəba nghə ya kinda ngha.>>
29 Ngə Jakop tə nar nyi, <<Kwa zəndə kə ənda ya mər tlər nə nghə ana ənda sərshishi nghə tə yatəkər ku cha ya. 30 Aka təvi ya shili yiɗau tanyi sə inda tsa ka, ya janə nda yatə tə kər ɗanghəu, Tlakə tə səkə nghə papa'akur ku dəhə sə nda ya hau chi kwa. Kəl ja ya, saka manə yo mər sə ka na'awa kia?>>
31 Ngə Laban tə jau Jakop, <<Mi yo nə ngha?>>
Ngə Jakop tə na, <<Ngwa ka na'a madami wa, kəl nda macha ko nau mərtə ɗa sə zhang tanyi, yo biyama na ɓəla sərshishi ngha, yo tsamartə nda. 32 Əngwa ya go huɗa kətəng nghə inga, ya dzəɓəbiya kətəng inda na dza nda ɗyatlə ɗyatləu, ana kala zər gam nda na dza cha kyakyarəu, ana kua inda na dza nda ɗyatlə ɗyatləu. Nda ɗa ka wazəba ɗa. 33 Təwa ənga jirikur ɗa kwa ɗa ka matauli ɗa huɗə ngha, kala bəji nda ka ndzamar wazəba nda ka kinda ɗa. Kala kua nda pa'a da na ɗyatlə ɗyatlə ti, ndara zər gam nda pa'a kyakyar ku huɗa na'a, həlhəlnyi inda.>>
34 Ngə Laban tə na, <<A dləukər tə ya, cha ɗa wi ngə ka na nga.>> 35 Pəshinda tanyi ngə cha dzəɓəbiya bura inda na ɗyatlə ɗyatlə ti, ana dəhə mahi'i kua inda na pərtə ɗyatlə ɗyatlə ti, ana dəhə gam inda kyakyarəu, cha dzəɓəbiya ga nə nyi nə nguli shili nyi ka nda ɓəla nda. 36 Ngə Laban tə ɓatliya ga ma'i nə hanyi makərəu, cha ɗa naɗə tsa Jakop, kəl ngə Jakop tə biyama na ɓəla həyadzər sərshishi Laban inda.
37 Kəl ja, Jakop tə uya cha wur popla, almond ana pəlen miɗakəu, cha hiɗənda tsa'aka cho chabiya pərtəkura cha tə babal. 38 Ngə cha fiya cha wu nda cha hiɗənda nda ku lakur ɓiti, ga cha ɗa gang na bama sərshishi inda kwa maka səli tangnda, mando shili sa ɓiti. 39 Ndo sili mar cha wu nda. Kəl ndo yah ngulinguli nyi inda tyautyau, ndara ɗyatləɗyatləu, ndara kyakyarəu. 40 Ngə Jakop ɗəmbiya shiɗəɗə nyi tə mbwar zhang, ngə cha shandə bama həyadzə nyi ya kəra inda tyautyau nyi ana kyakyar nyi inda nə Laban. Ngə cha tsabiya bama inda nə nyi, a da cha daɓə na nə Laban wa. 41 Ma bəji nda mahi'i mahi'inyi inda na dunama kwa sili, Jakop kwa fiya cha wu inda man nda ga nda sili ləhə dzər cha wu inda, 42 kəl ja sərshishi inda pa'a na dunama, a cho fə man nda wa. Aka ənga, sərshishi inda pa'a na dunama kwa ɗa ka nə Laban, inda na dunama tsə'u kwa ɗa ka nə Jakop. 43 Təwa ənga Jakop tə ɗa ka ndər gəna gagaɗa, cha uya sərshishi ɗanghəu, kə'i kwatəra, kə'i mavi'i, kə'i dləgwam kə'i kwara.