Jakop tə Dzəva Padan Aram
29
1 Jakop tə biyama na ma'i ya tə hə'i nji inda təwa zədər pəchi. 2 Ngə cha la'a ka'ur ɓiti tə babal hinda, ana kətəng ɓəla makər tə piya ləhə nya ka'ur ɓiti nda, aka ku ka'ur ɓiti nda njo maka nə nda ɓiti. Hangu nda nja haɗiya nya ka'ur ɓiti nə nda dəgaləu. 3 Ma bəji nda ɓəla kəteng inda tə tsəmtə dza, njir ɓəla kwa dangəlnda hangu nda nya ka'ur ɓiti nda ka nda nə nyi ɓiti nə kətəng inda. Kəl ba nda ɓəlandə hangu nda ya nya ka'ur ɓiti nda səkəu.4 Ngə Jakop tə jau njir ɓəla inda, <<Ka zamɗa, hya'atə man hya?>>
Ngə nda wuma, <<Hya'atə vu Haran ea.>>
5 Kəl ngə cha nar nda, <<Kwa zəndə hi Laban ajinya Nahor ya?>>
Ngə nda na, <<Ah, kwa zəndə nyi ea.>>
6 Ngə Jakop tə jau nda <<Yiying tanyi ja?>>
Ngə nda wum nə nyi ga na, <<Ah, yiying tanyi kwalanghəu,>> <<Janə ma'a kwa nyi Rachal kwa shili na kətəng.>>
7 Kəl ngə Jakop tə nar nda, <<Ndzam ma, tsə'utanyi pəchi 'ualəu, bəjir tsəm sərshishi da taa ɗa gwadagə wa. Myo katə tsa hyo nə nyi ɓiti nə kətəng, ba'a ɓəla ɓəl na nda gwa ɓəla səka?>>
8 Ngə nda wum nə nyi ga na, <<A ea kwa nau wa, kəl dəhə biri kətəng kə ea tə tsəmtə dza ea kwa dangəlnda hangu nya ka'ur ɓiti nga. Eo dzəgwa nə nda ɓiti.>>
9 Tsəutanyi Jakop kwa ndər kə'i nda, kəl janə Rachal tə shili na biri kətəng ada nyi, aka Rachal ngə kwa ɓəla kətəng inda. 10 Manda Jakop tə la'a Rachal kwar Laban, səkə nyi ana biri kətəng Laban, ngə cha yi dangəlnda hangu nda nya ka'ur ɓiti nda ga nə nyi ɓiti nə biri kətəng səkə nyi. 11 Kəl ngə Jakop tə gaɓətə Rachal ngə cha tiwi na kurakə dzəgamdzəgaməu. 12 Ngə Jakop tə dəkar nyi nə Rachal ənda njikə nda cha, zər Robeka. Ngə Rachal tə hwi ga gwa dəkar nyi nə ada nyi.
13 Manda Laban tə ngatə labar təkəra Jakop, zər kwamə nyi, kəl cha kusa biya ka cha ɓə na cha. Cha gaɓətə nyi ga təra na cha go ki nyi, ngə Jakop tə dəkar nyi dəhə sə ina. 14 Kəl ngə Laban tə nar nyi, <<Mashi zhang ma na ka, ya njikə ea ka.>>
Jakop tə Hə Liya ana Rachal ka mala
Ahir Jakop tə mər tlər nə Laban nə hya zhang, 15 ngə Laban tə nar nyi, <<Aka kə njikə ea kəl ka mər tlər na'a ga'a ya? Par ɗa sə nda kwa ɗa ka wazəba ngha.>>
16 Ku'i Laban da tsa'a mətləu, tləmər nda dəgal nda Liya, kushi nyi nda tsə'u tləm nyi Rachal. 17 Liya lya cha shimtərəua, kəl nda Rachal nənyi dza cha mənakəu, ya gumaguma cha. 18 Jakop kwa i Rachal aka ənga cha na, <<Yo mər tlər nə fa məɗəfa aka ka na'a kwa nghə Rachal.>>
19 Kəl ngə Laban tə na, <<Bəliya ya ngya nghə ka hə nyi, tsa cha da hə vanya ndə paməu. Mi ngyata ma.>> 20 Kəl ngə Jakop tə mər tlər nə fa məɗəfa ka cha uya Rachal, kəl ja, tə ɗa wi hanyi yiɗau nə nyi aka nyida nda cho nyida Rachal.
21 Ngə Jakop tə nar nyi Laban, <<Na'a mala ɗa. Bəji ɗa nyabiya tə dza, yo i ya piya na cha.>>
22 Kəl ngə Laban tə tsəmtə dəhə njir mələm nda ga mər ladər. 23 Kəl ja, nda akə tə ɗa, ngə cha hətə kwa nyi Liya ga nə nyi nə Jakop, ngə Jakop tə piya na cha. 24 Ngə Laban tə hətə kwatəra nyi Zilpa ga nə nyi nə kwa nyi ka ndər mər tlər nə nyi.
25 Manda vu'i tə wura, kəl ma cha la'a Liya nda, ngə Jakop tə nar nyi nə Laban, <<Mi nə ka mərtə ɗa əna? Ya mər tlər nə nghə ka Rachal, aa a da əngə ma? Mya gwa'ati ka shandə ɗa kəra?>>
26 Ngə Laban tə wum ga na, <<A da tsa'atsa'a nə sər jival kə ea tangnə nja ɗəunda kwa kushiu təvi dəgal nyi wa. 27 Wurandə ma gambəlkur, kəl ba'a ea ɓəla nə nghə kushi nyi nga, ma ka ɓəla mər tlər nə fa məɗəfə səkəu.>>
28 Ngə Jakop tə mər ənda. Cha wurandə gambəlkur na Liya, ngə Laban tə dzəgwa nə nyi Rachal kwa nyi nda kushi nda nə Jakop cha ɗa ka mala nyi. 29 Ngə Laban tə həti kwatəra nyi Bilha ga nə nyi nə Rachal ka ka ndər mər tlər nyi. 30 Ngə Jacop tə piya na Rachal tsəu, kəl ja, Jakop tə ndiya i Rachal matsa Liya. Ngə cha ɓəla mər tlər nə fa məɗəfə nə Laban səkəu.
Nguli Jakop
31 Nda Tlakə tə la'a ənda sal Liya nda do nyida nyi wa, Ngə cha mbəɗiya bəl yah nyi, kəl ja, Rachal nənyi mala kəla yah cha. 32 Ngə Liya tə hətə huɗəu ga yiyah zərsal, ngə cha fəndzə nyi tləm Roben, aka cha na, <<Aka Tlakə la'a tə ɓwaɓwatə ɗa. Vəlvəl sal ɗa kwa nyida ɗa sakana.>>
33 Ngə cha ɓəla hətə huɗəu ga yiyah zərsal, cha na, <<Aka Tlakə ngatə tə ənda a da njo nyida ɗa wa, ngə cha na'a zər nə tsəu.>> Aka ənga cha fəndzə nyi tləm Simion.
34 Cha ɓəla hətə huɗə səkəu ga yiyah zərsal, ga na, <<Sakana a tə bata sal ɗa kwa daɓətə dzə na ya, aka ya yiyah nyi nguli shili makərəu.>> Ngə cha fəndzə nyi tləm Levi.
35 Ngə cha ɓəla hətə huɗə ga yiyah zərsal, ngə cha na, <<Sakana yo fal Tlakəu.>> Ngə cha fəndzə nyi tləm Yahuza. Ngə a cha zhaka yah wa.