28
1 Ngə Ishaku tə nga Jakop ga səkə nyi papa'akur ga tsau nyi bar bəra, <<Ngwa ka da hə kwa Kan'ana wa.>> 2 Təra dzəva Padan Aram sakana, gu ki Betuwel adanya ama ngha. Həbiya nyi mala nə kərnghə hinda, ku huɗa ku'i Laban, səkə ngha. 3 Ga Hyel Ndər Gyalkur Dəhəu cha səkə nghə papa'akur ka yatəkər ɗanghəu, kəl bəji nda ka ɗa ka dlama nji danghəu. 4 Ga cha nə nghə papa'akur ana nyandəla ka wi nda cha nə nyi nə Ibrahim, tsa'aka ko fa'aki na hə'i nə ko ngya mihiɓikur kwa na, hə'i nda Hyel tə nə nyi nə Ibrahim. 5 Ngə Ishaku tə səu Jakop ku laku, cha təra yi Padan Aram, ya da Laban zər Betuwel ndər Aram, zamənya Robeka, nda amanya Jakop ana Isuwa.6 Manda Isuwa tə zəndə ənda Ishaku tə səkə nyi papa'akur nə Jakop ga səu nyi ku laku yi Padan Aram ka cha yi hə mala hinda, ana ənda cha səkə nyi papa'akur ga tsau nyi bar ənda, <<Ngwa ka da hə kwa Kan'ana wa,>> 7 ana ənda Jakop tə nəu nya ada nyi ana ama nyi ga təra yi Padan Aram. 8 Manda Isuwa tə ngabiya ənda huɗa ku'i Kana'ana tla tə tsa ada nyi Ishaku. 9 Ngə cha təra ya da Isma'ila ga yi hə Mahalat, kwamənya Nebaiyot, kwar Isma'ila zər Ibrahim, təkəra mahi'i inda tsa cha.
Shi'uni Jakop vu Betel
10 Jakop tə ngyar Biyersheba ga gəzəya laku yi Haran. 11 Manda cha həya vanya mbwa, ngə cha ta'i ka cha hənda hanyi aka pəcha təɗə ti. Cha hətə vanya hangu tangnda ga fiya, ga piya tanyi ga dəhətə kəra cha ni. 12 Ngə cha shi'uni ənda cha la'a chachiratapa nja ta'indi fwatə hu'i tsa'a ki huɗamələm, ana chama Hyel i'i kwa gi kwa səya ti. 13 Kəl janə Tlakə ta'i təkəra cha, cha na, <<Naya ngə Tlakəu, Hyel nə Ada nghə Ibrahim ana Hyel nə Ishaku. Hə'i nə ka piya tanghə tə na, yo nə ngha ana nə nyandəla ka. 14 Nyandəla ka kwa ɗa wi ngə tə bərbər, ndo wiɗətədzə gwa təwa zədər pəchi ana təɗər pəchi, ana təwa vwa ana holma. Dəhə nji ku dunəya kwa uya papa'akur təwa ngha ana nyandəla ka. 15 Tsa'a ya na ka, yo ɓəla nghə mada a bar ma'i ka, ya yo ɓəlandə nghə shili tə hə'i nə səkəu. A da yo ngya nghə wa, kəl sakanda ya nyabiya alkawal nda ya mərtə ngha.>>
16 Manda Jakop tə hya'atə ku hanyi, ngə cha jigadəma ga na, <<Vəlvəl Tlakə tə mbwa na, ya a da ya zəndə wa.>> 17 Ngə ləvər tə səya nyi ngə cha na, <<Chul mbwa manə əna! A kəpal da wa, mbwa Hyel na, tangnə tsə'u nyavi nə gi huɗamələm na.>>
18 Kaɗə mbudla vanya zəkəu, Jakop tə hətə hangu nda cha dəhətə kəra cha nə nda, ga dəhəya ka shimbal, ngə cha pətə mal təkəri. 19 Ngə cha nga mbwa nda Betel, nacha ngə ki Hyel. Mələm nda njo nga haaɗa Luz.
20 Tangnda Jakop tə hətə salkur ga na, <<Ma Hyel tə ɗa tsa'a naya ga ɓəlabiya ɗa ku ma'i nə yo ma'i na, ga na'a sərsum nda yo səma ana ləkutə handzə 21 məlna yo ɓəl yiying yo ki ada ɗa, Tlakə kwa ɗa ka Hyel ɗa 22 ya hangu nə ya fiya ka shimbal nə kwa ɗa ka ki Hyel, ya dəhə sənda ka na'a yo həbiya nghə zhang ku kuma kwa.>>