Ishaku tə Səkə nyi Papa'akur nə Jakop
27
1 Manda Ishaku tə hala, ya a tsə'u lya cha da kwa la'a sə wa, ngə cha nga Isuwa zər tangərma nyi ga nar nyi, <<Zər ɗa.>>Ngə Isuwa tə wuma, <<Janə ya,>>
2 Ngə Ishaku tə na, <<Sakana a hal tə ya, a da yo zəndə pəchir tə ɗa wa. 3 Sakana, hətə sər ha ngha, gwaja ngha ana laga ngha, ka ma'i gwa takəu ka gwa ləgutsə ɗa kum takəu. 4 Ka shili tagu ɗa sərsum məsədakə ka shili na ɗa ka ya səma, tsa'aka yo səkə nghə papa'akur təvi yo tah.>>
5 Robeka kwa sə himi da sə nda Ishaku kwa pə nə Isuwa. Manda Isuwa tə təra gwa takəu ka cha ki ləgutsə kum takə cha shili ni, 6 ngə Robeka tə nar nyi nə zər nyi Jakop, <<Ngati, a ngatə tə ya ənda ada nghə kwa na nə Isuwa, 7 <Shili na ɗa kum takəu, ka batliya ɗa sərsum ya səma, ya səkənghə papa'akur mar Hyel təvi yo tah.> 8 Sakana ja, zər ɗa, səyahimi mənakəu ka mər sənda yo nar ngha, 9 Ma'i go dləma ka səya ɗa nguli kua mətlə nda lya ko i, tsa'aka yo tagu nyi məsaɗakə nə ada ngha, tang wi nda cho i. 10 Kəl ba'a ka yi na nyi nə ada nghə cha səma, tsa'aka cha səkə nghə papa'akur təvi cho tah.>>
11 Ngə Jakop tə nar nyi nə Robeka, ama nyi, <<Ndzama! zamə ɗa Isuwa shishi dzə nyi, naya tsə'u dza ya ɓeɓetəu. 12 Aman ma ada ɗa tə tsəka ɗa? Cho har ənda naya ndər shakər ya, ya yo təɗəkə nyi shi'u nə kərɗa təvira papa'akur.>>
13 Ngə ama nyi tə nar nyi, <<Zər ɗa, shiu ngə cha ɗa təkəra ya. Mər sə nda ya nar ngha, ma'i ka ki shili na ɗa ku inda.>>
14 Kəl ngə cha shili na nda nə ama nyi, ngə ama nyi tə tagu sərsəm məsɗakəu, wi nda ada nyi kwa i. 15 Ngə Robeka tə gwa hətə ləkutu gaɗagaɗa nda tsa cha ku ki, nə Isuwa zər tangərma nyi, ga handzə nyi nə Jakop zər kushi nda. 16 Ətsəu ngə cha baɗənda cha cha ana mbwa ɓeɓetə nda tə wulya cha ana chi ku inda. 17 Ngə cha nə nyi sərsum məsəɗakə nda cha tagu nda ana gwazhilakəu nə zər nyi Jakop.
18 Ngə cha gwa da ada nyi ga na, <<Ada ɗa!>>
Ngə ada tə wuma, <<Awai, zər ɗa, nakə wa na?>>
19 Jakop tə nar nyi nə ada nyi, <<Naya Isuwa na zər tangərma ngha. Janə ya mərtə tə wi nda ka na. Maki hya'atə ka səmtsə sə nda ya ki ləgutsi, tsa'aka ko səkə ɗa papa'akur ngha.>>
20 Kəl ngə Ishaku tə jau zər nyi, <<Aman ka ɗana ki uya kuskus zər ɗa?>> Kəl Jakop tə na, <<Hyel Tlakə nghə ngə tə mərtə ma'i ɗa tə ɗa mənakəu.>>
21 Kəl ngə Ishaku tə nar nyi nə Jakop, <<Zər ɗa, shili ləhə dzə ɗa ga ya tsəka ngha, ga ya ngabiya ndara vəlvəl nakə zər ɗa Isuwa na, ndara a da nakə nə wa.>>
22 Ngə Jakop tə yi ləhə dza ada nyi Ishaku, ngə cha tsəka nyi cha na, <<Kurakə nanə nənyi, kuraka Jakop, kəl nda cha cha tsəu, cha Isuwa.>> 23 A da cha nau ngabiya nyi wa, aka cha cha na shishi wi nə zamə nyi Isuwa, kəl ngə cha səkə nyi papa'akur. 24 Ngə Ishaku tə jawa, <<Vəlvəl nakə nə zər ɗa Isuwa ya?>>
Ngə Jakop tə wuma, <<Naya na.>>
25 Kəl ngə Ishaku tə na, <<Zər ɗa shili na ɗa sərsum ya səma, tsa'aka yo səkə nghə papa'akur ɗa.>>
Ngə Jakop tə shili na nyi ngə cha səma, ngə cha shili nayi ɓitir anapə ngə cha sa. 26 Ngə ada nyi Ishaku tə na, <<Zər ɗa, shili tangna, ka gaɓətə ɗa.>>
27 Kəl ngə cha yi gaɓətə nyi. Manda Ishaku tə ngatə muvuɗə ləkutəu nyi, ngə cha səkə nyi papa'akur ga na,
<<Ah, muvuɗə zər ɗa
wi muvuɗə babal nda
Tlakə tə səkər papa'akur nyi.
28 Ga Hyel cha nə nghə kuchikəpa səya ki huɗamələm,
cha ləɓətə nghə hə'i, ga ka uya sərsum nyaɓəu,
ana ga səuhiuhi ngha ana anap nghə a ɗa nyaɓəu.
29 Əngwa jul nji nda mər mavakur nə ngha,
nji tsə'u nda uzhi nə ngha,
ka ɗa tlakə təkəra ka zamə ngha,
əngwa nguli ama nghə tsə'u nda uzhi nə ngha.
Nji inda tə shi'unda ngha, nda ɗa nji shi'ushi'ua,
nji inda tə səkə nghə papa'akur tsə'u nda ɗa na papa'akur.>>
30 Ahir Ishaku tə wur na səkə nyi papa'akur, ma Jakop kwa təra, kəl janə zamə nyi Isuwa kwa shili hya'atə tə mbwar ki ha kum. 31 Nacha tsə'u cha shili tagu sərsum məsəɗakə ga shili na nyi nə ada nyi, ngə cha na, <<Ada, hya'atə ka səm sə nda ya ki ləgutsi, tsa'aka ko səkə ɗa papa'akur ngha.>>
32 Kəl ngə Ishaku tə jau nyi, <<Nakə wa na?>> Ngə cha wuma,
<<Naya Isuwa na, zər tangərma ngha.>>
33 Kəl dza Ishaku tə ghəya tsamətlaɗə gagaɗa, cha na, <<Wa nda ndə nda ki ləgutsə kum ga shili na ɗa nda? Ya səmnya təvi ka səgwa na, ga səkə nyi papa'akur, ya tsa'anyata cho ɗa na papa'akur!>>
34 Manda Isuwa tə ngatə ɓwanya ada nyi, kəl cha səya ləla cha tiwi na kurakə dzəgamdzəgamə ga nar nyi nə ada nyi, <<Ada, səkə ɗa papa'akur ma'a naya!>>
35 Ngə Ishaku tə nar nyi, <<Zamə nghə tə shili na kwakunakur ga hənda papa'akur ngha.>>
36 Ngə Isuwa tə na, <<A da tsa'atsa'a tanyi ngə tləmə nyi Jakop ma? Aka mətləkunya nda cha ɗiya ɗa na, cha dləuya yar tangərmakur ɗa, janə cha ɓəlatə dləuya papa'akur tsa ya!>> Ngə cha ɓəla na, <<A da ka həya ɗa papa'akur mada kushə ma?>>
37 Ngə Ishaku tə ɓəlakə nyi, <<Wurtə ya mərtə nyi dəgal təkəra ka, ya ka zamə nyi dəhə kwa ɗa ka mavi'i nyi, ya nə nyi təya papa'akur nə sərsuma ana taɗər ɓitir anapəu. Mi ngə sənda ya kwa nau mərtə nghə ja zər ɗa?>>
38 Kəl ngə Isuwa tə jau ada nyi, <<Papa'akur zhang tanyi tsakə ada ya? Səkə ɗa papa'akur tsə'u ada ɗa!>> Ngə Isuwa tə tiwi na kurakə dzəgamdzəgaməu.
39 Ada nyi Ishaku tə wum ga nar nyi,
<<Mbwa nda ko ngya tə kwa ɗa
naɗə tsa hə'i nda kwa ɗa səu,
ana tsa kuchikəpa nda Hyel kwa sətə səya
ki huɗamələm ka cha ləɓətə hə'i.
40 Ngya nghə kwa ɗa təwa katsakər,
ya ko ɗa ka mava zamə ngha.
Kəl ja, maka həa,
ko ɓəɓəlnda gang
nyi tə wulya ka.>>
Jakop tə Hwi Yada Laban
41 Isuwa tə gəzaya Jakop nya ta cha təkəra papa'akur nda adan nda tə səkə nyi nda. Ngə cha nar nyi kərnyi, <<Bəjir sə'ingu ada ɗa ɗatə ləhəu, ahir əngə tsəu, yo tsəya zamə ɗa Jakop.>>
42 Manda nja nar nyi nə Robeka sə nda Isuwa tə na, ngə cha nga Jakop zər nyi nda kushi nda ga nar nyi, <<Zamə nghə Isuwa kwa haɓə ka cho tsəya ngha, ga cha fətə nyi ɗufə nə kərnyi. 43 Sakan ja zər ɗa, səya himi mənakə da sə nda yo nar ngha. Kusa hya'atə ka təra yada zamə ɗa Laban vu Haran. 44 Ka yi ngya na cha, kəl ma huɗa zamə nghə tə tatla. 45 Ma huɗa zamə nghə tə tatlə ga far na sə nda ka mərtə nyi, yo setə nghə mafakə ka shili. Ka mi yo tar nguli ɗa mətlə pəchi zhang ngha?>>
46 Kəl ngə Robeka tə nar nyi nə Ishaku, <<Ngya na mahi'i Hiti inə Isuwa tə hə inə ɓagu tə dza ya. Ma Jakop tə hə mala ku pama ku'i Hiti inda na ngya tə hə'i na ma'a nacha, a tsə'u sakədar pi da na'a wa.>>