Ishaku ana Abimelek
26
1 Ngə vanya huɓwa tə ɓəla tlə ku hə'i nda, wi nda tə ɗaka ɗa ku bəjir Ibrahim, ngə Ishaku tə ma'i yada Abimelek təl njir Filisti a vu Gerar. 2 Ngə Tlakə tə chabiyadzə nə Ishaku ga na, <<Ngwa ka da ma'i gwa Masar wa, ngya ku hə'i nda ya nar nghə ka ngya kwa. 3 Ngya tangnə nə bəji kushu ku hə'i na, yo ngya tsa'a naka, yo səkə nghə papa'akur. Aka yo nə hi dəhə hə'i na, a nə ngha ana nyandəla ka, əngə yo nyabiya səmfəla nda ya mər nə ada nghə Ibrahim. 4 Yo mərtə nyandəla kə ɗang wi ngə tə sasəlga ki huɗamələm ya yo nə nda dəhə hə'i na, təwa nyandəla kə dəhə njir dunəya kwa uya papa'akur, 5 aka Ibrahim tə ɗa na kəriwa na'a, cha ɓəlatə ɓwanya ɗa, Mafakə ɗa, tsaubar ɗa, ana gadlagadla ɗa.>> 6 Kəl ngə Ishaku tə ngya vu Gerar.7 Manda njir mələm nda tə jau mala nyi, kəl cha na, <<Kwaməɗa nga,>> aka cho ləvər na, <<Mala ɗa nga.>> Cho jigadəma, <<Njir mələn nə da ba'a tsəya ɗa təkəra Robeka, aka mala gumaguma cha.>>
8 Manda Ishaku tə səkar dzə na ngya, Abimelek təl njir Filisti kwa ndzamə səya təwa kagapə nə patla nyi ga la'a ənda Ishaku kwa shashi mala nyi Robeka. 9 Kəl ngə Abimelek tə nga Ishaku ga na, <<Vəlvəl mala nghə nga! Mya gwa'atə ka na, <Kwamə ɗa nga>?>>
Ishaku tə wum nə nyi ga na, <<Ya har wi yo tar pya ya tə dəbar nyi.>>
10 Kəl ngə Abimelek tə na, <<Minə sə nə ka mərtə ea na? Vanya ndə kwa nda nau piya na mala ngha, ya kwa nda shili na bikə təkəra ea.>>
11 Kəl ngə Abimelek tə tsau nyi bar nə dəhə nji, <<Dəhə ndə nda tə tsəkar ndə nə na mala nyi vəlvəl njo tsəya nyi.>>
12 Ngə Ishaku tə gwa zwa tə hə'i nda ga mərəya səzwazwa nyaɓəu, aka papa'akur nda Tlakə tə səkə nyi. 13 Cha ɗa ndər gəna, sər cha cha tə biyama na tsaka, ngə cha ɗa ka ndər gəna gagaɗa. 14 Biri kətəng, kua, tla i'i ba'a mavi'i ɗang tsa cha, ngə njir Filisti tə ngatə shishi nyi. 15 Kəl ngə njir Filisti tə shikətə dəhə ka'ur ɓiti na mishishi'ua, ka'ur ɓiti inda mavi'i Ibrahim, adanya Ishaku tə ɗaka labiya.
16 Ngə Abimelek tə nar nyi nə Ishaku, <<Təra dzən ea, a ɗatə kə na dunama 'ual matsa ea.>>
17 Kəl ngə Ishaku tə təra ga yi ngyata nyi ku dakə Gerar. 18 Ngə Ishaku tə ɓəla hwatəbiya ka'ur ɓiti inda ada nyi Ibrahim tə ɗaka labiya, ka'ur ɓiti inda njir Filisti tə shikətə a hir nda Ibrahim tə tah, ngə cha ɓəla fəndzə nda tləm nə ka'ur ɓiti inda wi nda ada nyi tə ɗaka fəndzə nda.
19 Ngə mavi'i Ishaku tə labiya vanya taɗər ka'ur ɓiti ku dakə nda, ga uya ɓiti mənakə tangnda. 20 Kəl ja, njir ɓəla sərshishi nə Gerar tə guhi ka njir ɓəla sərshishi nə Ishaku nda na, <<Ɓiti kə ea na?>> Aka ənga cha fəndzə nyi tləm nə ɓiti nda Esek, aka nda kəpal təkəri. 21 Ngə nda ɓəla labiya vanya ka'ur ɓiti, ya ngə nda ɓəla kəpal təkəra nacha nda səkəu, aka ənga cha fəndzə nyi tləm Sitna. 22 Ngə cha tsaɗəndadzə tangnda ga ɓəla labiya vanya ka'ur ɓiti, ngə a nji da kəpal təkər wa, ngə cha fəndzə nyi tləm Rehobot, cha na, <<Sakan ja, Tlakə nə ea tə mbwa, eo biyama na yatəkər tə hə'i na.>>
23 Tangnda ngə cha hya'atə ga təra gi Biyersheba. 24 Ku vu'i nda ngə Tlakə chabiyadzə ga na. <<Naya Hyel ada nghə Ibrahim na. Ngwa ka da ləvər wa, aka tsa'a ya naka, yo səkənghə papa'akur ya yo mərtə nyandəla ka kwa tsaka, aka mava ɗa Ibrahim.>>
25 Kəl ngə Ishaku tə hərya dzəgana ga nga tləmər Tlakəu. Tangnda cha kukuya madləba nyi, ngə mava nyi tə labiya ka'ur ɓiti tangnda.
Mbandər Ishaku ana Abimelek
26 Ngə təl Abimelek hya'atə vu Gerar tə shili nanda na Ahuzat ndər dəkə dəma nyi, ba'a Fikol gau nə ləvaləva nyi. 27 Ngə Ishaku tə jau nda, <<Mya gwa'atə hya shili da ya, ya nahi nda ngya ɗa ga gədlənda ɗa dzən hya?>>
28 Ngə nda wuma, <<A la'a tə ea tə babal ənda Tlakə tsa'a na ka, aka ənga ea na, <Mbandər təwa səmfəla ɗa ku pama mən,> a mən ɓatləya mbandər kə'i ka, 29 tsa ka da mərtə ea ɗimikur, wi nda a ea mər ɗimikur nə nghə wa, kəl ja, ea səu nghə ku laku na piyarɗufəu. Ya sakana ndər papa'akur ka nə Tlakəu.>>
30 Kəl ngə Ishaku tə ɓatliya nda ladər, ngə nda səm ga sa. 31 Kaɗə mbudla vanya zəkəu, ngə nda mbandər təwa səmfəla ku pama kərnənda, ngə Ishaku tə ləbiya nda, ngə nda təra na piyarɗufəu.
32 Pəshinda mavi'i Ishaku tə nar nyi ɓwanya təkəra ka'ur ɓiti nda nda labiya nda. Nda na, <<Uya tə ea ɓiti!>> 33 Ngə cha nga nyi Shibaa, aka ba'aka ənya nja kwa nga mələm nda Biyersheba.