Nyandəla Ibrahim təwa Ketura
25
1 Ngə Ibrahim tə hə vanya mala na tləm nyi Ketura. 2 Ngə cha yiyah nyi Zimran, Jokshan, Medan, Midiyan, Ishbak ana Shuwa. 3 Jokshan ngə adanya Sheba ana Dedan, nyandəla Dedan nanda ngə njir Ashuri, njir Letushi ana njir Lumi. 4 Nguli shili Midiyan Efa, Efer, Hanok, Abida ana Elda. Dəhə nda nyandəla Ketura inga.5 Ibrahim tə ngya nyi na dəhə sə nda nənyi, nə Ishaku. 6 Kəl ja, tsə'utanyi Ibrahim na pi, cha nə nyi ga'a nə nguli shili kwatəra nyi inda ga təkəbiya nda na zər nyi Ishaku, ga səu nda ku laku gwa təwa zədər pəchi.
Tər Ibrahim
7 Dəhə dəhə fa Ibrahim 175 tə dunəya. 8 Ngə cha tah ku halhalkur mənakəu, ndə halhal cha nda na fa nyi 'ualəu, cha ɓəl gyada kə'i jival nyi. 9 Nguli shili nyi Ishaku ana Isma'ila tə haɗiya nyi ku tləl nda tə babal Makpela nda təwa zədər pəchi nə Mamre, tə babal Efron zər Zohar ndər Hiti, 10 babal nda Ibrahim tə ɗəlbiya tsa njir Hiti nda. Tangnda nja haɗiya nyi, ana mala nyi Saratu. 11 Ahir tər Ibrahim, Hyel tə səkə nyi papa'akur nə zər nyi Ishaku, nda tə ngya ndzər Biyar Lahai Royi.
Nyandəla Isma'ila
12 Janə nyandəla Isma'ila zər Ibrahim nda nda yah na Hajaratu kwa Masar, kwatəra Saratu.
13 Ja'inə tləmər nguli shili Isma'ila wi nda nja yah nda, Nabaiyot zər tangərma, Kedar, Adbil, Mibsam, 14 Mishma, Duma, Masa, 15 Hadad, Tema, Jetur, Nafish ana Kedema. 16 Ja'inə nguli shili Isma'ila, ya ja'inə tləmər nyavi təlkur kənda kwabəmətlə wi nda mələm kənda ana mbwa nda nda na ngya ti. 17 Dəhə dəhə fa Isma'ila 137. Ngə cha tah, ngə nja haɗiya nyi kə'i jival nyi. 18 Nyandəla cha tə ngya fwatə vu Havila kwa'a vu Shur ləhə dza ɓəlkər hə'i Masar, ma ko sha yi Ashuri. Dəhə nda lələhə dzər kərnənda.
Yar kə'i Jakop ana Isuwa
19 Janə labar Ishaku, zər Ibrahim. Ibrahim ngə ada nya Ishaku. 20 Sakanda fa Ishaku fwaɗəkumnyi, cha hə Robeka, kwar Bethuel ndər Aram hya'atə vu Padan Aram, kwamənya Laban ndər Aram.
21 Ishaku tə gədi tsa Tlakə təvira mala nyi, aka a da cha uya ngulisha'a wa. Ngə Tlakə tə wum pətlənya Ishaku, ngə Robeka tə hətə huɗə ɓəli. 22 Kəl ja, ngulisha'a inda kwa mbəla kərnənda ku ta aman nda. Ngə Robeka tə jau Tlakə ga na, <<Mya gwa'atə sənə kwa ɗa naya?>>
23 Ngə Tlakə tə nar nyi,
<<Ngulisha'a ingə ku ta kə inga kwa ɗa ka hə'i pampam mətləu.
Fwatə tə ghəya, hə'i pampam mətlə inga, kwa təkəbiyadza.
Zhang kwa ndiya vanyi na dunama,
zər dəgal nga kwa nda mər mavakur nə zər kushi nga.>>
24 Nda bəji ɗatə ka Robeka kwa yah, ngə cha yiyah ɓəli! 25 Zər nda nja yah tangərma nda dəzəu ana shishi vəkəvəkə dzə nyi wi cha handzə lukutə nda na shishi dzəri. Ngə nda fəndzə nyi tləm Isuwa. 26 Ma zamə nyi nda səya tsəu, kəl janə cha gəzəya mətətəka Isuwa ku cha cha, ngə nda fəndzə nyi tləm Jakop. Fa Ishaku kwakumnyi ma Robeka ya ɓəli inda.
27 Ngulisha'a inda tə həa, Isuwa tə ɗa ka məzəmakə kwalkwala, Jakop tsə'u ndə shishiu cha, cho ngya ku pama madləɓa. 28 Ishaku ndər nyinda kum takə cha nacha gwa'atə cho i Isuwa. Robeka tsə'u ndiya tə i Jakop.
29 Vanya pəchi Jakop kwa ta ngwayangwaya, ngə Isuwa tə hya'atə ku takə na huɓwa. 30 Ngə cha nar nyi nə Jakop, <<Ɗa ɗa ngwayangwaya dəzəu nghə na, aka huɓu kwa tsəya ɗa!>> (Nacha gwa'atə njo nga Isuwa, Edom, nacha ngə dəzəu.)
31 Jakop tə wumə ga na, <<Ɗəl nda ɗa yar tangərmakur nghə gwadagəu.>>
32 Ngə Isuwa tə na, <<La'a huɓə kwa tsəya ɗa, mi ngə sakədar yar tangərmakur na'a?>>
33 Kəl Jakop tə na, <<Səmnda ɗa fəla.>> Kəl ngə Isuwa tə səmfəla, ga ɗəlnda nyi yar tangərmakur nyi nə Jakop.
34 Ngə Jakop tə nə nyi gwazhilakə ana zər ngwayangwaya kushiu, ngə cha səm nya ga sakər ɓiti, ga hya'atə ga təra.
Təwa əngə ngə Isuwa tə təkə na yar tangərmakur nyi.