Ishaku ana Robeka
24
1 Sakana ja, Ibrahim halti, ya fa nyi ɗatə ɗanghəu, ya Tlakə wurta səkənyi papa'akur ku dəhə səu. 2 Ngə cha nar nyi nə gau mavi'i nyi, ndə nda dəgal təkəra dəhə sə nyi, <<Hau chaka tə kiɗa ea ya. 3 Yo i ka səmnda fəla na Tlakəu, Hyel nda ki huɗamələm ana hə'i, ənda a da ko həbiya nyi mala nə zər ɗa ku huɗa ku'i njir Kan'ana inə yo ngya ku pama nda inə wa. 4 Kəl ja, ko təra ya tə hə'i ɗa, a yo huɗa nji kəea ko yi həbiya nyi mala nə zər ɗa Ishaku.>>5 Kəl ngə mava nyi nda tə jau nyi, <<A manə ma a mala nda da i shili tsa'a naya ku hə'i nə wa? Kwa nau ya ɓəl na zər nghə ya tə hə'i nda ka hya'atə kwa ya?>>
6 Ngə Ibrahim tə wum ga na, <<Ka gəla ja, ngwa ka ɓəl na zər ɗa yi nda wa. 7 Tlakəu, Hyel huɗamələm, nda tə həbiya ɗa tsa ki ada ɗa ana hə'i ɗa, nacha nda tə ɓwanya na ya ga mərtə ɗa alkawal təwa səmfəla tə na, <Yo nə nyi hə'i nə nə nyandəla ka,> cho sətə chama nyi biyama ngha, aka ga ka yi uya nyi mala nə zər ɗa hinda. 8 Macha a malamala nyi da kwa i shili tsa'a na kə wa, a tsə'u səmfəla ɗa da təkəra kə wa. Kəl nda ngwa ka ɓəl na zər ɗa yi nda wa.>> 9 Ngə mava nda tə hau cha cha gwa da kiɗa ea Ibrahim, ga səmnda fəla təkəra ɓwanya nda.
10 Ngə mava nda tə hətə dləgwam tlakə nyi kuma ga təra, ətsəu cha fa'atə kala chul sə mənakə nə tlakə nyi. Ngə cha go lakur dzəva Mesopotamiyaa, yo mələm Nahor. 11 Ngə cha mərtə dləgwam inda tə uzhi nya ka'ur ɓiti biya hir mələm, akə kaɗə ɗa, bəji nda mahi'i kwa biya ka ki gə ɓiti.
12 Ngə cha pətlənya ga na, <<Yawa Tlakəu, Hyel nə Ibrahim tlakə ɗa, mərtə ma'i ɗa cha ɗa mənakə ənya, ətsəu, ka char nyi manakəkur nə Ibrahim tlakə ɗa. 13 Janə ya tə ta'i dza ka'ur ɓiti na, ku'i njir mələm tsə'u kwa zəbiya ka gə ɓiti. 14 Ngwa cha ɗa ma kwamalakə nda ya nar nyi, <Maki vala ɗa na təm nghə ngə ya satsə ɓiti ni,> ya ngə cha na, <Satsə, ga ya nə nyi nə dləgwam nghə ingə tsəu,> cha ɗa ka mala nda ka tabiya nyi nə mava nghə Ishaku. Təwa ənga yo zəndə ənda char nyi tə kə nyida nda ba'anawa nə tlakə ɗa Ibrahim.>>
15 Təvi cha wur na pətlənya, Kəl janə Robeka kwar Betuwel, zər Milka, mala Nahor zamə nya Ibrahim tə zəbiya na təm tə patləka cha. 16 Robeka gumaguma gagaɗa, ya kwapəlyakə cha, a cha taa ɓə na sal wa, cha gwa nya ka'ur ɓiti nda ga gwa nyandə təm nyi cho ɓələu.
17 Kəl mava nda tə kusa ga həya nyi ga na, <<Maki ɗa ɗa ɓiti ngə ku təm nghə ngə ya satsi.>>
18 Ngə cha na, <<Satsə tlakə ɗa,>> cha kusa həya təm nda, ga nə nyi cha sa.
19 Ahir cha nə nyi ɓiti nda, ngə cha na, <<Yo gətsə nyi nə dləgwam ingə tsəu, kəl sakanda nda nyi ti.>> 20 Cha kusa shabiya ɓiti nda ku təm nyi nda gu sər sa ɓiti dləgwam, ngə cha biyama na gə ɓiti nə dləgwam inda. 21 Mava nda tsə'u tə da'atanyi cho ndzamə nyi, cho i cha ngabiya ndara Hyel mərtə tə ma'i nyi tə ɗa mənakəu, ndara a da wa.
22 Nda dləgwam inda tə wur na sa ɓiti, ngə mava nda tə həbiya tsəshiu nə ha ku chir nə bəjingha, ga hau nyi ku chira Robeka. Ngə cha həbiya sər hatə chi wawa'a mətləu ga hatə nyi tə cha cha. 23 Kəl ngə cha jau nyi, <<Kwar wa ka? Maki wum na'a, mbwar dləu mihiɓi da ku ki ada nghə ka ea hənda hanyi ya?>>
24 Ngə cha wum ga na, <<Naya kwar Betuwel ya, zərsal nda Milka tə yiyah nyi nə Nahor.>> 25 Ngə Robeka tə ɓəla na, <<Sar ana sərsum sərshishi da tsa ea gwang tanyi, ya vi mihiɓi da nda ko nau hanyi kwa.>>
26 Kəl ngə mava nda tə uzhi ga hətə nyi səli nə Tlakəu, 27 cha na, <<Fal ngyatə nə Tlakəu, Hyel nə Ibrahim tlakə ɗa, nacha nda a da ngyar mər mənakəkur ana tsa'atsa'akur nə tlakə ɗa wa. Naya tsəu, ngə Tlakə tə nəu naya ku ma'i ɗa yo ki njikə tlakə ɗa.>>
28 Kəl kwa nda tə hwi gu ki gwa da ama nyi, ga gwa dəkar dəhə sə nda tə ɗa. 29 Zamə nya Robeka da tləm nyi Laban, ngə cha har hi biya dza ndə nda biya nya ka'ur ɓiti nda. 30 Ɗəɗəu tanyi nda cha la'a tsəshiu chir ana sər hatə chi inda tə cha kwamə nyi, ana cha ngatə sənda Robeka tə na bəra, <<Janə sə nda ndə nə tə nar ɗa,>> ngə cha biya nda, ga biya həya ndə nda ta'i dza dləgwam nyi ləhə dza ka'ur ɓiti nda. 31 Ngə Laban tə nar nyi, <<Səgwa, nakə ndə nda Tlakə tə səkənyi papa'akur, mya gwa'atə ka ta'i tang biya? A ɓatliya tə ya vi ana mbwa nə ka dləgwam nghə inga.>>
32 Kəl ngə Laban tə gwa nacha ku ki, ga fa'aya sə inda tə ya dləgwam inda. Ngə cha shili na nyi sar ana sərsum nə dləgwam inda, ngə cha shili na nyi ɓiti nə ndə nda ana nji nyi inda ka nda chinda hya nda. 33 Ngə nja fiya nyi sərsuma, kəl ja, cha na, <<A da yo səm sərsum wa, kəl ya par sənda tə shili naya.>>
Ngə Laban tə na, <<Par ea ja.>>
34 Ngə cha na, <<Naya mava Ibrahim na. 35 Tlakə səkənyi tə papa'akur 'ual nə tlakə ɗa, ga mərtə nyi ndər gəna. Cha nə nyi kətəng ana tla, bəjingha ana azurfa, mavi'i shili ka mahi'i, dləgwam ana Kwara i'i. 36 Saratu mala tlakə ɗa tsə'u tə yiyah nyi zərsal ku halhalkur nyi, ya ngə Ibrahim tə nə nyi dəhə sə nyi nə Ishaku. 37 Tlakə tə nar ɗa ya səmfəla ənda, <A da ko həbiya nyi mala nə zər ɗa ku huɗa ku'i njir Kan'ana inda ya na ngya ku huɗa nda wa, 38 kəl ja, ma'i yakə njikə ada ɗa, ku nyavi kəea, ka həbiya nyi mala nə zər ɗa.>
39 <<Kəl ngə ya jau nyi, <A manə ma a mala nda da i shili tsa'a naya ku hə'i nə wa?>
40 <<Kəl ngə cha wum na'a ga na, <Tlakə nda ya ma'i ma nyi kwa sətə chama nyi cho mərtə ma'i nghə kwa ɗa mənakəu, ko uya nyi mala nə zər ɗa ku chul ɗa ku nyandəla ada ɗa. 41 Ma ka yo nyavi ɗa, mada nda ngyar nə nghə mala, a tsə'u səmfəla ɗa da təkəra kə wa, təwa ənga ko mbəɗə tsa səmfəla ɗa.>
42 <<Manda ya yi nya ka'ur ɓiti ənya, ngə ya na, <Tlakəu, Hyel nə Ibrahim tlakə ɗa, Maka i, maki mərtə ma'i ɗa cha ɗa mənakəu. 43 Janə ya ta'i nya ka'ur ɓiti na, ma kwamalakə nda shili ka gə ɓiti, ngə ya nar nyi, <<Maki ɗa ɗa ɓiti ku təm nghə nga ya satsi,>> 44 macha na, <<Satsi, yo gətsə nyi nə dləgwam nghə ingə tsəu,>> ngwa cha ɗa ka nacha ngə Tlakə tə tabiya nyi nə zər tlakə ɗa.>
45 <<Təvi ya wurandə pətlənya ku ɗufwa ya, Robeka tə shili ana təm tə patləka cha, ngə cha yi nya ka'ur ɓiti cha yi gətsə ɓiti, kəl ngə ya nar nyi, <Maki ɗa ɗa ɓiti ya satsi.>
46 <<Cha kusa həya təm ɓiti nyi səya kyatə patləka cha, ga na, <Satsi, yo gətsə nyi nə dləgwam nghə ingə tsəu.> Kəl ngə ya satsi, ngə cha gətsə nyi nə dləgwam ɗa inda tsəu.
47 <<Ngə ya jau nyi, <Kwar wa ka?>
<<Ngə cha na, <Kwar Betuwel zər Nahor, nda nda yah na Milka.>
<<Ngə ya hau nyi tsəshiu ku chira cha ana sər hatə chi tə cha cha, 48 ngə ya uzhi ga hətə nyi səli nə Tlakəu. Ya fal Tlakəu, Hyəl nə tlakə ɗa Ibrahim, nacha nda nəu na ya ku laku tsa'atsa'a, ngə ya uya ajinya zamə nya tlakə ɗa, nə zər tlakə ɗa. 49 Sakana macha hyo char mənakəkur ana tsa'atsa'akur nə tlakə ɗa, hya nar ɗa, ya macha a da əngə wa, nar ɗa ma, ga ya zəndə laku nda ya kwa sha ti.>>
50 Laban ana Betuwel tə wum ga na, <<Nənna hya'atə tsa Tlakə ngani, vanya sə da ea kwa nau na təkəri wa. 51 Janə Robeka, ma'i na cha, cha ki ɗa ka mala zər tlakə ngha, wi nda Tlakə tə na.>>
52 Nda mava Ibrahim tə ngatə sə nda nda na, ngə cha uzhi səya hu'i a mar Tlakəu. 53 Kəl ngə mava nda tə həbiya bəjingha ana azurfa ana alenya sər dzaki ga nə nyi nə Robeka, ngə cha nə nyi ga'a nda na səli nə Laban zamənya Robeka ana ama nyi. 54 Nacha ka nji inda cha kə'iri nda səm ga sa ga hənda hanyi.
Manda nda hya'atə vanya zəkəu mbudla, ngə cha na, <<Ləbiya ɗa ma ya təra ya da tlakə ɗa.>>
55 Kəl ja, zamə nyi ana ama nyi tə wum ga na, <<Ngyar kwa na cha ngya kə'i ea nə hanyi kuma macha kwa ɗa cha, hya dzəgwa təra.>>
56 Kəl ja, cha nar nda, <<Ngwa hya da finda ɗa wa, mangə Tlakə wurta mərtə ma'i ɗa tə ɗa mənakəu. Ləbiya ɗa ma ya gwa ku laku ya təra ya da tlakə ɗa.>>
57 Ngə nda na, <<Mən nga Robeka mən jawar nya cha.>> 58 Ngə nda nga nyi ga jau nyi, <<Kwa i kə ka ma'i na ndən ya?>>
Ngə Robeka tə na,<<Ah yo ma'i.>>
59 Kəl ngə nda ləbiya Robeka ga səu nyi ku laku tsa'a na mala nda tə handə nyi nda, ana mava Ibrahim dəhə ka nji nda kə'i cha ngə nda təra. 60 Ngə nda səkə nyi papa'akur nə Robeka nda nar nyi,
<<Kwamən ea, ka ɗa ka ama,
amanya nji dəbu dəbu,
nyandəla ka kwa kura njir dawa kənda,
ətsəu ndo fa'aki na mələm nji inda kwa ɗa tsa nda.>>
61 Kəl ngə Robeka ana kwatəra nyi nda tə ɓatlətə kərnənda ga gya tə ya dləgwam ga tera kə'i ndə nda. Əngə mava Ibrahim nda tə təra na Robeka.
62 Ku bəji nda Ishaku shili tə vu Biyar Lahai Royi, aka a vu Negev cha na ngya. 63 Ngə Ishaku tə biya aba akəu cho zhuli cho jigadəmab, manda cha har huɗəmacha kəl cha la'a dləgwam kwa shili. 64 Robeka tsə'u tə har huɗəmacha ngə cha la'a Ishaku, ngə cha səya kya tə ya dləgwam nyi 65 ngə cha jau mava nda, <<Wangə ndə ngə tə babal kwa shili ka dləu mən nga?>> Mava nda tə wum ga na,
<<Tlakə ɗa nga,>> Kəl ngə Robeka tə hətə sər mba kər ngə cha mbu ku kəra cha.