Tər Saratu
23
1 Fa Saratu 127 ma cha tah. 2 Cha tə vu Kiriyat Arba (nacha ngə Həbron) a tə hə'i Kan'ana, ngə Ibrahim tə sə'ingu tə nyi.3 Kəl ngə Ibrahim tə ngyar mala nyi nda tə nda ga yi nar nyi nə njir Hiti, 4 <<Naya mihiɓi ya ana ndə shilishili ku pama hi, ɗəlnda ɗa ma mbwar haɗə ndəu, ka ya haɗiya mala ɗa.>>
5 Ngə njir Hiti tə wum nə Ibrahim ga na, 6 <<Alvari, ngati ea, ndə nda Hyel tə dləukər ka ku pama ea. Haɗiya mala nghə ku hu nda ndiya ɗa mənakə nə ngha, ku huɗa hu kəea inga. Ndə da ku pama ea kwa katə nghə hu ka ga ka haɗiya mala nghə wa.>>
7 Kəl ngə Ibrahim tə hya'atə ga uzhi huɗə njir Hiti, njir hə'i nda. 8 Ngə cha nar nda, <<Macha a dləukər tə hi hya ngya ɗa ya haɗiya mala ɗa, ngatə ɗa ma ja, gədyar ɗa ma Efron zər Zohar, 9 ga cha ɗəlnda ɗa tləl nyi nda tə vanya mbwa nda njo nga Makpela, ya a tə ɓəlkər babal nyi. Hya nar nyi cha ɗəlnda ɗa wi nda njo kina ɗəla, ngwa cha həya sə kwa wa, ga cha ɗa ka mbwar haɗə na'awa nji ku pama hi.>>
10 Aka ənga, Efron ndər Hiti, nda na ngya ku pama nji kənda, tə ɓəlakə nyi nə Ibrahim, njir Hiti inda tə shili tangnda kwa ngati. 11 Ngə Efron tə na, <<A'a tlakə ɗa, ngatə ɗa. A nə nghə tə ya babal ngə dəhə ka tləl nga a huɗə dlama nji ina. A nə nghə tə ya ka haɗəya mala nghə ngə ti.>>
12 Kəl ngə Ibrahim tə ɓəla uzhi huɗə njir hə'i nda. 13 Ngə cha nar nyi nə Efron a huɗə dlama njir hə'i nda, <<Ngatə ɗa ja, macha a dləukər tə ka, yo kinda kwaba babal nga. Ɗləutsə ja, ga cha ɗa ka mbwar haɗə na'awa nji.>>
14 Ngə Efron tə wum nə Ibrahim, 15 <<Ngatə ɗa, tlakə ɗa, babal ngə kwa ɗa shekel 400 nə azurfa, kəl ja ya, mi ku pama ma? Ma'i ka ki haɗiya mala ngha.>>
16 Ngə Ibrahim tə dləukər na sə nda Efron tə na nda. Ngə cha dəkəbiya nyi azurfa shekel 400 nə Efron, wi sə nda cha na ku hima njir Hiti nda, məlməl na sə nda njir shafəli nə bəji nda kwa kya.
17 Aka ənga, babal Efron nda ku Makpela ləhə a dza Mamre, babal nda ana tləl nda, ana wu inda ku gəl babal nda, 18 tə ɗa ka nə Ibrahim a huɗə njir Hiti inda tə shili tangnda. 19 Ahir ənga, ngə Ibrahim tə haɗiya mala nyi Saratu ku tləl nda tə babal Makpela ləhə dza Mamre nda, nacha ngə Hebron, a tə hə'i Kan'ana. 20 Aka ənga, njir Hiti tə nə nyi babal nda, ana tləl nda, nə Ibrahim, ngə tə ɗa ka mbwar haɗə nə nyi na nji.