Nja Dzə Ibrahim
22
1 Ahir bəji kushiu, Hyel tə dzə jirikur Ibrahim. Hyel tə nga nyi, <<Ibrahim!>>Cha na, <<Kəma. Janə ya.>>
2 Ngə Hyel tə na, <<Hətə Ishaku zər nghə ngə kyatə zhang ngə ko nyida gagaɗə nga, ka ma'i ya tə hə'i Moriya. Ka yi handa təmachi nacha, chulkə hatəmachi nə nginda, a kyo zhang ku huɗa kəra mə nda yo char ngha.>>
3 Vanya zəkə tsəɗakə mbudla Ibrahim tə hya'atə ga mbatə sə tə ya kwara nyi, ga hətə mətlə ku huɗa mavi'i nyi ana zər nyi Ishaku. Cha gwatsə shilə'u ka hatəmachi chulkə nə nginda, ga gəzəya laku yatə mbwa nda Hyel tə nar nyi. 4 Pəshir hanyi makərkunyi na ma'i, tsə'u Ibrahim naɗəu cha la'a mbwa nda. 5 Ngə Ibrahim tə nar nyi nə mavi'i inda, <<Ngya ma ka kwara nə tangna. Naya ana zər na kwa ma'i biyama kushiu, eo yi həsəli hinda, ga ea ɓəl shili.>>
6 Kəl Ibrahim tə həkənyi shiləu hatəmachi nda nə Ishaku, ngə kərnyi tə gəzəya hu'u ana ngəhya. Ku sakanda ndo ma'i mətlə ta nda, 7 ngə Ishaku tə sha ya kəra Ibrahim ga na, <<Ada?>>
Ngə Ibrahim tə ɓəlakə nyi, <<Wai zər ɗa?>>
Ngə zər nda tə na, <<Janə ma na hu'u ba'a shiləu,>> <<Kəl ja, aman gam nə hatəmacha?>>
8 Ngə Ibrahim tə wuma ga na, <<Hyel təkərnyi kwa shili na gam ka hatəmachi zər ɗa.>> Ngə kya'a nda tə biyama na ma'i. 9 Manda nda ya tə mbwa nda Hyel tə nar nyi nda, Ibrahim tə hərtə dzəgana ga bərdlətə shiləu nda ti. Kəl ngə cha mbiya Ishaku zər nyi nda, ga pinda nyi kyatə shiləu nda tə dzəgana nda. 10 Ngə Ibrahim tə hətə ngəhya ka cha tsəya zər nyi nda ni, ka sər hatəmachi. 11 Kəl ja, chama Tlakə nda tə nga nyi səya kya huɗamələm, <<Ibrahim! Ibrahim!>>
Ngə Ibrahim tə wuma, <<Kəma, janə ya!>>
12 Ngə chama Hyel nda tə na, <<Ngwa ka da tsəkar zər ngə wa!>> <<Ngwa ka da fətənyi tyakəm wa, aka sakana a zəndətə ya ənda jiri, kwa ləvər kə Hyel. A da ka katə ɗa mada zər nghə nda kyatə zhang wa.>>
13 Kəl ngə Ibrahim tə har lya cha ga la'a gam ana tələma cha tə hakəu dzə ku gədləla, ngə cha yi səya gam nda ga handa təmachi chulkə nə nginda ni, təvira zər nyi nda. 14 Ngə Ibrahim tə fəndzənyi tləm nə mbwa nda, Tlakə kwa Shili ni. Ya ba'a ənya, tsə'u tanyi nja kwa na: <<Kyatə mə Tlakəu, nja kwa uya.>>
15 Kəl ngə chama Tlakə nda tə ɓəla nga Ibrahim səya kya huɗamələm səkəu, 16 ga na, <<Tlakə tə na, səmnda tə ya fəla na tləmər kərɗa aka ka nəu nya ya, a da ka katə ɗa mada zər nghə nda kyatə zhang wa, 17 jiri yo səkə nghə papa'akur. Yo yanda nyandəla ka nda a njo nau jigabiya wa, wi ngə tə sasəlga ki huɗamələm, ana mishishi'ua nya dəl. Nyandəla kə kwa kura dəhə mələm njir dawa kənda. 18 Aka ka nəu nya ya, dəhə njir dunəya kwa uya papa'akur təwa nyandəla ka.>>
19 Ngə Ibrahim tə ɓəl ya dza mavi'i nyi, nda ɓəl yi Biyersheba cha yi ngya hinda.
Nyandəla Nahor
20 Vanya bəji ngə nja nar nyi nə Ibrahim, <<Janə Milka yiyah nyi tə nguli shili nə zamə nghə Nahor. 21 Ja'inə nguli shili Nahor, Uz zər tangərma, Buz zamə nyi, Kemuel (adanya Aram), 22 ana Kesed, Hazo, Pildash, Jidlaf ana Betuel.>> 23 Betuel tsə'u tə yiyah Robeka, Milka tə yiyah nyi ngulisha'a chəsə nə Nahor zamə nya Ibrahim. 24 Vanya mala Nahor da ana tləm nyi Reyuma, tə yah Teba, Gaham, Tahash ana Ma'aka.