Yar Ishaku
21
1 Tlakə tə char nyi ɗanghali nə Saratu wi nda cha na, ga mərtə tang wi nda cha mərtə nyi alkawal. 2 Saratu tə hətə huɗə ga yiyah nyi zərsal nə Ibrahim a tə halhalkur nyi, səngə tə ɗa tang tə bəji nda Hyel tə mərtə nyi alkawal. 3 Ngə Ibrahim tə fəndzə nyi tləm Ishaku nə zər nda Saratu tə yiyah nda. 4 Ahir hanyi chisəu nda nja ya Ishaku, ngə Ibrahim tə tlanda nyi bədzang wi nda Hyel tə tsau nyi bar. 5 Fa Ibrahim 100 ma nja ya Ishaku.6 Ngə Saratu tə na, <<Hyel tə gwa'atə ya gyaɗi, ya kala ndə nda tə ngatə səna kwa gyaɗi tsa'a na ya. 7 Wa kwa nda nar nyi nə Ibrahim ənda Saratu kwa nda nənyi 'ua nə zəra? Dəhə ka ənga a yiyah nyi təya zərsal nə Ibrahim ku halhalkur nyi!>> 8 Ngə zər nda tə həa ngə nja katə nyi 'ua, pishinda nja katə nyi 'ua nə Ishaku, Ibrahim tə ɓatliya ladər dəgaləu.
Nja Gədlənda Hajara ana Isma'ila
9 Nda Saratu tə la'a zər nda Hajara kwa Masar tə yiyah nyi nə Ibrahim kwa tətəl na zər nyi Ishaku. 10 Ngə cha nar nyi nə Ibrahim, <<Gədlənda kwatəra nə tsa'a na zər nyi, aka a zər kwatəra do təkə sər fa'aki na zər ɗa Ishaku wa.>>
11 Huɗa Ibrahim tə tla gagaɗa aka Isma'ila ma'a zər nyi nga. 12 Kəl ja, Hyel tə nar nyi nə Ibrahim, <<Ngwa huɗa ka da tla təkəra zər nghə nga, ana kwatəra nghə ngə wa. Səhimi da kala Sənda Saratu tə nar ngha, aka təwa Ishaku ngə njo jiga nyandəla ka. 13 Ətsəu, yo mərtə zər kwatəra ngə ka jul nji, aka nacha ma'a nyandəla kə cha.>>
14 Ibrahim tə hya'atə kaɗə mbudla, cha hətə gwazhilakə ana pəla ɓiti, ngə cha nə nyi nə Hajara, cha tlətənyi tə wuləa cha. Ngə cha hətə zər nyi ga nə nyi, ngə cha səu nda ku laku. Cha təra gwa tə dadil takə Biyersheba, cha wi kəɓanghəu.
15 Manda ɓiti nda ku pəla nda tə wura, ngə cha pinda zər nda tə kiɗa vanya heli. 16 Ngə cha təra tanyi ga ki ngyata nyi naɗəu, aka cha na, <<A da yo nau ndzam nda zər ɗa ngə kwa tə wa.>> Nda cha ngyata nyi tangnda, ngə cha ghəya tiwi.
17 Ahir nga, Hyel tə ngatə tiwi zər nda, Ngə chama Hyel tə nga Hajara ki huɗaməlləm, ga nar nyi, <<Hajara, mi nga ɗa? Ngwa ka da ləvər wa, Hyel ngatə tə tiwi zər nga tangnda cha tə piya ti. 18 Hya'atə ka hətə zər nga a mar hatla aka yo mərtə nyi jul nji ɗanghəu.>>
19 Ngə Hyel tə mbəɗiya lya Hajara, ngə cha la'a ka'ur ɓiti. Ngə cha yi nyandə pəla ga nə nyi nə zər nda.
20 Zər nda tə həa ya Hyel tsa'a na cha. Cha ngya ku dadil takə nda, ga ɗa ka talalang. 21 Cha ngya tə Dadil Takə Paran, ngə ama nyi tə həbiya nyi mala vu Masar.
Ibrahim ana Abimelek tə Mər Alkawal
22 Aku bəji nda, Abimelek ana Fikol nda dəgal ləvaləva nyi tə nar nyi nə Ibrahim, <<Hyel tsa'a nakə ku dəhə sənda ko məra. 23 Sakana səmənda ɗa fəla a huɗə Hyel, ənda a da ko ngya ɓwaɓwa naya ndara nguli ɗa, ndara nyandəla ya wa. Kəl ja, ko mərtə ɗa mənakəkur wi nda ya mərtə nghə ku hə'i nda ka ngya mihiɓi kwa.>>
24 Ngə Ibrahim tə na, <<A səmənda tə ya fəla.>>
25 Kəl ngə Ibrahim tə huhuni nə Abimelek təkəra ka'ur ɓiti nda mavi'i Abimelek tə dləuya. 26 Ngə Abimelek tə na, <<A da ya zəndə ndə nda mər chulkə nəna sə wa. Aka a da ka nar ɗa wa, ənya nə ya dzəgwa ngatə chul nəna səu.>>
27 Kəl ngə Ibrahim tə fa'atə kətəng ana tla ga nə nyi nə Abimelek, ngə kya'a nda tə mər alkawal. 28 Ngə Ibrahim tə dzəɓəbiya nguli bal'ua kətəng məɗəfa ku chiɓi nyi. 29 Ngə Abimelek tə nar nyi nə Ibrahim, <<Mi sənda bal'ua kətəng məɗəfə inə ka dzəɓəbiya inə kwa chara?>>
30 Ngə Ibrahim tə na, <<Dləutsə bal'ua kətəng məɗəfə inə ku cha ya ga cha ɗa ka tauli ənda naya na la ka'ur ɓiti na.>>
31 Aka ənga nja nga mbwa nda Biyersheba, aka tangnda ngə nji mətlə inda tə səməfəla.