Ibrahim ana Abimelek
20
1 Ibrahim tə hya'atə vu Mamre ga təra dzəva tə hə'i Negev ga yi ngya ku pama Kadesh ana Shur. Ngə cha ngya nə bəji kushiu vu Gerar, 2 a hi nda, Ibrahim tə na səka mala nyi Saratu bəra, <<Kwamə ɗa nga.>> Ngə Abimelek təl Gerar tə sə nja shili na nyi Saratu.3 Kəl ja, Hyel tə shili da Abimelek ku shuni əvu'i ga nar nyi, <<Wi tətə nyi nə ka aka mala nə ka hə na, mala ɗəuɗəu na.>>
4 Manda Abimelek da ta ɓə na cha wa, aka ənga cha na, <<Tlakəu, ko kuɗənda jul nji kəla bikə ya? 5 A nacha ngə tə nar ɗa, <Kwamə ɗa ngə ma?> A nacha Saratu ngə tsə'u tə na, <Zamə ɗa ngə ma?> A ku mənakur na ta zhang ya mər sə na.>>
6 Ngə Hyel tə nar nyi ku shuni nda, <<Ah, a zəndə tə ya na ta zhang ngə ka məra, nacha gwa'atə ya ɓəlatə nghə tsa mərtə ɗa səpəla'a, nacha gwa'atə a da ya i ka tsəka nyi wa. 7 Sakan ja, ɓəladə nyi mala ndə nga, aka ndər mətakər nga, ya cho pətləkə nghə nya, ya ko ɗa na pi. Kəl ja, ma aka ɓəlandə nyi wa, ka zəndə təkəɗə ənda ko tah, naka ana dəhə sə nda nə ngha.>>
8 Tsəɗakə mbudla vanya zəkəu, Abimelek tə hya'atə ga tsəmtə dəhə njirawawa'a nyi ga nar nda dəhə sənda tə ɗa. Ngə ləvər tə səya nda gagaɗa. 9 Abiməlek tə nga Ibrahim, ga nar nyi, <<Mi nə ka mərtə ea? Mi bikə nda ya mərtə nghə nda tə gwa'atə ka shili na təmaci 'ual'ual təkəra ya ana təlkur ɗa? A da ka mər tə ɗa tsa'atsa'a wa.>> 10 Ngə Abimelek tə jau Ibrahim, <<Mi sə nda gwa'atə ka mər chulkə ngə na səa?>>
11 Ngə Ibrahim tə wum ga na, <<Ya mər ənga aka ya har ku jigadəma ɗa ənda, <A ləvər Hyel da ku mələm nə wa, ya njo tsəya ɗa təkəra mala ɗa.> 12 Matsa əngə ma'a, vəlvəl kwamə ɗa cha, Kwar ndər yah ɗa nga, madangə a da cha kwar ama ɗa wa. Ngə ya hə nyi ka mala ɗa. 13 Ku bəji nda Hyel tə təkəbiya ɗa na ki ada ɗa, ngə ya nar nyi, <Janə ənda ko char ɗa ənda kwa nyida ɗa ka, kala ba nda ma ma'i tə ka na səka ya ənda, <<Zamə ɗa cha.>> > >>
14 Kəl ngə Abimelek tə shili na kətəng ana tla, ba'a mavi'i kə'i kwatəra ga shili nə nyi nə Ibrahim, ga ɓəlandə nyi mala nyi Saratu. 15 Ngə Abimelek tə na, <<Janə hə'i ɗa dəhəu, ngya sə nghə tangnda ko i ti.>>
16 Cha nar nyi nə Saratu tsəu, <<Janə yo nə nyi Azurfa shekel 1,000 nə zamə ngha. Ga cha ɗa ka təkəɗər tauli nə nji inda hi kə'iri ana a mar nji dəhəu, ənda bikə nghə da wa.>>