Nja Zhazhinda Sodom ana Gomora
19
1 Ngə chama mətlə inda tə dzəva Sodom aba akəu, Lot tsə'u tə ngya cha biya nya mələm. Manda cha la'a nda, ngə cha hya'atə ga lali nda cha uzhə ana huɗəma cha səya hu'i ga hətə nda səli. 2 Kəl ngə Lot tə na, <<Kə'i tlakə ɗa, teti ma gu ki ɗa, hya chinda hya hi, məna hanyi ma tsəɗakə mbudla ga hya biyama na ma'i kə hi.>>Ngə nda wum ga na, <<A'a tə babal ta mələm eo ki hanyi.>>
3 Kəl ja, Lot tə mbabiyadzər gədi nda tsa'anyata, ngə nda gu ki nyi. Ngə cha batləya nda sərsuma, gwazhilakə kəla tləlam, ngə nda səma. 4 Təvi chama inda gwa piya, dəhə shili mələm Sodom, tlakala ana njirawawa'a, tə shili ɓandə ki Lot. 5 Ngə nda nga Lot ga na, <<Aman nji inda shili dakə vu'i nda? Zəbiya na nda, ka ea piya na nda.>>
6 Lot tə biya da nda ga haɗiya nyaki hi nyi, 7 ngə cha na, a'a, ka bazhi ɗa. Ngwa hya mər ngəna sə ɗimi wa. 8 Janə ma ku'ipəlakə ɗa tsa'a mətlə nda a da ta ɓəna sal wa, əngwa ya zəbiya na nda hya mər sə nda hyo i na nda. Hya ngyar nji'ina, aka mihiɓi ɗa ina, ya tuku yo ɓəlatə nda.
9 Ngə nda na, <<Təgwa ku laku kə ea, ndə na ndə shili shili na, ya janə cha ɗa tə ka ndər tla nəuma! Sakana eo mərtə nghə matsa ənda eo nda mərtə nyi nə nji ina.>> Nda biyama na iza Lot ga mbəlanda nyi ka nda huɓəbiya nyaki.
10 Kəl ja, mihiɓi inda tə ha chanda, ga təɗu Lot gu ki, ngə nda haɗiya nyaki. 11 Ngə nda wulfənda nji'inda biya nya nyaki nda, tlakala ana njirawawa'a, tə ɗa a da nda uya nyaki nda wa.
Lot tə Ngyar Sodom
12 Chama mətlə inda tə nar nyi nə Lot, <<Vanya ndə da tsakə tangnə səkə ya, ndara səlkə ngha, ndara nguli shili ngha, ndara ku'imahi'i ngha, ndara vanya nənghə na ndə ku mələm nə ya? Fa'abiya nda ku mələm na, 13 aka eo zhazhinda mbwa na. Aka tiwi nda təkəra mələm na 'ual'ualə huɗə Tlakəu, ngə Tlakə tə sə ea ka ea shili zhazhinda mələm na.>>
14 Kəl ngə Lot tə biya ga ndər na ka sələkə nyi, inda tə zhiya ku'i nyi ka mahi'i kənda. Cha na, <<Kusa ma hya ngyar mbwa na, aka Tlakə kwa gwa'a zhazhinda mələm na!>> Kəl ja, sələkə nyi inda tə har ənda waba nda cho ɓəla.
15 Nda kaɗə vu'i wura, ngə chama inda tə nar nyi nə Lot, <<Kusa! Hətə mala ngha ana ku'i nghə inda mətlə tangnə ina, əngə wa njo zhazhinda hi, aka səpəla'a njir mələm na.>>
16 Manda cha ɗa ɓəshɓəshiu, ngə nji inda tə gəziya cha cha ana cha mala nyi ana nə ku'i inda mətlə inda ga ləbiya nda biya ku mələm nda, aka Tlakə tə ngatə təhuɗə kənda. 17 Ɗəɗəu tanyi nda nda fa'abiya nda ku mələm nda, ngə zhang ku huɗa nda tə na, <<Hwi ma na pya hi! Ngwa hya da ndzam ya hi wa, ngwa hya da ta'i ku dakə ngə wa! Hwi ma gya tə dəgəl inga, əngə wa hyo kuɗa!>>
18 Kəl ja, ngə Lot tə nar nda, <<A'a kə'i tlakə ɗa, maki! 19 Mana mava ngha uya tə kwambiyakur tə lya ka, ka char ɗa mənakəkur, ka mbəɗandə pya ya. Kəl ja, a da yo nau hwi gya tə dəgəl ingə wa, aka təmachi nə kwa uya ɗa, ya yo tah. 20 Ndzama wula mələm ləhə nda yo nau hwi ya kwa, ya kushiu, əngwa ya hwi ta ɗa yi nda, mələm ngə kushi gagaɗa, aa amana? Ya pya ya kwa mbəɗa.>>
21 Ngə cha nar nyi, <<Tsatsa'a ngan ja, a dləukər təya ngə ma'a, a da yo zhazhinda mələm ngə wa. 22 Kusa hwi yi nda ja! Aka a da yo nau mər madami wa, kəl ka həya mbwa nga.>> Nacha gwa'atə nja nga mələm nda Zoar.
23 Ku bəji nda Lot tə həya Zoar, pəchi zədə ti. 24 Təma ngə Tlakə tə pəkə nyi hu'u ibir lyang nda kwa gəɗə təkəra Sodom ana Gomorah. 25 Cha zhazhinda nda, ana alenya mələm inda ku pama dakə inda, nja kuɗənda nji ana kala sə tsətsa. 26 Kəl ja, mala Lot tə sha biya hi ga ndzama, ngə cha ɗa ka dzəuwa wuna.
27 Kaɗə mbudla vanya zəkəu, Ibrahim tə hya'atə ga ɓəl yatə mbwa nda cha ta'i mar Tlakə tə nda. 28 Cha ndzamar təwa Sodom ana Gomarra, ana dəhə hə'i dakə nda, ngə cha la'a ear ndalndal kwa hya'atə ku hə'i nda, wi ngə tə takə kwa ngia.
29 Manda Hyel tə zhazhinda mələm dakə inda, ngə cha ɗənghatə na Ibrahim, ga həbiya Lot tsa kuɗa.
Təkədər Njir Moab ana Njir Amon
30 Lot kə'i ku'i nyi mətlə inda tə ngyar Zoar ga ngya tə dəgəl inda aka cho ləvər ngya vu Zoar. Nacha ana ku'i nyi tə ngya ku tləl. 31 Vanya pəchi ngə kwa'alə nda tə nar nyi nə kwa kushi nda, <<Adan ma hal ti, ya a ndə da kwa piya na ma wi sənda njir dunəya tə tsəl na mər wa. 32 Anda, ma mərtə adan ma cha sa ɓitir anapə cha wi, tsa'aka mo piya na cha, tsa nyandəla adan ma da sa.>>
33 Əvu'i nda ngə nda mərtə adan nda cha sa ɓitir anapəu ga wi, ngə kwa'alə nyi nda tə gwa piya na cha, kəl ja, a da cha zəndə ənda cha piya na cha ndara hya'atə nyi wa.
34 Vanya zəkəu, kwa'alə nyi nda tə nar nyi nə kwa kushi nda, <<Naya, a gwa təya piya na ada ku vu'i nə məna biya kwa na, ənya tsəu, nakə ngo gwa piya na cha, tsa nyandəla cha da sa.>> 35 Əngə tsə'u nda mərtə cha wi na ɓitir anapəu, ngə kwa kushi nda tə gwa piya na cha. Kəl ja, a da cha zəndə ənda cha piya na cha ndara hya'atə nyi wa.