Mihiɓi Makərəu
18
1 Tlakə tə chabiya kərnyi nə Ibrahim ləhə dzər wu wawa'a nə Mamre, ku bəji nda cha tə ngya a nya madləɓa əpuchi. 2 Ibrahim tə har lya cha cha la'a nji makər tə ta'i ləhə a dzə nyi. Manda cha la'a nda, ngə cha kusa hya'atə nya madləɓa nyi nda ka cha ɓə ka nda. Ngə cha uzhi səya hu'i.3 Təma ngə cha na, <<Maki Tlakəu, macha a uyatə ya kwambiyakur tə lya ka, ngwa ka da təranda ki mava nghə wa. 4 Əngwa nja shili na hi ɓiti hya chinda hya hi, hya ɓəliyasar tə kiɗa wua na, 5 əngwa ya ya ki shili na hi sərsuma, ka hya pibiya həɗa hya biyama na ma'i, manə shili tə hi da mava kəhi.>>
Ngə nda na, <<Yawa! Mər wi ngə ka na nga.>>
6 Kəl ngə Ibrahim tə kusa gwa da Saratu ku madləɓa ga na, <<Ka tatsə upwa zhəzhə kətas makər kuskusu, ka zukutə, ka mərtə waina.>>
7 Ngə Ibrahim tə hwi gu dangal, ga gwa səya mbugul mənakəu, ga nə nyi nə mava nyi, cha ɓatliya kuskusəu. 8 Ngə cha hətə 'ua shishi nyi ana ɓitiɓiti nyi, ana kumur tla nda nja ɓatliya nda, ga fiya huɗən nda. Nda ndo səm sərsum nda, ngə cha ta'ita nyi ləhə dzən nda a da kiɗa wua.
9 Ngə nda nar nyi, <<A manə Saratu mala ngha?>>
Cha na, <<Ku madləɓa cha.>>
10 Ngə Tlakə tə na, <<Mərtə nghə təya alkawal, ya kwa bəl shili da ka sakanə pəta, ya mala nghə Saratu kwa yiyah zərsal.>>
Saratu tsə'u biya hin nda ku nyavi madləɓa cho səhimi da nda. 11 Kəl ja, Ibrahim ana Saratu halti, ya a tsə'u Saratu da kwa la'a hyali wa. 12 Kəl ngə Saratu tə gyaɗi ku dufwa cha, cha na, <<Ahir hal təya, sal ɗa tsə'u halti, ea kwa uya nəna mənakura?>>
13 Tlakə tə nar nyi nə Ibrahim, <<Mya gwa'atə Saratu kwa gyaɗi ga na, <Vəlvəl yo nau yiyah zər, ya a wurtə ya hal ya?> 14 Sə da kwa ndəɗə dunamar Tlakə ya? A tə bəji tsa'atsa'a sakanə pəta yo ɓəl shili da ka, ya Saratu kwa yiyah zərsal.>>
15 Kəl ngə Saratu tə kəpala, cha na, <<A ya gyaɗi wa,>> Aka ləvər tə siya nyi. Ngə cha na, <<Ah a gyaɗi tə ka.>>
Ibrahim tə Gədi ka Sodom
16 Ngə nji'inda tə hya'atə ga nəu təwa Sodom, ngə Ibrahim tə ləbiya nda ga səu nda ku laku. 17 Ngə Tlakə tə na, <<Kwa ɗəwanda ya sə inda ya kwa gwa'a mər tsa Ibrahim ya? 18 Ya janə nyandəla Ibrahim kwa ɗa ka hə'i dəgal ana nda na gyalkur, dəhə hə'i dunəya kwa uya papa'akur təwa nyi. 19 Aka a tabiya nyi təya, aka cha chabiya nyi nə nguli nyi ana njir ki nyi indo shili hi nyi nda nəubiya lakur Tlakə təwa mər sə inda tsatsa'a ya məlmələu, tsa'aka ga Tlakə shili na nyi sə nda cha mərtə nyi alkawal nə Ibrahim.>>
20 Kəl ngə Tlakə tə na, <<Mangə tiwi təkəra Sodom ana Gomora ɗatə 'ualə'ualəu, ya səpəla'a kənda ɗa tə ɗimiɗimi gagaɗa, 21 yo səya la'a ya gwa'abiya ndara tiwi na zədə daya nə vəlvələu.>>
22 Kəl ngə nji'inda tə sha ga təra yi Sodom, kəl ja, Tlakə tə ngya tsa'a na Ibrahim. 23 Ngə Ibrahim tə dardzə shili dzə nyi ga na, <<Əja ya, ko kuɗənda nji ɗimi ana nji tsatsa'a ya? 24 Aman ma nja uya nji tsatsa'a təfukumənyi ku mələm na? Vəlvəl ko kuɗənda nda zəma, aa ko ngyar aka nji tsatsa'a təfukumənyi inga? 25 A da ko kina mər əngə wa, abəra ka mərtə tsa'atsa'akur məlməl na ɗimikur! A da ɗa ko kina mər əngə wa! Ndər tla nəuma nə dəhə dunəya da kwa mər tsa'atsa'akur ma?>>
26 Ngə Tlakə tə na, <<Ma ya uya nji tsatsa'a təfukumənyi vu Sodom, yo far bikən nda aka nda.>>
27 Ibrahim tə na, <<Janə ya fəu tə kərɗa ka ya ɓwanya na Tlakəu, naya nda sə da ya kar wa, kəl ja, bərbər ana pətsəɗəu ya. 28 Aman ma dangkura nji tsatsa'a tə tutə na tufwa ku tufukumənya? Ko kuɗənda mələm nga aka nja tar nji tufə ya?>>
Ngə cha na <<Ma ya uya nji fwaɗəkumənyi parnya tufəu, a da yo kuɗənda mələm ngə wa.>>
29 Ngə Ibrahim tə ɓəla na, <<Ma nja uya nji fwaɗəkumənyi tsə'u amana?>>
Ngə cha wuma, <<aka nji fwaɗəkumənyi a da yo mər wa.>>
30 Ngə cha na, <<Ngwa huɗa Tlakə da tla wa, yo ɓwanya. Ma nja uya makərkumənyi tanyi tsə'u ya amana?>>
Ngə cha na, <<A da yo kuɗənda nda ma ya uya nji makərkumənyi ku mələm ngə wa.>>
31 Cha na, jan ya həkənyi tə nə kərɗa ɓwanya na Tlakəu, <<Ma tə ɗa ka uya mətləkumənyi tsə'u ya amana?>>
Ngə cha wum ga na, <<Aka nji mətləkumənyi nga a da yo kuɗənda nda wa.>>
32 Ngə Ibrahim tə na, <<Ngwa huɗa Tlakə da tla wa, ngwa ya ɓwanya zhang tan nyi. Macha njo uya nji kumə tsə'u ya amana?>>
Ngə cha wum ga na, <<Aka nji kumə nga a da yo kuɗənda nda wa.>>
33 Kəl ngə Tlakə tə təratanyi, nda cha wurandə ɓwanya na Ibrahim. Ngə Ibrahim tə təra gu ki.