Alkawal nə tla Bədzang
17
1 Ku nda Abram tə fa 99, ngə Tlakə tə shili da cha ga nar nyi, <<Naya ngə <Hyel Ndər Gyalkur.> Ma'i tsa'a naya, ka ngya ka ndə kəla bikəu. 2 Yo nyabiya mbandər nda ku pama ma na ka, yo mərtə nyandəla kə ɗang gagaɗa.>>3 Ngə Abram tə uzhi, huɗəma cha səya hu'i. Ngə Hyel tə nar nyi, 4 <<Janə mbandər ɗa na ka, Yo mərtə nghə ka jivalnya jul nji ɗanghəu! 5 Ətsəu, a tsə'u njo nga nghə Abram wa, a təvira ənga, njo nga nghə Ibrahim, aka ko ɗa ka jivalnya jul nji ɗanghəu. 6 Yo mərtə ko yatəkər gagaɗa. Ko ɗa ka jul nji ɗanghəu, ya njo uya təl i'i ɗang ku huɗa nda! 7 Yo gəzətə mbandər ɗa nda ku pama ma ana nyandəla kə nda kwa shili hi nghə ba'anawa, mada a tsə'u kə wa, yo ɗa ka Hyel ngha ana Hyel nə nyandəla ka a hi ngha. 8 Yo nə nghə dəhə hə'i Kan'ana, mbwa nə kə na ngya tə wi ndə shilishili na, yo nə ngha ana nyandəla ka. Cho ɗa ka nə kəhi hi ba'anawa, ya yo ɗa ka Hyel kənda.>>
9 Kəl ngə Hyel tə nar nyi nə Ibrahim, <<Nakə nə ngha, tuku ka ɓəlatə mbandər ɗa, nakə ana nyandəla ka nda kwa shili hi ngha. 10 Janə chul mbandər nda tuku naka ana nyandəla ka kwa ɓəlati, Tuku kala zərsal nda ku pama hi nja tlanda nyi bədzang. 11 Tuku hya tlanda chichir zhumbulum kəhi ga cha char mbandər nda ku pama mən kə'i hi. 12 Ghəya sakana dəhə zərsal nda nja yah ku pama hi, pəshir chisəkunya hanyi njo tlanda nyi bədzang nə dəhə nyandəla hi, ndara yahyah nyi, ndara ɗəlɗəl nyi ndara məhiɓi nda ku pama hi. 13 Ndara yahyah nyi nə ki ngha, ndara nda nja dəlbiya, tuku nja tlanda nda bədzang. Təwa ənga, Mbandər ɗa kwa ngya tə kumər dza hi, nacha ngə mbandər nda ba'anawa. 14 Dəhə zərsal nda pa'a tə tla bədzang, ndə nda pa'a nja tlanda nyi zhumbulum, nji həbiya nyi ku pama nji nyi, aka a da cha ɓəlatə mbandər ɗa wa.>>
15 Kəl Hyel tə nar nyi nə Ibrahim, <<Təkəra mala ngha, saraya, a tsə'u tləm nyi do ɗa Saraya wa. Ghəya sakana ana a biyama tləm nyi kwa ɗa ka Saratu. 16 Yo səkə nyi papa'akur nə Saratu, yo nə nghə zərsal təwa nyi. Yo səkə nyi papa'akur ga cha ɗa ka amanya jul nji ɗanghəu. Təl nə hə'i ɗang kwa biya ku nyandəla cha.>>
17 Ngə Ibrahim tə uzhi huɗəma cha səya hu'i, ngə cha gyaɗi ga nar nyi nə kərnyi, <<Təwa bar yo uya zər ya janə fa ɗa 100 wa? Ya təwa bar Saratu kwa uya zər ahir fa nyi ɗatə dləkumnya?>> 18 Kəl ngə Ibrahim tə nar nyi nə Hyel, <<Mya gwa'atə a da ko ngyar Isma'ila cha ɗa ka ndər fa'a ki ɗa wa?>>
19 Ngə Hyel tə ɓəlakə nyi, <<A'a, mala nghə Saratu kwa yiyah nghə zərsal, ko fəndzə nyi tləm Ishaku. Yo nyabiya mbandər ɗa təwa nyi, ya cho ngya ka mbandər nda ba'anawa aka nyandəla cha nda kwa shili a hi nyi. 20 Isma'ila tsəu, yo səkə nyi papa'akur wi ngə ka gədi nga. Yo mərtə cho yatəkər, yo mərtə nyi cho ɗa jul nji ɗanghəu. Cho ɗa ka adanya təl kwabəmətləu, yo mərtə nyi cho ɗa ka jul nji dəgaləu. 21 Kəl ja, ana Ishaku ngə yo gəzətə mbandər ɗa, nda Saratu kwa yiyah ngha sakanə pəta.>> 22 Nda Hyel tə wurandə ɓwanya na Ibrahim, ngə cha təra ga ngyar Ibrahim.
23 Ngə Ibrahim tə hətə Isma'ila zər nyi, ana dəhə mavi'i nyi, yahyah nyi ana dəhə nji ɗəlɗəlnyi na kwaba, ngə cha tlanda nda bədzang dəhə nda pəshi nda wi nda Hyel tə na. 24 Fa Ibrahim dləkumnyi parnya dla ma nja tlada nyi bədzang. 25 Isma'ila zər Ibrahim tsə'u fa nyi kwabəmakər ma nja tlada nyi bədzang. 26 Nja tlanda nyi bədzang nə Ibrahim ana zər nyi Isma'ila pəchi zhang. 27 Ya kala shili inda ku ki Ibrahim, dəhə inda nja yiyah ku ki nyi, ndara nja dəlbiya tsa nji shilishili, nja tlanda nda bədzang kə'i cha.