Hajaratu ana Isma'ila
16
1 Saraya mala Abram da yiyah nyi ngulisha'a wa. Kəl ja, kwatəra da tsa Saraya kwa Masar ana tləm nyi Hajaratu. 2 Ngə Saraya tə nar nyi nə Abram, <<Tlakə katə ɗa tə tsa uya ngulisha'a. Ma'i ka gwa piya na kwatəra ɗa nga. Kwa nau ɗa yo uya ngulisha'a təwa nyi.>>Ngə Abram tə dləukəri na sənda Saraya tə na. 3 Ahir Abram tə mərtə fa kuma na ngya tə hə'i Kan'ana, kəl ngə Saraya mala Abram tə hətə Hajaratu kwatəra kwa Masar nda, ga nənyi nə Abram ka mala nyi. 4 Abram tə piya na Hajaratu, ngə cha həti huɗəu.
Manda cha la'a hətə tə cha huɗə ngə cha ghəya həyati Saraya. 5 Kəl ngə Saraya tə nar nyi nə Abram, <<Nakə na fəu ɗa ku ɓwaɓwatə nə ya kwa na. Ya nə nghə kwatəra ɗa ka cha ɗa ka mala ngha, nda cha la'a hətə cha huɗəu, ngə cha ghəya həyatə ya. Kəl ga Tlakə go pama ma na ka.>>
6 Kəl ja, Abram tə nar nyi nə Saraya, <<Jan ngə kwatəra nghə ku cha ka, mər sənda ko i na cha.>> Kəl Saraya tə ghəya ɗa məndzau na Hajaratu, ngə cha hwi tanyi tsa Saraya.
7 Chama Tlakə tə həya Hajaratu dzər tsədzəɗə ɓiti tə dadil takəu, nda tə lakur yi Shur. 8 Ngə cha na, <<Hajaratu, kwatəra Saraya, hya'atə man ka, ya abar na ka?>>
Ngə Hajaratu tə na, <<Hwi nə yo hwi tsa kwatam Saraya.>>
9 Nge Chama Tlakə nda tə narnyi, <<Ɓəl ya da Saraya, yo kwatərakur ngha.>> 10 Chama nda tsə'u tə nar nyi, <<Yo mərtə nyandəla kə ɗanghəu, nda a da njo nau jigabiya wa.>>
11 Ngə Chama Tlakə nda tə na,
<<Janə huɗə ku ta ka,
ko yiyah zərsal.
Ko fəndzə nyi tləm Isma'ila,
aka Tlakə ngatə tə ɓwaɓwatə ngha.
12 Aka cho ɗa ndə nda na dufwa cha wi nə kwara takəu,
cha kwa mər dawa na dəhə nji,
ya dəhə nji tsə'u kwa mər dawa na cha.
A ngya mənakə do ɗa
ku pama nda ka zamə nyi wa.>>
13 Ngə cha nga tləmər Tlakə nda tə ndər na cha nda ga na, <<Nakə Hyel ka, nda kwa la'a ɗa.>> Aka cha na, <<A la'a tə! ya Hyel nda kwa la'a ɗa.>> 14 Nacha gwa'atə nja nga ka'ur ɓiti nda Biya Lahai Roi, tsəutanyi tangnda ba'a ənya, ku pama Kadesh ana Bered.