Alkawal Hyel ana Abram
15
1 Ahir nga, Tlakə tə ndər nə Abram ku shi'uni puchi ga na,<<Abram ngwa ka da ləvər wa,
aka naya ngə ləgə ngha,
ya wazəba nghə kwa ɗa 'ualəu.>>
2 Kəl ngə Abram tə ɓəlakə nyi, <<Hyel Tlakəu, mi sənda ko na'a, ya a mada zər da tsa ya wa? Ya ndə nda kwa fa'aki ɗa nacha ngə Eliezer ndər Dimaska? 3 Da ka na'a ngulisha'a wa, aka ənga mava ɗa nda nja yah ku ki ɗa ngə kwa ɗa ka ndər fa'aki ɗa.>>
4 Kəl ngə Tlakə tə nar nyi, <<Abada, mava nghə da kwa ɗa ka ndər fa'aki nghə wa, aka ko uya zər kərngha ndo ɗa ka ndər fa'aki ngha.>> 5 Ngə Tlakə tə təra na Abram biya ga nar nyi, <<Ndzamar shi huɗamələm ka jigabiya sasəlga inga macha kwa nau ka. Əngə ɗangkura nyandəla kə kwa ɗa!>>
6 Əngə Abram tə dləukəri na Tlakəu, ngə Tlakə tə jiga nyi ka ndə tsatsa'a aka jirikur nyi.
7 Tlakə tə nar nyi, <<Nənnə ngə Tlakə nda tə həbiya nghə vu Ur hə'i njir Kaldi, ka ya nə ngə hə'i na ka sər fa'aki.>>
8 Kəl ngə Abram tə na, <<Hyel Tlakə ɗa, aman yo ɗana zəndə ənda hə'i ngə kwa ɗa ka na'a?>>
9 Kəl ngə Tlakə tə nar nyi, <<Shili na ɗa mbugul fa makər, kua fa makər ana gam fa makərəu, ana mbaavi ana zər mbətla masar.>>
10 Ngə Abram tə shili na sə'ingə nə Tlakə dəhəu, ngə cha tətəkəu tatsəməta ga bərdliya nda, təwa chisəm ana təwa matsal, kəl nda eak inda nənyi a da cha tətəkəu tatsəməta wa. 11 Kəl eak inda kwa tsaku chaɗəngu tə səya ka tsakwa, ngə Abram tə gədlənda nda.
12 Nda pəchi kwa siyar gwa təɗa ngə hanyi tə hənda Abram 'ual'ualəu, kəl jan kutlə ɗimiɗimi nda kwa ləvər nda ndəu, tə haɗiya nyi. 13 Tlakə tə nar nyi nə Abram, <<Ka zəndə nyandəla ka kwa ki mər mihiɓikur tə hə'i nda pa'a nəkənda, ndo mər mavakur, njo ɗa məndzau na nda fa 400. 14 Kəl ja, yo tlandanyi nəuma nə njir hə'i nda, ahir nga ndo biya ku hə'i nda na gəna 'ualəu. 15 Nakə tsəu, ana halhalkur mənakə ana piyardufu ko təra yada jival ngha, njo haɗəya ngha. 16 Ahir fa 400, nyandəla ka kwa ɓəl shili tangna, aka səpəla'a njir Amori da taa nyabiyadzə wa.>>
17 Nda pəchi tə təɗa ngə kutla tə ɗa, kəl jan təm hu'u na ear ana kyara hu'u tə chabiyadza, tə təkəbiya pama kumər sərshishi inda nja bərdliya təwa matsal na chisəm inda. 18 Pəshinda ngə Tlakə tə mbandər na Abram, ga na, <<A nə nyandəla ka yo nə nda hə'i na, fwatə nya dəl Masar tsa'a kwa nya dəl dəgal nə Yufiratis, 19 hə'i njir Keni, ana njir Kenizi, ana njir Kadamon, 20 njir Hiti, njir Perizi, ana njir Refa, 21 ana njir Amori, ana njir Kan'ana, ana njir Giragash, ana tsə'u njir Jebusi.>>