Abram tə Mbəɗandə Lot
14
1 Ku bəjir təlkur Amrafel təl Shinar, nanda na Ariyok təl Ellasar, ana Kedarlayomer təl Elam, ana Tidal təl Goyim, 2 nda biya ki dla'a Bera təl Sodom, Birsha təl Gomorra, ana Shinab təl Adma, ana Shemeber təl Zeboyim, ana tsə'u təl Bela, nda njo nga Zoar. 3 Dəhə təl ingə tə daɓətə kər ka ləvaləva ku dakə Sidim, nda njo nga Fa'a Wuna. 4 Aka fa kwaɓəmətləu nda ngya da kiɗa təl Kedarlayomer nda, kəl ja, ku kwaɓumakərkunyi nda tləya mwali.5 Ku fa kwaɓufwaɗəkunya fa, Kedarlayomer ana alenya təl inda tə daɓtəkər ngə nda panda njir Refat a vu Ashterot Karnayim, ana Zuzit ku Ham, ana njir Ema ku Shaveh Kiriyatayim 6 ana tsə'u njir Hor tə dəgəl Seyir, fwatə vu El Paran ləhə dza dadil takəu. 7 Kəl ngə nda sha ga təra dzəva En Mishpat, nda njo nga Kadesh, nda kwas hə'i njir Amalek ana ma'a hə'i njir Amori inda na ngya vu Hazazon Tamar.
8 Kəl ngə Təl Sodom, ana Təl Gomorra, ana Təl Adma ana Təl Zeboyim, ana Təl Bela, nda njo nga Zoar, nda biya ga tiyadzə ka pah ku dakə Sidim. 9 Nda pa ka Kedarlayomer Təl Elam, ana Tidal Təl Goyim, ana Amrafel Təl Shinar, ana Ariyok Təl Elasar, təl tufə təkəra təl fwaɗəu. 10 Aku bəji nda ka'u kwalta da ɗang ku dakə Sidim, manda təl Sodom ana Gomorra tə hwi, alenya nji tə pəpə go ka'u inda, Alenya nji tə hwi gyo məa. 11 Təl fwaɗə inda tə fa'aya dəhə kari ana sərsum njir Sodom ana Gomorra, ga təra ta nda. 12 Ətsəu nda təra na Lot Zər zamənya Abram, nda na ngya vu Sodom, ana dəhə sənyi.
13 Vanya ndə nda tə mbəɗə tə shili nar nyi nə Abram ndər Ibrani. Aku bəji nda Abram ləhə cha na ngya dza kubu Mamre ndər Amor. Mamre tsə'u zamənya Eshkol ana Aner, nda njir mbanya na Abram ka pa. 14 Manda Abram tə ngatə səya tə nji zər zamə nyi ka mava, ngə cha ɗəmətsə nji inda nja dlədləɓətə nda pa 318 inda nja yah ku ki nyi, nda gədlə nda tsa'a ku mələm Dan. 15 Əvu'i nda Abram tə təkəbiya nji nyi ka pah nda, nda gədlə nda tsa'a vu Hoba, nda tewa vwa nə Dimaska. 16 Cha dləuya dəhə kar ga ɓəl na zər zamə nyi Lot shili ana gəna nyi, dəhə ka mahi'i ana alenya nji.
Malkizedek tə Səkənyi Papa'akur nə Abram
17 Ahir Abram tə ɓəl shili nda cha kwasə təl Kedarlayomer ana alenya təl inda kə'i cha, ku Dakə Shawe, nda njo nga Dakə Təl.
18 Kəl Malkizedek Təl Salem, nacha ngə Urushalima, tə shili na nyi gwashilakə ana ɓitir anapəu. Na cha fərist cha nə Hyel Ndər Gyalkur. 19 Ngə cha səkənyi papa'akur nə Abram, cha na,
<<Nacha nda tə batlə huɗamələm ana hə'i,
Hyel Ndər Gyalkur cha səkə nyi papa'akur nə Abram.
20 Ətsəu, fal ngyatə nə Hyel Ndər Gyalkur
nda tə gwa'atə ka kura njir dawa ngha.>>
Təma Abram tə nə nyi zhang ku kuma nə dəhə sə inda cha fa'aya.
21 Ngə Təl Sodom tə nar nyi nə Abram, <<Na'a dəhə nji ɗa ka fiya dəhə sə inda ka fa'aya ka kərngha.>>
22 Ngə Abram tə nar nyi nə Təl Sodom, <<A wurtəya səmnda fəla nə Hyel Tlakə Ndər Gyalkur, Ndər ɓatlə huɗamələm ana hə'i, 23 abəra a da yo dləu kala sənda nənghə wa, ndara bratsən ndara sər mba ɓiɓi nghə wa, tsa ka da na, <Ya mərtə Abram ka ndər gəna.> 24 Sə da yo dləu wa, kəl nda sə nda ləvaləva ɗa tə səmənya, ana sə nda ɗa ka mbaɗə kənda, nji inda ma'i kaya yi Aner, ana Eshkol, ana Mamre. Nja nə nda mbaɗə kənda.>>