Abram ana Lot tə Təka
13
1 Aka ənga Abram tə hya'atə vu Masar ga təra dzəva Nəgəv, nacha ana mala nyi ana dəhəkura sə nda tsa cha, Lot tsə'u tə təra kə'i cha. 2 Abram tə ɗa na ngəna 'ual'ualə ku sərshishi ana azurfa ana bəjingha.3 Ngə cha biyama na ma'i hya'atə vu Nəgəv ka mbwa ka mbwa tsa'a hi Bətel, tə mbwa nda cha latə madləɓa ti, ku pama Betel ana Ai 4 ana mbwa nda cha hərtə dzəgana tə tangərma nda. Tangnda Abram tə nga tləmər Tlakəu.
5 Lot nda kwa ma'i tsa'a na Abram tsəu, biri i'i nə kətəng ana nə kua, tla, ana madləɓa i'i da tsa cha. 6 Kəl ja, hə'i nda da nji Abram ana Lot kya'a nda wa, aka sərshishi kənda ɗatə dang gagaɗa, ya a tsə'u nda kwa nau ngya tə mbwar zhang wa. 7 Kəl ngə njir ɓəla sərshishi Abram ana njir ɓəla sərshishi Lot tə ghəya guhi. Aku bəji nda, njir Kan'ana ana njir Periz ngə na ngya ku hə'i nda.
8 Aka ənga Abram tə nar nyi nə Lot, <<Ngwa ma da i guhi go pama ma ndara njir ɓəla sərshishi kəma wa. Aka njikə njikə ma lələhəu! 9 Janə dəhə hə'i nə mangha, tabiya kala ba nda ko i ma təkəbiyadza. Macha ko i təwa matsal, kəl ba'a ya hətə chisəm. Ma cha chisəm ka ndiya i tsəu, ba'a ya hətə matsal.>>
10 Lot tə har lya cha ga la'a dakə Urdun, a yi təwa Zoar. Dəhə ba hə'i nda na ɓiti mada təwabari, wi nda tə fa Tlakəu, ma əngə wa wi hə'i Masar. (Səngə tə ɗa təvi Tlakə zhazhinda Sodom ana Gomora). 11 Ngə Lot tə tabiya nyi nə kərnyi dəhə ba hə'i dakə Urdun. Ga ma'i tanyi gwa təwa zədərpəchi, ngə nda təkəbiya dzə na Abram zamanya ada nyi. 12 Kəl ngə Abram tə ngyata nyi ku hə'i Kan'ana, ngə Lot tə ɗəu na madləɓa nyi yo mələm inda ku dakəu, ləhə dzər mələm Sodom. 13 Kəl ja, njir Sodom paha nya ta nda, wa'atanyi kəl səpəla'a nda kwa mər nə Tlakə gagaɗa.
14 Ahir nda Lot tə təra, ngə Tlakə tə nar nyi nə Abram, <<Har lya ka tang ngə kə tə nga, ka ndzamar dəhə ba mbwa nda ko nau la'a mada təwabari, vwa ana holma, zədərpəchi ana təɗərpəchi. 15 Dəhə ba hə'i nda ka la'a yo nə ngha ana nyandəla ka ba'anawa. 16 Ya yo mərtə nyandəla ka kwa ɗa ɗanghəu, wi ngə tə bərbər nə dunəya, nda a da njo nau jigabiya wa! 17 Hya'atə ka zhulitə hə'i nga mada təwabari, aka yo nə ngha.>>
18 Kəl ngə Abram tə ɗəu na madləɓa nyi yi Hebron ga ngya ləhə dzər wu wawa'a nə Mamre, a hinda cha ɓəla hərtə nyi vanya dzəgana nə Tlakəu.