Hyel tə Nga Abram
12
1 Ngə Tlakə tə nar nyi nə Abram, <<Ngyar hə'i ngha, njikə hi, ana njir ki ada ngha, ka ma'i yatə hə'i nda yo char ngha.2 Yo mərtə nyandəla ka, ka hə'i dəgaləu.
Yo səkə nghə papa'akur,
yo mərtə tləm nghə cha ɗa ba'amani,
ya təwa ngha nji kwa uya papa'akur.
3 Yo səkə nyi papa'akur nə nji'inda tə səkə nghə papa'akur,
yo shu'unda nji'inda tə shu'unda ngha.
Dəhə njir dunəya
kwa uya papa'akur təwa ngha.>>
4 Kəl ngə Abram tə ngyar Haran wi nda Tlakə tə nar nyi, ngə nda təra na Lot. Fa Abram 75 macha ngyar Haran. 5 Cha təra na mala nyi, Saraya, ana zər zamə nyi Lot, ana dəhə gəna nyi, ka sərshishi nyi ana dəhə nji'inda na ngya ku ki nyi vu Haran, ga gəzəya lakur yi Kan'ana. Manda nda yi Kan'ana,
6 Abram tə zhulitə hə'i nda tsa'a yi dza wur tumwa nə More hi Shekem. Aku bəji nda njir Kan'ana ngə na ngya tangnda. 7 Kəl ngə Tlakə tə chabiya nyi dzə nə Abram ga na, <<Yo nənyi hə'i na nə nyandəla ka.>> Kəl ngə Abram tə hərtə dzəgana tangnda nə Tlakəu, nda tə chabiya nyi dza.
8 Ngə cha hya'atə tangnda ga təra yi təwa dəgəl nda təwa zəɗərpəchi Betel, ga liya madləɓa nyi təwa təɗərpəchi nə Betel ana Ai təwa zədərpəchi. Tangda cha hərtə dzəgana nə Tlakə ga nga tləmər Tlakəu. 9 Ngə Abram tə biyama na ma'i ya təwa Negev.
Abram vu Masar.
10 Huɓə tə tlə tə hə'i nda, ngə Abram təra dzəva Masar ka cha gwa ngya nə bəji kushiu, aka huɓə nda 'ual'ualə gagaɗa. 11 Manda kaɗə cha dzəva Masar, ngə cha nar nyi nə mala nyi Saraya, <<A zəndə təya mala gumaguma ka. 12 Ma njir Masar tə gwa la'a ngha, ndo na, <Nenna mala nyi nga.> Kəl ndo tsəya ɗa ndo ngya nghə na pi. 13 Ka na ənda kwaməɗa ka, ga ya uya ngya mənakəu, nda ngya ɗa na pi tsə'u tə dəbar ngha.>>
14 Nda Abram tə dzəva Masar, Njir Masar tə la'a Saraya Mala gumaguma cha gagaɗa. 15 Manda njirawawa'a Fir'auna tə la'a Saraya, nda fal nyi nə Fir'auna, ngə nda təra nacha gwa tə patla nyi. 16 Ngə təl Masar tə mərtə nyi mənakəkur nə Abram, ga nə nyi kətəng, tla, kwara i'i shilishili nyi ka mahi'imahi'i nyi, mavi'i ka kwatəra i'i ana dləgwam i'i.
17 Kəl ja, Tlakə tə nə nyi ɓwaɓwatə nə Fir'auna təwa shilkə 'ual'ual ana njir kinyi təkəra Saraya mala Abram. 18 Fir'auna tə nga Abram ga na, <<Minə ka mər tə ɗa? Ka mi ka tləya ɗa gəzhi bəra Saraya da mala nghə wa? 19 Kami ka na, <Kwamɗa nga,> ngə ya hətə nyi ka mala ɗa? Sakan ja, jan mala ngha, hətə nyi ka təra nacha!>> 20 Ngə Fir'auna tə tsau nyi bar nə nji nyi təkəra Abram, ngə nda səu Abram ku laku ana mala nyi ana dəhə sənyi.