Jigəɗə nə Babel
11
1 Haaɗa dəhə njir dunəya kwa ɓwanya na nya zhang ya nya zhang ndo ndər ni. 2 Ku sakanda nji kwa ɗəwa gwa təwa zədərpəchi, ngə nda uya babal ku hə'i Shinar ga ngya tangnda.3 Ngə nda ghəya na nə kərnənda, <<Mən dla'a tubali məna tsagu na hu'u.>> Nda mər tlər na tubali təvira hangu, ana kwalta təvəra nyingha.
4 Kəl ngə nda na, <<Shili ma, məna hərtə mələm dəgal nə kərnəmən ana jigəɗəu nda kwa gi tsəkar huɗamələm. Nacha ngə kwa gwa'atə məno fiya tləmən mən, ana tsamən da wiɗətəkər tə dəhə dunəya.>> 5 Kəl ngə Tlakə tə səya ga ndzamar mələm nda ana jigəɗə nda nji'inda kwa hər nda. 6 Tlakə tə na, <<Ndzama!>> <<Nji'ina kəra nda daɓdaɓa nyi, ya dəhə nda kwa ɓwanya na nya zhang. Ahir na, a sə da nda kwa i məra kəla nda kwa nau mərtə wa! 7 Mən səya gwazhiya nya nji inga. Tsa'aka a tsə'u nda kwa nau ngabiya kərnənda wa.>>
8 Təwa əngə ngə Tlakə tə wiɗənda nda tə dəhə dunəya, ngə nda ta'ində hər mələm nda. 9 Nacha tə gwa'atə nja nga mələm nda Babila, aka tangnda ngə Tlakə tə gwazhiya nya njir dunəya dəhəu. A təwa ənga cha wiɗənda nda tə dəhə dunəya.
Shem yatə Abram
10 Nənə ngə nyandəla Shem.
Fa mətləu ahir mandza nda, ku bəji nda fa Shem 100, ngə cha yah Arfakshad. 11 Cha ngya fa 500 cha yiyah nguli shili ka ku'i mahi'i.
14 Fa Shela 30 cha yah Eber.
15 Shela tə fa 403, cha yah Nguli shili ka ku'i mahi'i.
18 Peleg tə fa 30 ngə cha yah Reyu. 19 Ahir cha yah Reyu, cha fa 209 ngə cha yah nguli shili ka ku'i mahi'i.
20 Nda Reyu tə fa 32, ngə cha yah Serug. 21 Ahir Reyu tə yah Serug tsəu, ngə cha fa 207 ga yah nguli shili ka ku'i mahi'i.
22 Nda Serug tə fa 30, ngə cha yah Nahor. 23 Ahir yar Nahor, ngə Serug tə fa 200 ga yah nguli shili ka ku'i mahi'i.
24 Nda Nahor tə fa 29 ngə cha yah Tera. 25 Ngə Nahor tə fa 119 ngə cha yah nguli shili ka ku'i mahi'i.
26 Ahir Tera tə fa 70 ngə cha yah Abram, Nahor ana Haran.
Nyandəla Abram.
27 Nənə ngə nyandəla Abram.
Tera tə yah Abram, Nahor ana Haran, ngə Haran ngə tə yah Lot. 28 Sakanda adanyi tsutanyi na pi. Haran tə tah vu Ur tə hə'i njir Kaldi. 29 Abram ana Nahor tə hə mala. Tləmər mala Abram Saraya, tləmər mala Nahor Milka kwar Haran, Haran ngə adanya ka Milka kya'anda na Iska. 30 Saraya mala kəla yah cha, aka a zər da tsa cha wa.