Mbandər Hyel ana Nuhu
9
1 Kəl ngə Hyel tə səkənyi papa'akur nə Nuhu ana nguli shili nyi, ga nar nda, <<Hya yatəkər hya ɗa ɗanghəu. Hya nyandə dunəya. 2 Dəhə sərshishi, eakə inda kwa fəl biya huɗamələm, sər təɗə na ta, ana kalfi inda ku fa'a kwa ləvər hi, ndo ɗa tə kiɗa gyalkur kəhi. 3 Nə hi tə ya dəhə sə nda na pi kwa ma'i ka sərsum kəhi, tang wi nda ya nə hi kala chuli sə hyalihyali, sakana a nə hi tə ya kala səu.>>4 <<Kəl ja, ngwa hya da ɗə kum nda tsə'utanyi na mashi ku cha wa. 5 Ma ndə tə tsəya ngha yo tlanda nyi nəumar tah. Yo tsəya sərshishi nda tə tsəya ngha, yo tlanda nyi nəuma nə dəhə ndə nda tsəya kuvanyi ndəu.>>
6 <<Ma ndə nda tə tsəya ndəu,
təwa ndə tsə'u njo tsəya nyi,
aka Hyəl tə mər ndəu
pabiya da kərnyi.
7 <<Kəl nda nahi ja, hya yatəkər hya ɗa ɗanghəu, hya nyandə dunəya.>>
8 Ngə Hyəl tə nar nyi nə Nuhu ana nguli shili nyi, 9 <<Yo mərtə mbandər ɗa ana ka ana nyandəla ka, inda kwa shili hi ngha 10 ana dəhə sə pipi inda kə'i ka, eakəu, sərshishi ki ana dəhə kum takəu, dəhə sə inda tə zəbiya ku param nda kə'i ka, ana dəhə sə pipi inda tə dunəya. 11 Mbiya təya mbadər ɗa kə'i hi, a tsə'u yo tsakətə zhazhə sə pipi na mandza wa, ya a tsə'u mandza do ɗa nda kwa shazhənda dunəya wa.>>
12 Kəl ngə Hyel tə na, <<Janə ba'adar mbandər nda ku pama mən kə'i hi, ka dəhə sə pipi, ana zamin nda kwa shili. 13 A fiya tə ya katsakər par tə ləmbəkəu, nacha ngə ba'adar mbandər nda ku pama ea ka dunəya dəhəu. 14 Ma sakanda ya sətə ləmbəkə təkəra dunəya, ngə katsakər par tə biya tə ləmbəkəu, 15 yo ɗənghatə na mbandər ɗa nda ku pama mən kahi ana dəhə sə pipi. A tsə'u mandza da kwa zhazhinda dəhə sə pipi səkə wa. 16 Ma sakanda katsakər par tə biya ku ləmbəkəu, yo ɗənghatə na mbandər nda ba'anawa ku pama Hyel ana kala sə pipi nda tə dunəya,>>
17 Kəl ngə Hyel tə nar nyi nə Nuhu, <<Nənnə ngə ba'adar mbandər nda ya kwa ta'ində ku pama ea ka dəhə sə pipi ku dunəya.>>
Nguli Shili Nuhu
18 Nguli shili inda tə biya ku param nanda ngə Shem, Ham ana Jafet. (Ham ngə adanya Kan'ana.) 19 Nanda ngə ngulisha'a Nuhu Makərəu, təwanda ngə nja yatə kər ka wiɗəndadzə tə dunəya.
20 Nuhu ndər zuwaa cha biyama na chə uwa. 21 Vanya pəchi cha sa sə sasa, ga wi ka piya tanyi ku kwabatənyi dura'a. 22 Ham, adanya Kan'ana, tə la'a durakur nyi ngə cha narnyi ka zamənyi mətlə inda biya. 23 Kəl ngə Shem ana Jafet tə həti dzaki ka tlətə tə wulya nda ga shili tə dagəryi ngə nda mbuya dura'akur adan nda ni. Hudəmanda təwa bangtiti tsa nda ɗa la'a dura'akur adan nda.
24 Manda Nuhu tə hya'atə ga shili ku jigadəma nyi, ngə cha ngabiya sənda zər kushi nda tə məra tənyi, 25 ngə cha na,
<<Shi'u təkəra Kan'ana!
Mavakur nə ka zamənyi cho ngya.>>
26 Nuhu tə bəla na,
<<Papa'akur nə Tlakəu, Hyəl Shem!
Kan'ana ɗa ka mava Shemb.
27 Hyəl cha hanɗə Jafet;c
Jafet cha ngya ku kwapatə Shem,
Kan'ana ɗa ka mavanyid.>>