8
1 Kəl ngə Hyel ku təhuɗə nyi cha ɗənghatə na Nuhu ana dəhə kum takəu ana sərshishi nə ki inda kə'i cha ku param nda. Ngə cha sə gyang təkəra dunəya, ngə ɓiti nda tə ghəya shi'ua. 2 Tsədzəɗə ɓiti wawa'a inda da tə haɗa, huɗamələm tə haɗənda dzəa, par tsə'u tə ta'i. 3 Kəl ngə ɓiti nda tə go shi'u samməu. Ahir hanyi 150 ɓiti nda tə shi'uar shiu'a 4 pishir hanyi kwabə məɗəfə nə hya məɗəfə tsəu, param nda tə səya ta'i təkəra vanya mə njo nga Ararat. 5 Ɓiti nda tə biyama na shi'u tsa'a tə hya kuma, pishir tangərmar hanyi nə hya kuma tsəu, nja ghəya na la'a kəra mə i'i.6 Ahir hanyi fwaɗəkumənyi, Nuhu tə mbəɗiya kagapə nə param nda 7 ngə cha sə salakəu, ngə salakəu nda tə biya ngyatanyi ka fələ yi shili yi shili kəl bəjinda ɓiti nda tə shi'ua. 8 Kəl ngə Nuhu tə sə mbətla, ka cha la'a ndara ɓiti nda shi'u tə təkəra hə'i. 9 Kəl ja, manda ɓiti nda tsə'utanyi tə dunəya, a cha uya mbwar ndzəm wa. Ngə cha bəl shili da Nuhu ku param nda, ngə Nuhu tə ha chacha ga həu nyi gwa ku param nda. 10 Nuhu tə bəla tsakətə hanyi mədəfa, ngə cha bəla sə mbətla nda səkəu. 11 Mbətla nda tə bəl shili akəu ana hyali Zaitun məɗakə ku nya cha. Təwa əngə Nuhu tə zəndə ənda ɓiti shi'u tə təkəra hə'i. 12 Kəl ngə cha tsakətə hanyi məɗəfa səkəu, ngə cha bəla sə mbətla nda, kəl ja, a da cha zhaka ɓəl shili da cha wa.
13 Pishir hanyi zhang nə hya zhang nə fa 601 nə fa Nuhu, ɓiti nda tə shi'u təkəra hə'i. Ngə Nuhu tə mbəɗar kəra param nda ga la'a ənda kəra hə'i shi'uti. 14 Təvi hanyi mətləkumənyi parnya məɗəfa nə hya mətləu, hə'i ulə tə twaturatləu.
15 Kəl ngə Hyel tə nar nyi nə Nuhu, 16 <<Zəbiya ma ku param nga, dəhə hi kə'i mala ngha, kə'i nguli ngha, ka mahi'i kənda. 17 Ka zəbiya na dəhə sərshishi, ana eakəu, sərshishi i'i, ana sə pipi inda kwa təɗə na ta, ka ga nda yatəkər, nda tsaka, nda ɗa ɗang tə dunəya.>>
18 Kəl Nuhu, ana mala nyi, ana nguli nyi ka mahi'i kənda tə biya ku param nda. 19 Ngə dəhə sərshishi, dəhə sə pipi nda kwa təɗə na ta, ana dəhə eakəu, ana dəhə sə inda kwa ma'i tə dunəya tə biya ku param nda, ka chuli ka chuli.
20 Kəl ngə Nuhu tə hərtə dzəgana nə Tlakəu, cha ɗəmtsə ku huɗa sərshishi inda chamə ana eake inda chamə ga handa təmachi təwa nginda tə dzəgana nda. 21 Ngə Tlakə tə ngatə məsɗakə na shi'unir sənda nja hatəmachi nə nda, ngə cha nar nyi nə kərnyi, <<A tsə'u yo shunda hə'i səkə aka sə ndə ndə wa, madangə kala sənda nda kwa jigadəma ku ɗufwa nda fwatə ku zərkur kəl səɗimi. A tsə'u yo ɓəla zhazhi dəhə sə pipi wi nda ya ɗaka mər wa.
22 Tsa'atə bəji nda dunəya kwa wura,
bəjir tləka da,
bəjir fwakə da,
bəjir gyang shishi'u da,
bəjir vitəku da,
vuya da ya hyapuchi da,
puchi da ya vu'i da.>>