7
1 Ngə Tlakə tə nar nyi nə Nuhu, <<Ma'i gwa ku param nga, dəhə hi kə'i njir ki ngha, aka a la'atə ya ənda ma'i nghə tsatsa'a maɗa ku bəji na. 2 Ka ɗəmtsə sərshishi inda chamə məɗəfa, sal ana mala, ana sərshishi inda pa'a chamə tsə'u məɗəfa sal ana mala. 3 Ka ɗəmətsə məɗəfə ku kala eakəu, sal ana mala ga nja uya chuli kənda ku dəhə dunəya. 4 Həyadzə hanyi məɗəfa, yo sətə par təkəra dunəya, hanyi fwaɗəkumənyi ana ɓupəchi fwaɗəkumənyi, ya yo zhazhinda kala sə pipi inda ya məra.>>5 Ngə Nuhu tə mərtə dəhə sə inda Tlakə tə tsau nyi bar.
6 Fa Nuhu 600 ma mandza par nda shili tə dunəya. 7 Ngə Nuhu kə'i nguli nyi, mala nyi ana mahi'i nguli nyi tə gwa ku param kanda mbəɗə tsa ɓitir mandza nda. 8 Ngə sərshishi inda chaməu, ana inda pa'a chaməu, eakə i, ana dəhə sə pipi inda kwa ma'i təkəra hə'i, 9 tə shil da Nuhu ga gwa ku param nda kərmətlə kərmətləu, sal ana mala, wi nda Hyel tə tsau nyi bar nə Nuhu. 10 Ahir hanyi məɗəfa, mandza ɓiti tə shili tə dunəya.
11 Pəshir hanyi kwabə məɗəfə nə hya mətlə nə fa 600 nə Nuhu tə dunəya, dəhə tsədzəɗər ɓiti wawa'a tə pətla, ngə huɗamələm tə mbəɗa. 12 Par tə təɗa, ɓupuchi fwaɗəkumənyi ana vu'i fwaɗəkumənyi.
13 Pəshi nda tanyi ngə Nuhu ana mala nyi ka nguli nyi, Shem, Ham ba'a Jafet ana mahi'i kənda tə gwa ku param nda. 14 Nda gwa na kala kum takəu ana chuli kənda, sərshishi nə ki ana chul kənda, dəhə sə pipi inda kwa təɗə na ta, ana chuli kənda, ana kala chuli eakəu ana chuli kənda, ana dəhə sə'inda na babəkəu. 15 Dəhə sə pipi tə shili kərmətlə kərmətlə da Nuhu ga gwa ku param nda. 16 Sərshishi inda tə gwa, sal ana mala nə kala sənda na pi, wi nda Hyel tə tsau nyi bar nə Nuhu. Ngə Tlakə tə haɗənda nya param nda.
17 Mandza nda tə biyama na təɗa hanyi fwaɗəkumənyi tə dunəya, kəl tsakə ɓiti nda kwa tsaka, cha haɗiya hə'i ga hənda param nda vəng tsa hə'i. 18 Ɓiti nda tə biyama na tsaka ga ɗa 'ual gagaɗa, kəl param nda kwa zhuli təkəra ɓiti. 19 Ɓiti nda tə ɗa 'ualəu tə dunəya ga sanda dəhə mə inda dzəgam dzəgaməu. 20 Ɓiti nda tə ɗa 'ualə ga sanda dəhə məa, ga ndəɗənda na ndiya hi mətləkumənyi. 21 Dəhə sə pipi inda tə dunəya, eakə i'i, sərshishi nə ki, kum takəu, sər təɗə na ta i'i, ana kala sə ndəndəu, tə kuɗa. 22 Kala sənda tə hə'i 'ualə'ualə inda kwa səpi, tə kuɗa. 23 Hyel tə kuɗənda kala sənda na pi tə dunəya, nji ana Sərshishi, ana sər təɗə na ta i'i ana eakə inda biya huɗamələm. Huɗəkər nji'inda tə mbəɗa nacha ngə Nuhu ana nji'inda kə'i cha ku param nda.
24 Mandza nda tə haɗiya kəra hə'i, hanyi 150.