Mandza
6
1 Nda nji tə ghəya na tsakə tə dunəya, ya nda yiyah ku'imahi, 2 njir huɗamələm tə la'a ənda ku'i njir dunəya gumaguma, ngə nda ɗəmətsə inda ndo i ku huɗa nda ga həbiya. 3 Ngə Tlakə tə na, <<A Shanguɗə ɗa da kwa ngya ku ndə ba'anawa wa, aka ndə cha, kəl ja, hanyi nyi da kwa ndiya fa 120 wa.>>4 Aku hanyi inga njir huɗamələm tə piya na ku'i nji ngə nda yiyah ngulisha'a. Nanda ingə nji ghərət ghərətəu nji kwalkwalə inda tə dunəya ku bəji nda.
5 Tlakə tə la'a 'ualkura kəmangarkur ndə ku dunəya, ngə cha la'a ənda kala sə nda ku jigadəma ndəu ana sənda ku ɗufwa cha kəl ɗimikur wa'atanyi. 6 Kəl ngə huɗa Tlakə tə tla ənda cha mər ndə ku dunəya. Səsənyi tə tliya huɗa cha gagaɗa. 7 Ngə Tlakə tə na, <<Yo zhazhinda sə ndə ndə nda ya mərtə tə dunəya. Yo zhazhinda dəhə nji ana sərshishi, ana sə'inda kwa təɗə na ta təkəra hə'i ana eakə inda kwa fəl biya huɗamələm. Huɗa ya tlatə ənda ya mər nda.>> 8 Kəl ja, Nuhu nənyi cha uya kwambiyakur tsa Tlakəu.
9 Janə labar Nuhu. Nuhu ndər mər sə tsa'atsa'a cha, nacha ngə ndə kəla bikə nda na ngya ku dunəya tə bəji nda, cha ngya tsa'a na Hyel. 10 Nguli Nuhu makərəu: Shem, Ham, ana Jafet.
11 Saka nga Hyel tə la'a ənda dunəya səwatə ga zhaliya dzə na mwali. 12 Hyel tə la'a səwasəwakur dunəya, aka dəhə nji nda ku dunəya səwandə tə ngya kənda. 13 Kəl ngə Hyel tə nar nyi nə Nuhu, <<A ɓatləya təya yo zhazhinda dəhə nji, aka a nyandə tə nda dunəya na mwali. Yo zhazhinda nda dəhə ka dunəya. 14 Aka ənga, ɓatlətə param nə kərngha ana wu nda ɓaɓaləu, ka ɓatlətə vi ɗang kwa, ka yahibiya ta cha ana yacha na dəbə kachinau. 15 Jan ənda ko ɓatlə param nga, pələkəkuracha hi 450, dlaɓəkura cha hi 75, dzəgamkuracha hi 45. 16 Ka mbuya kəra param nda, kəl nda ka həya mbwa fwanghə hi zhang na manyi aka ga vi cham gwa kwa. Ka ɓatlətə vi təkəra vi makərəu ana nyavi tə yimbilya param nda. 17 Yo shili na mandza təkəra dunəya ka ya kuɗənda dəhə sə pipi nda kwa səpi. Dəhə sə'inda ku dunəya kwa kuɗa. 18 Kəl ja, yo mbatə ndər naka, ko gwa ku param nahi ka ngulisha'a ngha, ana mala ngha ba'a mahi'i nguli ngha. 19 Ətsəu, ko gwa ku param ana dəhə sə pipi kərmətlə kərmərtləu, sal ana mala, ga nda uya mbəɗə kə'i ka. 20 Mətlə mətlə ku kala eakəu, kala sərshishi ana dəhə sə pipi inda kwa ma'i təkəra hə'i, kwa shili da ka, ka ga nda ngya na pi. 21 Ko gwa'ar kala sərsum nda njo səma ka ɗəwanda ka sərsum kəhi kə'i nda.>>
22 Nuhu tə mər dəhə sə tang wi nda Hyel tə tsau nyi bar.