10
1 Ya ndzama, kəl ngə ya la'a sə wi ngətə təmbəl təlkur nda nja mərti na hanngu tsəka'a nda na həsəli wi nə saffaya.2 Əngə Hyel Tlakəu tə narnyi nə ndə nda na ləkutə sər tul nda dzənyi, gwa təwa hya charkaina i nga, ada kiɗa sər pi'inga. ka nyandi chakə na hahir hu'u nda ku pama sər pi'inga ka wuchnda təkəra mələm." Winda ya kwa ndzama cha gwa.3 Sa ngə ja sər pi'inda təta'iu təwa zədər pichi nə mbwa'aləu nda aku bijinda ndə nda tə gwati. kəl ngə ləmbəkəu həsəli Tlakəu tə zhaliya ta vinda.4 Əngə həsəlir Hyel tə hya'ati gyamar sər pi'ind ga təra ya nya nyavi mbwa'alə nda, ləmbəkə tsəu tə nyandi vinda, mbəlmbələr həsəlir Hyel tə nyandi ta kinda.5 Kəl ngə nji ngati kuraka babkə sər pi'inda tsa'a piya ku ta kinda dəhəu, wingətə kuraka Hyel macha ndəra.6 Aku bijinda Tlakəu tə tsaunyi bar nə ndənda na ləkutə sərtul nda cha kwa na, "Hətə hu'u ngə dakiɗa hya charkai na nga, nda ku pama sər pi'inga," ndənda gwa ga ta'i dza hya charkaina.7 Kəl ngə zhang ku pama sər pi'inda tə ha chacha yakəra hu'u nda ku pama nda nda. Cha tatsi hu'unda ga pəu ku cha ndə nda na ləkutə sər tulnda, cha dləutsi ga biya.8 Ada kiɗa babka sər pi'inda sə da wi ngətə cha ndəu.9 Ya kwa dzama, ngə ya la'a atə yimblya sər pi'inda hya charkaina da fwaɗəu, kala zhang a tə yimblya sər pi'inda; hya charkaina inda kwa mblə wi ngətə mangu baril nda na səli.10 Dzam kə nda chul zhang nda, dəhənda fwaɗənda pabiya dzənda; kala zhang wingətə hya charkaina kwa sha ku pama vanyi.11 Wi nda nda kwa ma'i. nda kwa ma'i kwa kala lakunda zhang ku sər pi'inda tə nəwa ana kəlnda shar dzanda wa, nda kwa dəhənda, dəhə təwa banda hir ma tə nəwa, dəhə alyə inda kwa nəuwa, ada kəl nda sha wa.12 Dəhəkura dzanda, fwu dagər yanda, chanda and babkanda, dəhə nyabiyatə dzəna li, winda tə hi fwaɗ'inda.13 Ana himaya ya ngati nja nga hya charkain'inda, "kuraka hya charkina'inda wi ngətə gyang majigwal."14 Kala zang ku pama nda ana huɗmanda fwaɗəu, zhang wi ngətə babkəu, mətləkunyi wi nə ndəu, makərkunyi wi nə ləvari, fwaɗkunyi wi nə 'yak mbəlkəu.15 Kəl ngə sər pi'inda tə hya'ati shahuɗa mələm. Na nda ngə sər pi nda ya la'a a nya dəl kebar.16 Aku bijinda sər pi'inda tə tsaɗ dza ngə ngə hya charkaina inda tsəu tə nəu ndzi; ana nda sər pi'inda tə waliya pabkanda ka fəla ada hya charkina inda da wunda dzə wa.17 Ma sər pi'inda tə ta'i nada tsəu kwa ta'i, ma sər pi'inda kwa hya'ati nanda tsəu kwa hya'ati tsa'a kanda, aka shanguɗ sər pi'inda a kunda.18 Kəl ngə həsəlir Hyel tə ngyar mbwa'alə nda ga ta'i təkəra sər pi'inda.19 Wi nda yo dzama, sər pi'inda wunda babkanda ngə nda hya'ati ga ngyar hə'i, ana nda do təra, nda təra dəhəka hya charkaina inda. Nda ta'i a nya lakur gwa ku mbwa'alə Hyel təwa zədər pichi, ana həsəlir Tlakəu tsa na nda.20 Na nda ngə sər pi inda ya la'a a nya dəl kebar a da kiɗa Hyel nə njir Isra'ila, ngə ya ngabiya sər pi inda.21 Kala zhang ana huɗma fwaɗəu ana babkə fwaɗəu, ya ada kiɗa babka nda sə da wingə tə cha ndəu.22 Huɗma nda pabiya tə dzə dəhəu wi nda ya la'a a nya dəl kebar. dəhənda kwa ma'i tandarəu.