Nja Narnyi nə Njir Yahuda Nda Pa ka Kərnənda
8
1 Pishinda tanyi, təl Zazəs tə nənyi ki Haman nə Esta ndər dawa njir Yahuda. Ngə Modekai tə shili huɗə təl, aka Esta wurtə dəkəbiya nyi ənda pama nda na Modekai nə təl. 2 Ngə təl tə səɗəya tsəshiu nda na hatimi nyi ti, nda cha dləuya tsa Haman ga nənyi Modekai. Ngə Esta tə fəkər Modekai təkəra dəhə gəna Haman.3 Ngə Esta tə piya huɗə cho tiwi cho gədənyi səkəu. Cha gədinyi cha ta'ində pəla'akur nda Haman ndər Agag tə haɓətə təkəra njir Yahuda 4 Ngə təl tə lətə nyi tamba bəjingha nə Esta, ngə Esta tə hya'ati ga ta'i biyamar təl.
5 Ngə cha na, <<Macha a ɗatə nə təl, ya macha uya təya kwambiyakur tsa təl ya cha la'a sənda njo kina mər nga, ba'a nja tsəfətə tsaubar nja ta'ində tsəfə nda Haman zər Hamedata ndər Agag tə təkənda ku dəhə mətla təl i'i. 6 Aman yo ɗa na la'a na'awa nji ku ɓwaɓwata? Aman yo nau səsəuti ya la'a ənda njo kuɗənda njir ki ɗa?>>
7 Ngə təl Zazəs tə ɓəlakə nyi nə ka Esta ana Modekai ndər Yahuda, <<Aka Haman tə pa njir Yauda ngə ya nə nyi dəhə gəna nyi nə Esta, ga kukwanda nyi kyatə wua. 8 Kəl ja, dəhə tsəfə nja tsəfa ga fətə hatimi təl ti, a tsəu njo nau ɓəlanda wa. Sakan ja, tsəfətə vanya mafakə wi nda hyo i nə dəhə njir Yahuda ana tləmər təl, ka fətə hatimi təl ti.>>
9 Ngə kusa nga njir tsəfə nə təl, pishir hanyi mətləkumnyi parnya makər nə hya Tengleləkər, hya nə Sivan, nda tsəfəbiya dəhə sənda Modekai tə nar nda nə njir Yahuda, ana anə Satraps, gwamna i'i ana njirawawa'a nə mətla 127 fwa hi Indiya kəla'a vu Kush. Nja tsəfəbiya tsaubar nga ku lakur tsəfə nə kala nji, ana nə njir Yahuda tsəu ku nya kənda ana lakur tsəfə kənda. 10 Modekai tə tsəfə na tləmər təl ga fətə hatimi təl ti, ngə cha lənda təwa cha njir ma'i mafakə kuskusə tə ya taku inda nja ɓutə ka tlər təl.
11 Kainau nda tə ngyanyi laku nə njir Yahuda ənda nda tsəmtə dza nda ɓəlatə kərənda, nda kuɗənda, nda tsəya ana zhazhinda kala njir pa inda shili ka pa nda, ana mahi'i kənda ka nguilisha'a kənda, ana nda fa'aya kwazhalɓi njir dawa kənda. 12 Pichi nda nja fiya nyi nə njir Yahuda ka nda mər ngə sə ku dəhə mətlamətla təl Zazəs nacha pishir kwabumakərkunya pəchi nə hya Batəlar, hya nə Adar. 13 Njo təkənda kainau nga wi gadlagadla ku kala mətla ya njo chabiya nyi nə kala hə'i ga njir Yahuda ɓatləya kərnənda atə pəchi nga ka nda kanda kərnənda tsa njir dawa kənda.
14 Njir ma'i na mafəkə tə ya taku tə kusa biya, nja fiya tsaubar nga ma'a ku ta mələm Susa.
15 Modekai tə biya ku ki təl ana lukutə nə təltəl ndzə nyi dzagina zargina ana pərtəu, ana pahuɗə mbakər dəgaləu, nə bəjinghə kyo kəra cha, ana lukutə linən, lipəlalipəla. Nja mər hirgyaɗi gagaɗə ku mələm Susa. 16 Anə njir Yahuda, pəchi na, pəchir hirgyaɗi ana gladness ana səli. 17 Ku kala mətla ana mələm, dəhə mbwanda tsaubar təl ma'i ti, hirgyaɗi gagaɗa ku pama njir Yahuda njo mər ladər njo utsa. Ma'a alenya nji'inda pa'a njir Yahuda tə ɗa ka njir Yahuda aka ləvər tə səya nda tsa njir Yahuda.