Esta 7

Nja Hakəya Haman

1 Ngə təl ana Haman tə ki səm ka kwatam Esta. 2 Sakanda ndo sa ɓitir anap ti pishir mətləkunya pəchi, təl tə ɓəla jawa, <<Kwatam Esta, mi sənda ko gwa'a? Par ɗa, njo nə ngha. Mada təlkur ɗa ngə ko i nja təkəbiya mətlə nja nə nghə manyi, ko uya.>>

3 Ngə Kwatam Esta tə wuma, <<Macha a uya təya kwambiyakur tsa ka ja tələu, ya macha a ɗati nə aləvari, mbəndaɗə pya ya, ana pya jikə ea, nacha ngə gəɗi ɗa. 4 Aka a wurtə nji tətə ea ka nji ɗa ka nja kuɗənda ea nja tlakə ea wulya nja zhazhənda ea. Macha ka ea ki ɗa ka mavi'i ngə nja nda ɗəlnda ea, a da yo nda ndər wa, a da yo nda wendə nghə təkəri wa, kəl ja, jan njo gwa'a nja kuɗənda ea nja zhazhənda ea.>>

5 Ngə təl Zazəs tə jau kwatam Esta, <<Wa ndə ndə nya? Taman hya'atə ndə ngha nji ka cha mər chul ngəna sa?>>

6 Ngə Esta tə na, <<Janə ndər dawa kə ea! Janə ndə nda pa'a ndo i ea! Ndə pu'i na, Haman.>>

Ngə ləvəra səya Haman gagaɗa amar təl ana kwatam. 7 Ngə təl tə hya'tə huɗətla, cha ngyar ɓitir anap nyi ga təra biyo mbəta nda ku ki təl. Nda Hamana la'a ənda təl ɓatləti ka cha nənyi ɓwaɓwatəu, ngə ta'i ka cha gədi Kwatam Esta nja ngya nyi na pi.

8 Haman bəzənda tə kərnyi səya sər ngya nda Esta ti, ngə tə tə səgwa hya'atə ku mbəta. Ngə təl tə na, <<Jan ndə no gwa'a piya na kwatam na təku ku ki ɗa.>>

Nacha taa haɗiya nya cha wa, ngə ni'inda a kiɗa nda da wa inda tə kusa mbuya huɗəma Haman. 9 Ngə Harbona zhang ku huɗa nji'inda kwa mər tlər nə təl tə na, <<Vanya wu da nja hya'andə hyo ki Haman, kwa ɗa hi məɗəfəkumnyi parnya tufəu. Haman ngə ɓatləya ka Modekai, ndə nda mbəɗəndə pya təl nda.>>

Ngə təl tə na, <<Hakəya nyi ma kyati!>> 10 Ngə nda hakəya Haman kyatə wu nda cha ɓatlə ka Modekai nda. Ngə huɗətla təl tə tatləya dza.