Nja Tsakətə nyi Dəgalkur nə Modekai
6
1 Əvu'i nda, a təl da kwa nau nji hanyi wa, ngə cha na nja shili na nyi likatkatə sə'inda tə ɗa ku biji nyi, nja kəratsəntə nyi. 2 Ngə nja kəratsən tə vanya mbwa nda tə pə ənda Modekai tə chuɗəbiya ənda Bigtana ana Teresh njir mər tlər nə təl tə gwa'a nda tsəya təl Zazəs.3 Ngə təl tə jawa, <<Mi sənda nja mərtə nyi nə Modekai aka səngə cha mər nga?>>
Ngu mavi'i nyi tə na a səda nja mərtənyi wa.
4 Ngə təl tə na, <<Wa ngə biya courta?>> Ku biji na, Haman səgwa tə ku patla cho gwa'a cha ɓwanya na təl təkəra ənda njo hakəya Modekai tə wu nda cha ɓatləya ka cha nda.
5 Ngə mavi'i təl tə na, <<Haman ngə ta'i biya nga.>>
Ngə təl tə na <<Nar nyi ma cha səgwa.>>
6 Nda Haman tə səgwa, ngə təl tə jau nyi, <<Mi sənda njo mərtənyi nə ndə təl kwa i cha tsakətənyi dəgalkura?>>
Ngə Haman tə har ku kura cha, <<Wa ngə təl kwa tsakətənyi dəgalkur ma pa'a naya wa?>> 7 Ngə cha nar nyi nə təl <<Sənda njo mərtənyi nə ndə təl kwa gwa'a nənyi dəgalkur nacha ngə, 8 ka na nja shili na lukutə nda təl tə ɗaka hadzi, ana taku nda təl tə taa dla, nda na sə mbəlmbələ nə təlkur ku kəra cha. 9 Kəl njo nənyi dzaki inda nə ndə nda ndiya na dəgalkur ku ki təl, cha handzənyi nə ndə nda təl kwa gwa'a tsakətənyi dəgalkur, cha tahəya ta mələm nacha gyatə taku cho na, <Nənnə ngə sənda njo mər nə ndə nda təl kwa nənyi dəgalkur!> >>
10 Ngə təl tə nar nyi nə Haman, <<Kusa, ka shili na lukutə ba'a taku ka mərtənyi səngə ka na nga anə Modekai ndər Yahuda ngə kwa maka ngya nya nyaki təl nga. Ngwa ka da ngyar mada zhang ku sənda ka pə wa.>>
11 Ngə Haman tə shili na lukutəu ba'a taku nda. Cha handzə nyi nə Modekai ga fətə nyi gyatə ya taku, ga tahəya ta mələm na cha cho na, <<Nənnə ngə sənda njo mər nə ndə nda təl kwa ngatə məsəɗakə cha nənyi dəgalkur!>>
12 Ahir nga, Modekai tə ɓəl shili nnya nyaki təl. Kəl ja, Haman tə kusa təra kyo ki na kuzhi. 13 Cha yi nar nyi sənda tə ɗa nacha nə Zəresh mala nyi ana ka bazhi nyi.
Njir dəkə dəma nə nyi ana Zeresh mala nyi tə nar nyi, <<Mangə Modekai, ndə nda ka ghəya uzhi manyi nga ndər Yahuda nga, a da ko nau kura nyi wa, təkəɗəu cho kura ngha.>>
Nja Tsəya Haman
14 Tsəu tanda kwa ɓwanya, kəl jan ngərdzəuna təl tə shili ka nda nga Haman kyatə mbwar ladər nda Esta tə ɓatləya.