Esta tə Ɓatləya Ladər ka Təl ana Haman
5
1 Pishir makərkunya hanyi, Esta tə pəndzə ndzaki təlkur nyi ga təra da gwa ku patla təl. Tul tə ngya ku dzəga təkur nyi, cho ndzam lakur səgwa. 2 Nda cha la'a kwatam Esta ta'i biya, cha ngatə məsəɗakə nacha ga lətə nyi tamba bəjingha nda cha cha. Ngə Esta tə gwa ga tsəkar kəra tamba nda.3 Ngə təl tə jau nyi, <<Ma'anə ja kwatam Esta? Minə ko gwa'a? Mada mar təlkur nga, yo nə ngha.>>
4 Esta tə ɓəlakənyi nə təl, <<Macha təl kwa i, ngwa təl ana Haman shili ku ladər nda ya ɓatləya nyi.>>
5 Ngə təl tə na, <<Kusa ma shili na ɗa Haman ga ea mər sənda Esta tə gwa'a.>>
Ngə təl ana Haman tə təra yo ladər nda Esta tə ɓatləya. 6 Nda ndo sa ɓitir anap, ngə təl ɓəla jau Esta, <<Sakan ja, minə ko gwa'a? Njo nə ngha. Minə gədi ngha? Mada mar təlkur ɗa, njo nəgha.>>
7 Esta tə ɓəlakən nyi, <<Gədi ɗa nacha nga, 8 macha a uyatə ya kwambiyakur tsa təl ya adatə nə təl cha mərtə ɗa sənda yo gədi, yau, ba'a təl ana Haman ɓəla shili ku ladər nda yo ɓatləya ka nda. Yo dzugwa wumə jau təl.>>
Sənda Haman tə Haɓətə təkəra Modekai
9 Haman tə ngyar mbwar ladər nda na hirngyaɗi gagaɗa. Kəl ja, nda cha biya la'a Modekai biya nya nyaki təl ya a Modekai da hya'ati ndara cha char səli nə nyi wa, ngə huɗa cha tla gagaɗa ana Modekai. 10 Kəl ja, cha gəzəya kərnyi ga təra kyo ki. Ngə cha ngatə ka bashi nyi shili ku ki nyi ga nga Zeresh mala nyi tsəu, 11 Haman tə bu kərnyi nənda təkəra gəna nda tsa cha, ana nguil shili nyi inda ɗanghəu, ana dəhə laku nda təl tə tsakətə dəgalkur ga nənyi səli ndəya alenya njirawawa'a inda kwa mər tlə ku ki təl. 12 Cha nar nda <<A da kəl ingə tanyi wa, naya tanyi ngə kwatam Esta tə na ya nəu təl yo ladər nda cha ɓatləya, ya əzəkə tsəu cha ɓəla na ea yi. 13 Kəl ja, a dəhə sə'ingə da pinda ɗufwa ya wa, manda tsəu ta ɗa kwa la'a Modekai ndər Yahuda ngə tsalə nya nyaki təl.>>
14 Ngə Zeresh mala Haman ana ka bazhi nya Haman tə nar nyi, <<Hya'andə wu nda dzəgamkur nyi ku ɗa jigahi məɗəfəkumənyi parnya tufəu, ka narnyi nə təl əmbudla, nja kukwanda Modekai kyati. Ahir nga ka təra yatə mwar ladər ka mər hirngyaɗi.>>
Səngə nda pə ngə tə ɗa nə Haman, ngə cha mər wi nda nda nar nyi.