Modekaia tə Gwa'a vala tsa Esta
4
1 Nda Modekai tə ngatə dəhə sə'inda nja məra, ngə cha tətanda lukutə dzənyi, ga pədzə nə sə'ingwa, ga tsəkəu pətsəɗə ku kəra cha, ngə cha təra biyo ta mələm cho lələ uwaluwaləu. 2 Kəl ja, nda cha həya nyaki təl a da cha gwa wa, aka a da ndo ngyar ndə nda lukətə sə'igu cha gwa wa. 3 Aku dəhə mələ ana mətla nda mafakə təl ana tsaubar nyi tə həya, kəl njir Yahuda kwa mər huɗətla gagaɗa ndo səmdzən ndo ləla. Nji ɗang ku pama nda tə piya na lukutə sə'ingwa ana aku pətsəɗəu.4 Nda kə'i kwatəra Esta ana shili inda a kiɗa da wa inda kwa mər tlər nə Esta tə shili nar nyi sənda Modekai kwa, ngə Esta tə gwa ku ɗəngha gagaɗa. Cha sətənyi lukutə ka cha səɗənda nə sə'ingu nda cha handzi, kəl ja, a da cha dləu wa. 5 Ngə Esta tə nga Hatak zhang ku huɗa ngərdzəuna təl, inda kwa mərtlər nə nyi, ga nar nyi cha gwa'abiya ndara mi nga wendə Modekai ana a kamya.
6 Ngə Hatak tə biya həya Modekai biyatə babal məməl a nya nyaki təl. 7 Ngə Modekai tə parnyi dəhə sənda tə ɗa nacha, dəhə ka təkəɗər kwaba nda Haman tə mər alkawal ənfa cho pəu ku məɗəwa təl aka kuɗənda njir Yahuda. 8 Ətsəu cha nə nyi kainau nda nja tsəfə ku susa ka nja zhazhinda njir Yahuda, ka cha yi char nyi ana ka cha dəkəbiya nyi nə Esta. Cha nar nyi ənda, cha nar nyi nə Esta cha gwa da təl cha gədi nja ngatə təhuɗə nənyo nji.
9 Ngə Hatak tə gwa par nyi sənda Modekai tə na anə Esta. 10 Ngə Esta tə ɓəlandə biya da Modekai cha biya nar nyi, 11 <<Dəhə njirawawa'a ki təl zəndə ti, ənda kala sal ndara malakə nda tə gwa da təl ya a da nja nga nyi wa, njo tsəya nyi, nacha ngə gadlagadla təl. Wur sənda kwa mbəɗandə pya tlakənyi nacha ma təltə lətə tamba bəjingha. Ənya, makərkumnyi nə hanyi nda nja nga ɗa gwa da təl.>>
12 Nda nja biya nar nyi sənda Esta tə dəkə nə Modekai, 13 cha sətə nyi nə Esta bəra <<Ngwa ka har ənda njo kuɗənda alenya njir Yahuda ba'a ngya nghə na pi kanda kə ku ki təl wa. 14 Aka ma ka da'ata nghə ku chul nənna bəji, vala kwa nau səya nə njir Yahuda hya'atə kya huɗamələm, kəl ja, naka ana ki ada ngha, njo kuɗənda hi. Wa zəndə ndara ka chul nənna biji nə nja fiya nghə ka kwatama?>>
15 Ngə Esta ɓəlandə mafakə nənnə nə Modekai, 16 <<Ma'i, ka tsəmtə dəhə njir Yahuda inda na ngya ku Susa hya səmdzən ana pətlənya ka ya. Ngwa hya da səm ndara hya sa vanya sə wa nə hanyi makərəu ana vu'i makərəu. Ma hya mər ənga, yo gwada təl madangə tsaubar katə ti. Ya macha yo tə ma ya mər ənga, ba'a ya tah.>>
17 Ngə Modekai tə təra ga mər sənda Esta tə nar nyi.