Njir Yahuda tə Kura njir Dawa Kənda
9
1 Pishir kwabəmakərkunya pəchi nə hya Batəlar, hya Adar, njo nəbiya gadlagadla nda təl tə fəya. Pishi nga, njir dawa njir Yahuda, tə harə ndo kura nda, kəl sakan ja, ɓaɓiya shakənyi ti nə mala pi, njir Yahuda tə uya kwasa atəkəra nji'inda pa'a i nda. 2 Njir Yahuda tə tsəmtədzə ku dəhə mələm kənda aku dəhə mətla təlkur təl Zazəs ka nda pa nji'inda kwa kuɗənda nda. A ndər nau ta'i man nda da wa, aka dəhə alenya nji'inda pa'a njir Yahuda kwa ngatə ləvər tsa nda. 3 Ana dəhə njirawawa'a inda ku mətla inga, satraps, kə'i gwamna ana njir mərtlər təl tə vala njir Yahuda aka ndo ləvər tsa Modekai da səya nda 4 Modekai tə ɗa ka ndəradəgal gagaɗa aku ki təl, nja ngatə tləmə nyi ku dəhə mətla ngə cha udə ɗa na gyalkur gagaɗa.5 Njir Yahuda tə dlənda njir dawa kənda na katsakər, ndo tsa ndo kuɗə nda, nda mərtə sənda kəra nda tə i nə njir dawa kənda. 6 Aku ta mələm Susa njir Yahuda tə kuɗənda shili 500. 7 Ətsəu nda tsəya Parshandata, Dalfon, Aspata, 8 Porata, Adaliya, Aridata, 9 Parmashta, Arisai, Aridai na Vaizta, 10 nguil shili kumə Haman zər Hammedata, ndər dawa njir Yahuda. Kəl ja, a da nda fa'a kwazhalɓi wa.
11 Pishinda tanyi nja yi dəkar nyi ɗangkura nji'inda nja kuɗənda ta mələm Susa. 12 Ngə təl tə nar nyi nə Kwatam Esta, <<Njir Yahuda kuɗəndatə shili 500 ana nguil Shili Haman kuma ku mələm Susa. Mi nda mər ku alenya mətla inga? Sakan ja, mi ko gwa'a? Njo nə ngha. Mi sənda ko gədia? Njo mərtə ngha.>>
13 Esta tə wuma, <<Macha təl kwa i, ngyanyi na laku nə Yahuda inda ku Susa, nda ɓəla nəu gadlagadla nə zəkə tsəu, ana nja kukwanda nguil Haman kumə ingə kyatə wua.>>
14 Ngə təl tə na nja mər ənga. Ngə fiya gadlagadla ku Susa ənda nja kukwanda nguil shili Haman kuma. 15 Njir Yahuda inda vu Susa tə tsəmtə dzə pishirkwabufwaɗəkunya hanyi ku hya Adar ga kuɗənda shili 300 ku Susa, kəl ja, a da fa'a kwazhalɓi wa.
16 Əngə tanyi tsəu alenya njir Yahuda inda tə əyadzə ku alenya mətla təl tə tsəmtə dza ka nda pa njir dawa kənda. Nda kuɗənda nji dubəu məɗəfəkumənyi parnya tufəu kəl ja, a da nda fa'a kwazhalɓi wa 17 Səngə tə ɗa pishir kwabumakərkunyha hanyi ku hya nə Adar ngə nda ɓəliya sar pishir kwabufwaɗəkunya hanyi, ga mərtənyi ka pəchir ladər ana hirgyaɗi.
Ladər Purim
18 Kəl ja, njir Yahuda inda vu Susa tə tsəmtədzə pishir hanyi kwabumakər, ana kwabufwaɗəu ga ɓəlyasar pishir kwabutufəu ga mərtə nyi ka pəchir ladər ana hirgyaɗi.
19 Nacha gwa'atə njir Yahuda inda biyatəya mələm tə fiya hanyi kwabufwaɗə nə hya Batəlar ka pəchir hirgyaɗi ana ladər, pishir təkə ga'a nə kərnənda.
20 Modekai tə recodtə dəhə sə'inda tə ɗa, ga lətə nyi kainau nə dəhə njir Yahuda inda na ngya ku mətla təl Zazəs, ləhə ana inda naɗəu, 21 ka nda maka mər ladər kwabufwɗə ana kwabutufəu nə hya Batəlar, 22 pishinda njir Yahuda tə mbəɗə ku cha njir dawa kənda, ana hya nda huɗatla kənda tə sha ka hirgyaɗi, ana sə'igu kənda tə sha ka ladər. Cha nar nda nda ɓəlatə pəchi inga nda ɗa ka pəchi nda ndo mər ladər ana hirgyaɗi ndo təkə ɗəfə ana ga'a nə nji ɗaliɗali.
23 Ngə njir Yahuda tə dləukəri ənda ndo biyama na mər sənda nda ghəya, ndo mər sənda Modekai tə tsəftə nda. 24 Aka Haman zər Hammedata, ndər Agag, ndər dawa njir Yahuda, tə gwa'a ka cha kuɗənda njir Yahuda, ga ɓəlshiu ka nja zhazhinda nda. 25 Kəl ja, nda təl tə ngati, ngə cha lətə tsəftsəfər gadlagadla əmda sənda Haman ɓatləya kwa ɓəl shili kəra Haman, ana ənda nja kukwanda Haman ka nguil shili nyi atə wua. 26 Nacha gwa'atə nja nga ha'inga Purim hya'tə ku Pur. Aka dəhə sə'inda nja tsəfətə ku kainau na ana aka sənda nda la'a tə ɗa na nda, 27 njir Yahuda tə la'a tsatsa'a tanyi nda fiya nyi ka sər jival kənda, ənda kala ndənda kwa da ɗa ka ndər Yahuda kwa ɓəlatə hanyi mətlə inga a tsau da wa, aku laku nda nja na njo məra ana atə pəchi nda nja tabiya. 28 Kala ki ku kala zamin kwa ɓəlatə pəchi inga, ana aku kala mətla ana mələm. Ya ngwa njir Yahuda da ba'a ngyar mər ladər tə pəchir Purim inə wa, ya ngwa ngyar far na pəchi inə ku pama nyandəla nda wa 29 Aka Kwatam Esta, kwar Abihayil, nacha na Modekai dər Yahuda, tə tsəfə na dəhə gyalkur ga nda char təkəɗəkura mətləkunya kainau na atəkəra Purim. 30 Ngə Modekai tə lənda kainau kyo mətla 127 nə təlkur Zazəs, mafəkə usa ana assurance, 31 kanda ɓəlatə pəchir Purim atə bəji nda nja fiya, wi nda Modekai ana Kwatam Esta tə tsau nda bar, wi nda nda nda fiya nyi nə kərnənda ana nyandəla nda, bəjir səmdzən ana sə'ingwa. 32 Tsəfə Esta tə chabiya təkəɗəkura tsaubar təkəra Purim, ngə nja tsəfəu ku likatkatə sə'inda tə ɗa.