Gwazhilakə tə Kəra Ɓiti
11
1 Bəzətə Gwazhilak nghə gwatə ɓiti, aka ahir hanyi ɗanghəu ko ɓəla uya nyi səkəu.2 Təkəbiya sənda tsakə məɗəfə ndara chisəu aka a da ka zəndə chul təmachi nda kwa shili təkəra dunəya wa.
3 Mada təwa bari wu tə dla, bwanda cha səya ti, tangnda cho ngya. Ma ləmbəkə tə nyi na ɓiti, cho pənda par.
4 Dəhə ndə nda kwa səkə gyang da kwa tləka wa, dəhə ndə nda kwa dzam lumbəkə da kwa mərəya ada mi wa.
5 Tang wi ngə a da ko laku nda gyang kwa nəu wa ndara ənda dza ndə kwa mər ku ta ama nyi wa, əngə tanyi tsəu a da ko ngabiya tlər Hyel wa, ndər ɓatlə dəhə səu.
6 Ka tləka chili ngha umbudla ana akəu, aka a da zəndə ndara vanya tləka kwa ɗa matsa vanyi wa.
Ka ɗənghatə Ndər Ɓatlə Ngha tsəu ta nghə tlakala
7 Vəl vimbəlmbələ sə mənakə nga, ya sə mənakə chw lya ndə ndzam pəchi
8 Mada na ndə fa ɗanghə, ngwa cha ngatə məsəɗakur na nda. Kəl ja ɗəghatə pəchir kutla, aka ɗanghə nda. Dədə sə'indaa kwa shili ɓwa'atanyi.
9 Mər hirgyaɗi tlakala, tsəu kə tlakala. Ɗəfwakə tsə cha nənghə hirgyaɗi tsəu kə ku bəjir tlakatlakur ngha. Nəu ɗəfwa ka ana dəhə sənda lyakə tə la'a, kəl ja, ka zəndi Hyel kwa mər nəuma təkəra dəhə sə'inga.
10 Aka ənga həbiya ɗəngha ku ɗəfwa ka, ana ka təkə na dəhə sənda kwa gwa'atə ko ɗugha, aka tlakalkur ma'a ɓwa'atanyi.