10
1 Wi ngə chikɗi tətə kwa gwa'a mal nda kwitkwitə kwa shi'uni ɗimi, əngə tanyi kəkəngkur kushi kwa səwandə dəma ana dəgalkur. 2 Ɗufwa ndər dəma kwa gwa'atə cho mər sənda tsatsa'a, kəl ja, ɗufwa ndə kəkəng kwa gwa'atə cho mər sə ɗimi.3 Ndə kəkəng mada ma'i cho ma'i kəl cha char ənda ndə kəkəng cha, ya cho chabiya nyi nə madawa ənda ndə kəkəng cha.
4 Ma huɗa ndə təltəl tə tl na ka, ngwa ka da kusa ngyar mbwanda kə tə wa, ma ka pinda ɗufwa ka njo nau far biki wawa'a.
5 Vanya sə pəla'a nda la'a tə dunəya nacha ngə, bikə dəgal nda ndər təlkur kwa məra. 6 Njo nənyi gyalkur nə nji kəkəng, a da njo ɗəngha na njir gəna wa.
7 A ɗaka təya la'a mavi'i kwa dlə taku, nguil təl tsəu kwa ma'i na hi wi mavi'i.
8 Ndə nda la ka'u pəlakur ngə kwa təɗə gwa kwa, ndə nda huɓənda ɓangtili tsəu nacha ngə pwabu kwa ngaliya.
9 Macha ku mbwar huɓə hangu ko mər tləra, hangu kwa takasiya ngha, ndər huɓə shilu'u tsəu kwa gwa ku təmachi.
10 Ma hira kəm tə dəɓərəsəu, kəl na dunama uwal njo nau mər tlər ni. Kəl ja, dəma kwa shili na biyama.
11 A sakədar zəndəbiya ənda ko chamtə pwabə da ma cha wur ngaləya nghə wa.
12 Ɓwanya ndər dəma kwa shili na nyi səli, kəl ja, ɓwanya ndə kəkəng kwa səwandə ngyga nyi.
13 Cho ghəya na ɓwanya kəkəngkur, cho udəya na pəlakur ana məlləm.
14 Dəhəka ənga ndə kəkəng kwa ɓwanya atə vanyi atəvanyi. A ndə da zəndə sənda kwa ɗa wa, wa kwa nau dəkəbiya sənda kwa ɗa biyama?
15 Tlər ndə kəkəng kwa həɗandə nyi, manda kəkəngkur kwa wulfənda lya cha.
16 Sər təhuɗə naka, nakə mələm nda təl nghə zər kushiu, nguilsha'a təl nghə kwa mər ladər fwatə mbudla.
17 Ndər hirgyaɗi ka, nakə nda təl nghə ndəradəgal, nguilsha'a təl nghə mər ladər atə bəji nda tə ɗa tsatsa'a, a nda uya dunama a da ka nda wi na mbadlə wa.
18 Gwa'a dzə nənəm kwa gwa'atə kəra vi kwa dzədzi, haɗəwakur kwa gwa'atə kəra vi kwa ndza.
19 Njo mər ladər ka ngatə məsəɗakəkur, ɓitir anap tsəu ka nja nənyi hirngyaɗi tə ɗufəu, kwaba tsəu nja uya kala sənda njo gwa'a.
20 Mada ku ɗufwa ka, ngwa ka ngələ təl wa, ətsəu mada ku vi piya ngha, ngwaka da ngəl ndər gəna wa, aka vanya eakə kwa nau hətə sənda ka pəa, cho yi dəkar nda.