Tə ngə Ɓəltəkər Kala Ndəu
9
1 A səkər təya dzə yo jigadəma təkəra sənə ku ɗufwa ya ga ngwahibiya. Ya la'a njir jiri ana njir dəma ana dəhə tlər kənda ku cha Hyel ana ma'a nyida kənda ana hate kənda. A ndə da kwa zəndə sənda kwa ɗa na nda biyama wa. 2 Sə zhang ngə kwa səkə kala ndəu, a pam da kwa wa, ndər jiri ana ndə pəla'a, ndə nda kwa mər sə mənakə ana ndə nda kwa mər sə ɗimi, ndər mər sə hiɗahiɗa ana ndə nda pa'a kwa mər sə hiɗahiɗa, ndə nda kwa hatəmachi ana ndə nda pa'a kwa hatəmachi. Ndə nda kwa mər sə mənakə da ndiya ndə nda kwa mər səpəla'a wa, ndər səmfəla da ndəya ndə nda pa'a kwa huna wa.3 Janə sənda tə ɗimi ku dəhə sənda kwa ɗa ku ngyar dunəya na, nacha ngə sə zhang ngə dəhə nji kwa səka. Matsa ngə ma'a wa, aku ndə bəji nda ndə na pi ti, ɗufwa cha chaɓə na pəla'akur, atə udəyanyi tsə ba'a ndə tah. 4 Kəl ja, fəkər da anə ndə nda na pi, aka həya nda na pi ndəɗətə ləvari təta.
5 Aka nji'inda na pi zəndəti ənda ndo tah, kəl ja, a səda nji'inda tə kuɗə kwa zəndə wa. A tsəu vanya zhar da tsa da wa, a tsəu da njo ɗəghatə na nda pa'a.
6 Njo far na dəhə sənda nda mər ku sakanda nda na pi, nyida kənda, sənda a da ndo i wa, ana səlkəkur kənda. A tsə da ndoɓə sənda njo mər tə dunəya nə wa.
7 Ma'i ka kwwasə ɗəfə nghə na hirgyaɗi, ka sa mbadlə nghə na ɗufu mənakəu, aka nacha ngə sənda Hyel tə ɓatləya nghə sakana. 8 Kala bəji ka handzə dzaki mənakəu, ka ɗa ɗufu nə hirgyaɗi. 9 Ngatə məsəɗakəkur na mala nghə nda nyida ku dəhə hanyi kəla sakəda nda Hyel tə tlatsənghə tə dunəya na. Mər hirgyaɗi kwa, aka nacha ba nənghə na mbaɗə ku dəhə ɓwaɓwatə ngha. 10 Dəhə sənda ko məra, ka mərnyi na dəhə dunama ngha, aka a tləra ndara ɓatləya dza, ndara zəndi ndara dəma da ku hwa, mbwanghə ko ma'i ti ngə wa. 11 Vanya səda ya la'a tsəu, a da kala bəji ngə ndə nda kwa hwi kuskusə kwa shili tangərma wa, ndara ndər dunama kwa kura wa, ya a da kala bəji ngə ndər zəndə kwa sərsumə wa, ndara njir dəma ngə kwa uya gəna wa, dəhə nda bəji tanyi nga. 12 Ngan ma'a a da ndə da kwa sakanda bəji kwa shili tə wa. Winda njo sə kalfi na hiɗi ana eaku kwa gwa ku ləbam, əngə tanyi bəji pəla'a kwa səya nji.
Bəliya Dəma tsa Kəkəngkur
13 Vanya sə da ya la'a tsəu, ba'ada mənakə nda dəma ni, sə dəgal cha na'a gagaɗa. 14 Vanya zər mələm da ɗakaɗa, ana nji tsaɗə kwa. Ngə vanya təl nda gyalkur tə shili ga ɓandə zər mələm nda ga hərtə səi'inda njo gi ti ka nja dləgəlbiya ɓangtili mələm nda ka nda gwa pa nda. 15 Aku mələm tsəu, vanya ndə ɗaliɗali da kəl ja, ndər dəma cha, ya cha mbəɗdandə mələnda ana dəma nyi. Kəl ja, a ndə tə ɗənghatə na ndə ndə ɗaliɗali nda wa. 16 Ngə ya na, <<Bələya dəma tsa dunama.>> Kəl ja, a da njo səlir dəma ndər ɗdali wa, a tsəu njo səhimi da ɓwanya nyi wa.
17 Bələya nja səhimi da ɓwanya ndər dəma, tsa njo ngatə tsə nda ndə təltəl kwa məra ku pama nji kəkəng.
18 Dəma ndiya tə kar pah, kəl ja, ndər səpəla'a zhang kwa səwandə sə'inda mənakə ɗanghəu.