8
1 A ndə da wi ndər dəma wa. Wa tə zəndəbiya təkəɗəkura səa? Dəma kwa mərtə huɗəma ndə kwa mbəla, kwa zhabiya dza cha.Hətənyi Səli nə Təl
2 Ka mər sənda təl tə nar ngha, aka ka alkawal nda hətə mar Hyel. 3 Təl kwa nau mər sənda kəra cha tə har nyi, aka ənga ngyar huɗə təl, ngwa ka ngya tə chul mbwa nghə wa. 4 Təl kwa mər tlər na gyalkur, ya a ndə da kwa nau jau nyi <<Ka mi ko mər səngə wa?>>
5 Ma ndə nda tə nəubiya tsaubar təl, cho uya mbəɗə,
ya ndər dəma kwa zəndə biji ana ənda cho məra.
6 Kala ɓwanya, biji nyi da ana laku nyi,
mada ngə ɓwaɓwatə nji ɗanghəu.
7 Manda a ndə da kwa zəndə sənda kwa ɗa biyama wa ya,
wa kwa nau par nyi sənda kwa shili biyama?
8 A ndə nda na gyalkur təkəra səpi nyi wa,
ya ndə da gyalkur təkəra pəchir tə nyi wa.
Wingə a ndə da na gyalkur cha ngyar nya dla'a wa,
a vanya ndə pəla'a da kwa mbəɗə tsa pəla'akur nyi wa.
9 Ngə ya la'a dəhə sə'ina, nda ya jigadəma təkəra sə'inda kwa ɗa tə dunəya, dunəya nda alenya nji na gyalkur alenya nji tsəu kwa sa ɓwaɓwatə da kiɗa nda. 10 Vəl, a la'atəya ənda nja haɗəya njij pəla'a ku hu kənda, ya aku lakur ɓəl kyo ki nji kwa fal nda aku mələm nda nda mər pəla'akur kənda. Nənnə ma'a ɓwa'atanyi.
11 Macha ɗə biji na tla nəuma nə ndər bikəu, nji kwa biyama na mər sə ɗimi.
12 Mada ndə ɗimi tə mərtə bikə uwaləu ngə nja ngya nyi na pi biji uwaləu, a zəndətəya ənda ngya ndə nda kwa ləvər Hyel kwa ɗa mənakə. 13 Dəhə ka ənga, aka ndə pəla'a da kwa ləvər Hyel wa, a ngya nyi da kwa ɗa mənakə wa, ya a hanyi nyi da kwa ɗa pələkə wa, wi shanguɗa.
14 Vanya sə kəla sakəda da tə ɗa dunəya, sənda kwa uya nji tsatsa'a wi nji oəla'a nda, ana nji pəla'a inda kwa uya sənda nji tsatsa'a kwa kina uya. Kərnya ngə ma'a ɓwa'atanyi. 15 Aka ənga ya na, sə mənakə ngə ndə ngatə məsəɗakur ku ngya nyi, aka a vanya sə da tə ndəya ngə wa, ndə səm tlər nyi cha ngatə məsəɗakəkur ku ngya nyi. Səngə kwa fətə ɗufə aku tlər nyi ku dunəya ku hanyi inda Hyel tə tlatsə nyi tə dunəya.