Dəma
7
1 Tləm mənakə ndiyatə sə shi'uni kwitkwit nda nja ɗəl na kwaba uwaləu, ya pishir tə ndiya tə pishir ya.2 Bəliya ka ma'i kyo ki nda njo sə'ingu kwa tsa ko kyo ki nda njo mər ladər kwa, aka tə ngə ssunda kwa səka madawa, ya nji'inda kwa kina fəu əngə ku kəra nda.
3 Bəlya huɗətla tsa gyaɗi, aka ma huɗətla kwa shili na ɓatlə nə ɗufu.
4 Ɗufwa ndər dəma ku ki sə'ingwa, kəl ja, ɗufwa ndə kəkəng nənyi ku ki ladər.
5 Bəlya ka səhimi da tsə nda ndər dəma kwa tsə ngha, tsa ko səhimi da falə nda ndə kəkəng kwa fal ngha.
6 Winda shikəɗi kwa ndəndəla da kiɗa təm nda tə hu'u, əngə tanyi gyaɗi ndə kəkəng. Kəl nya ngə ma'a a sakədanyi da wa.
7 Mada dəma tsa ka, ma ka ɗiya ndəu ko ɗa wi ndə kəkəng, ma ka dlə vangula, ko səwandə kərngha.
8 Ənda njo udəya sə ndəya tə ənda nja ghəya, ya bəliya susu'u tsa həkər.
9 Ngwa ka da ɗa ka ndə nda na ɗufwa cha kachə wa, aka ndə kəkəng ngə kwa mər huɗətla.
10 Ngwa ka da na, <<Mya gwa'a sə'inda ha'aɗa tə ndəya inda sakana?>> Aka chul jau nghə ngə da jau dur wa.
11 Mənakəkura dəma wi sər fa'aki cha,
ana sakəda cha nə dəhə nji'inda na pi,
12 ya cho ɓəlatə ndə
winda kwaba kwa məra.
Dəma kwa ɓəlatə pya ndə nda ni,
nənnə ngə sakadə zəndi.
13 Ndzamar tlər Hyel, wa kwa nau hya'abiya sənda wur ngatanya?
14 Ma biji nda sə tə ɗa mənakə nəngha, mər hirgyaɗi, kəl ja, aku hanyi inda sə tə ɗa ɗimi, ka ndzamari, Hyel ngə tə mər nda kya'a. Aka ənga a ndə da kwa nau zəndəbiya sənda kwa ɗa nacha biyama wa.
15 Aku hanyi ɗa inda kəla na sakəda, ya la'a dəhə sə'ina, a njir tsatsa'akur da kwa kuɗə ndo ngyar nji pəla'a dəhə ka pəla'akur kənda.
16 Ngwaka da ɗa tsatsa'a gagaɗə ndara ka ɗa ndər zəndə gagaɗə wa, ka mi ko tsəya kərngha?
17 Ngwaka da ɗa ka ndə pəla'a gagaɗa wa, ya ngwaka da ɗa ka kəkəng wa, kami ko tə təvi biji nghə kwa ɗa?
18 Maka gəzəya zhang ngwa ka da wunənda vanyi ngə wa. Macha ləvər Hyel ku ka, ko uya biyama mada təwa bari.
19 Dəma kwa mərtə ndə zhang na gyalkur ndiya sənda njir təlkur kuma kwa nau mər nə mələm.
20 A ndə da tsatsa'a tə dunəya nda kwa mər sə tsatsa'a kala biji a da cha kwa mər səpəla'a wa.
21 Ngwaka da fə kərakə ku kala sənda nji kwa dəkə wa, pa'a əngə wa ko ngatə ənda mava nghə kwa ngəl ngha.
22 Aka kwa zəndə kə ku ɗufwa ka ənda nakə ma'a kwa ngəl kə nji alenya biji.
23 Ya dzətə dəhə sə'inə na dəma ga na, <<Kwa i ya ka ya ɗa na dəma,>> kəl ja, sə sənyi ndəɗətə dunama ɗa.
24 Aman ndə kwa nau zəndəbiya sənda pi təkəra? Dzuɗakə cha gagaɗa, dza'u njo nau ngabiya. 25 Kəl ja, ya nənyi kərɗa nə zəndi ana kəratsən, ya ɓatləya ka ya uya dəma ana wumə nə jau ind ku kəra ya, ana ya zəndə ndara aman ngə pəla'akur ana kəkəngkur.
26 Ya la'a vanya sənda tə ndəya tə na ɗəwatəkur, mala pəla'a na nacha ngə kəkəngkur. Nyida nda cho char nghə kwa səya nghə wi ləbam. Ana cha cha nda cha gaɓətə nghə ni kwa ɗa wi dzəra lyang. Ndə nda tə mər sənda Hyel kwa i, kwa mbəɗə tsacha, kəl ja, cho takultə ndər mər səpəla'a.
27 Ngə maləm nda na, <<Ndzama, janə sənda ya gwa'abiya,
ya gwa'a ya zəndəbiya wum jau inda ku kəraya sam saməu.
28 Tsəu ta ɗa kwa gwa'a
ya a da ya uya wa,
ngə ya uya ndər tsatsa'akur zhang aku pama nji dəbəu,
kəl ja, a da uya mala nda tsatsa'a mada zhang wa.
29 Jan wuɗəkər sənda ya uya,
Hyel tə mərtə ndə tsatsa'a,
ngə ndə tə səwandə ngyanyi.>>