Nja Ngatə Ləvər Hyel
5
1 Ma ka yo ki Hyel, ka sədzə himi mənakəu. Bəliya ka sə himi tsa lə ga'a ana hatəmachi ya ko nəu nya Hyel wa, kəkəngkur na.2 Ngwa ka da ɗa ka ndər kusa ɓwanya wa, ndara ka ngyar ɗufwa kə cha kusa biyandə ɓwanya mar Hyel wa. Hyel ki huɗamələm, nakə tsəu ku duniya ka, aka ənga ka mərtə ɓwanya nghə tsa'u. 3 Winda jigadəma uwaləu kwa shili na shi'uni, əngə tanyi ɓwanya ndə kəkəng ma ɓwanya tə ɗa pələkəu.
4 Maka hətə salkur mar Hyel, əngwa ɗə biji na nyabiya salkur nghə wa. 5 Bəliya a da ka hə salkur wa, tsa ko hə salkur a da ko nyabiya wa. 6 Əngwa i nya kə təɗəkə nghə səpəla'a wa. Ya ngwa kə da ɓəlakə nyi nə chama mbwa'alə ənda <<Ku tar zəndə ngə ya hə salkur wa.>> Kami ko tləya nyi huɗa hyella? Ka mi ko gwa'atə Hyel kwa wazənda sənda ka mər tlər kara? 7 Hə salkur ya a da ko nyabiya wa wi shi'uni kəla kər cha, atəvəra ənga, hətə nyi səli nə Hyel nyabiya sənda ka hə salkur təkəri nə Hyel.
A Sakəda Gəna da wa
8 Ma hya la'a njo nənyi ɓwaɓwatə nə nji ɗaliɗali ana a da njo nəu jiri wa ngwa da ɗəngha wa. Aka kala gau, gau da gya kəra cha ya alenya nji da təkəra nda tsəu. 9 Ma'a təl kwa na təku nja shili na nyi sə zwazwa.
10 A kwaba do nji ndə nda kwa nyida kwaba wa, əngə tanyi ma'a ndər nyida gəna a gəna da kwa nji nyi wa. Kərnya ma'a ɓwa'atanyi.
11 Ma gəna kwa tsaka, njir səmə kwa tsakə tsəu. Zhar mi ndər gəna kwa uya, matsa cha zəndə ənda ndər gəna cha?
12 Mada ndər mr tləra uya sərsumə uwal ndara kushiu, cho nji hanyi mənakəu. Kəl ja, a gəna ndər gəna da kwa ngya nyi cha nji hanyi wa.
13 A la'a təya vanya sə ɗimi tə dunəya, sənda ndər gəna tsəməti tə shili na nyi huɗatla, 14 ndara gəna nda kikila aka vanya təmachi, tə ɗa a vanya sə da kwa həyadzə nda cho ngya nyi nə nguilisha'a wa.
15 Dura'a ndə tə zəbiya ku ta ama nyi, ya dura'a cho ɓələu. A səda cho gəzəya ku cha cha hya'atə ku tlər nda cha mər wa.
16 Nənnə tsəu, sə ɗimi nga, wi nda ndə tə shili əngə cho ɓələu, mi cho uya ku tlər gəzə gyang nda cha məra?
17 Ya jan ngan ja, dəhə ngya nyi ku kutla, ana ɓwaɓwatə gagaɗa, ana ɗəngha, ana shiləka ba'a huɗətla.
18 Ngə ya ngabiya ənda sənda ndo kina məra nacha ngə cha səm cha sa, cha ngatə məsəɗakə na tlər nyi aku nguil hanyi inda Hyel tə tlatsə nyi ku dunəya na, nacha ngə sənda Hyella ɓatləya nyi nə ndəu. 19 Ma Hyel tə nə nyi gəna nə ndəu ga ngya nyi cha səma, yau cha mərtənyi usaku nə Hyel cha səm tlər nyi, nənna ga'ar Hyel nga. 20 A chul ngəna ndə da kwa maka ɗəngha wa, aka Hyel kwa nənyi sənda cho gwa'a.