16
1 Nda shili na gwarara mbandər Hyel ga gwa fiya da kiɗa madləɓa nda Dauda latə nyi, ngə hatəmachi nə nginda ana nə daɓəkər biyamar Hyel. 2 Nda Dauda tə wurandə hatəmachi nə nginda ana daɓəkər, cha səkənyi papa'akur nə nji aku tləmər Tlakəu. 3 Ngə nənyi gwazhilak, kum ba'a anap uləulə nə kala ndər Isra'ila shili ka ma'ihi.4 Ngə fiya alenya njir Levi kanda mər tlə biyamar gwarara Tlakəu, nda shili na gədi, usaku ana nda falə Tlakəu, Hyel nə Isra'ila. 5 Asaf ngə gau kənda, Zakariya ngə ta'a ndzənyi, kəl Jeyiyel, Shemiramot, Jehiyel, Mattitiya, Eliyab, Benayiya, Obed Edom an ajeyiyel. Tlər ngə nda mbəɗə mbalau ana nda tsa gulum, Asaf tsəu cha tsa simbals, 6 Benayiya ana Jahaziyel pərist nda mbədə papam kala biji biyamar gwarara mbandər Tlakəu.
Miya Dauda nə Usaku
7 Pishinda tanyi, Dauda tə nar nyi nə Asaf ana ka zamənyi nda na miya falə nə Tlakəu.
8 Mərtənyi usaku nə Tlakəu, nga tləm nyi, ka chabiya sənda cha mər ku pama jul nji.
9 Nar nyi ma miya, aa nar nyi ma miya fala, hya dəkəbiya dəhə nyi inda wawa'a.
10 Hya bulə ku tləmənyi nda karti, ngwa ɗəfwa nji'inda kwa gwa'a Tlakə mər hirgyaɗi.
11 Hya ba'akər da Tlakə ana dunama nyi, hya gwa'a huɗəma cha kala biji.
12 Ɗənghatə na sər məngəl nda cha məra, səshinshin nyi ana nəuma inda cha tlanda,
13 Nahi nyandəla Isra'ila, mava nyi, nahi nguil shili Jakopəu, inda cha ɗəmtsi.
14 Nacha ngə Tlakəu, Hyel kəmən, nəuma nyi ku dəhə dunəya. 15 Cha kwa ɗənghatə mbandər nyi ba'anawa, ana ɓwanya nda cha dəka zamin dubəu. 16 mbandər nda cha mər na Ibrahim, alkawal nda mər nə Ishaku, 17 Cha mbandər Jakopəu, mbandər nda kwa ngya ba'anawa, 18 bəra, <<Yo nə nghə hə'i Kan'ana ka cha ɗa sər fa'aki ngha.>> 19 Aku bijinda tsaɗə ta nda, kushu gagaɗa, ya mihiɓi nda a kwa, 20 nda kwa ma'i hya'atə ku vanya mələm yo vanya mələm. 21 A da cha i vanya ndə ɗa məndzau na nda wa, atə dəbar kənda cha təɗə himya ka təl ka təl i'i. 22 <<Ngwa tsəkər ndə nda ya dzəvəya wa, ngwa ka da takasiya ndər mətakər ɗa wa.>> 23 Na ma miya nə Tlakəu, ɓwanya ma təkəra dləuya nyi kala pəchi. 24 Chabiya ma səli nyi aku pama jul nji, ana sər məngəl nyi ku pama nji. 25 Aka Tlakəu ndə dəgal cha, a kiti nja falə nyi gagaɗa. Tuku nja ngatə ləvər nyi matsa alenya hyel i'i.