فصلِ شَشُم
اِنتِخابِ هفت خِدمتگارِ نیک نام
1 دَمزُو روزا وختِیکه تعدادِ ایماندارا کَلو شُده رَیی بُود، یهُودیای یونانی زِبو از یهُودیای عِبرانی زِبو گِله کد که دَ خاتُونوی بیوِه یونانی زِبو دَ تقسِیمِ خوراکِ روزانه بےتَوَجُه‌یی مُوشه. 2 پس امُو دوازده رسُول تمامِ یارا ره کُوی کده گُفت: ”اِی دُرُست نِییه که مو از خاطرِ وظِیفِه نان دَدو دَ تعلِیم دَدونِ کلامِ خُدا کم-تَوَجُه‌یی کنی. 3 پس اَی بِرارو، از بَینِ خودون خُو هفت مردِ نیک نام، پُر از روح اُلقُدس و پُر از حِکمت ره اِنتِخاب کُنِید تاکه اُونا ره بَلدِه امزی کار مُقَرَر کنی. 4 بعد ازُو مو وخت خُو ره دَ دُعا و دَ تعلِیمِ کلامِ خُدا مَصرَف مُونی.“ 5 پس تمامِ جماعت اِی پیشنِهاد ره قبُول کد و اینی نفرا ره اِنتِخاب کد: اِستیفان، مَردی که پُر از ایمان و روح اُلقُدس بُود، فِیلِیپُس، پروخورُس، نِیکانور، تِیمون، پَرمیناس و نِیکولاوئس از شارِ اَنطاکیه که از سابِق دِینِ یهُود ره قبُول کده بُود.a 6 اوخته جماعت امی هفت نفر ره دَ رسُولا پیش کد و رسُولا دِستای خُو ره دَ بَلِه ازوا ایشتهb دُعا کد. 7 و کلامِ خُدا روز دَ روز دَ بَینِ مردُم تِیت مُوشُد و تعدادِ پَیرَوا دَ اورُشَلیم هر روز کَلو شُده مورَفت و تِعدادِ کَلونِ پیشوایو ام تابِع ایمان دَ عیسیٰ مسیح شُد.
دِستگِیر کدو و کُشتونِ اِستیفان
8 اِستیفان که پُر از فَیض و قُوَتِ خُدا بُود، دَ بَینِ مردُم چِیزای عجِیب و مُعجزه_ها انجام دَد. 9 مگم یگ تِعدادِ یهُودیا از جماعتی که دَ نامِ «جماعتِ آزادَگان» مشهُور بُود و از قِیروان و سِکندَریه و یگ تِعداد شی از قِیلِیقیه و آسیاc بُود، باله شُده قد اِستیفان جَر-و-بَحث ره شُروع کد. 10 مگم اُونا تاب اَوُرده نَتنِست، چراکه اُو قد حِکمت و قُدرتِ روح توره مُوگُفت. 11 پس اُونا چند نفر ره وادار کد که بُگیه: ”مو شِنِیدی که اِستیفان دَ ضِدِ مُوسیٰ و خُدا تورای کُفر آمیز مُوگُفت.“ 12 دَمزی رقم اُونا مردُم، رِیش سفیدا و عالِمای دِینِ یهُود ره دَ شورِش اَوُرد و اُونا دَ سرِ ازُو اَمَده اُو ره دِستگِیر کد و بَلدِه محاکمه کدو دَ پیشِ شورا بُرد. 13 اُونا شاهِدای دروغی تَیار کدُد که گُفت: ”اِی نفر یکسَره دَ ضِدِ امزی جای مُقَدَّس و دَ ضِدِ شریعت توره مُوگه. 14 مو دَ گوش خُو شِنِیدی که مُوگُفت: ’عیسای ناصِری امی جای ره خراب مُونه و رسم-و-رَواجی ره که از مُوسیٰ بَلدِه ازمو مَنده، تغیِیر مِیدیه.‘“ 15 تمامِ کسای که دَ امزُو شورا حاضِر بُود، چِیمای خُو ره دَ اِستیفان دوختُد و دِید که رُوی شی رقمِ رُوی ملایکه اَلّی شُد.