خطِ پولُس بَلدِه ایماندارای رُوم
پیشگُفتار
پولُس اِی خط ره بَلدِه ایمانداری رُوم بخاطری نوِشته کد که میخاست جماعتِ ایماندارِ رُوم ره مُلاقات کنه. مقصدِ پولُس اِی بُود که چند وخت دَ مینکلِ ایماندارای رُوم خِدمت کنه و بعد ازُو دَ کومَکِ ازوا دَ اِسپانیا بوره، مگم پیش از سَفر باید خود خُو و عقِیدِه خُو ره بَلدِه ازوا معرفی مُوکد.
پولُس دَ امزی خط دَ بارِه مسیح، نِجات، ایمان، رابِطه بَینِ یهُود و غَیرِ یهُود و رابِطه بَینِ ایمانداری مسیح و حُکُومت توره مُوگیه و ایمان دَ مسیح و عملی کدون شی ره دَ زِندگی روزمَره تشریح مُونه. اُو بیان مُونه که چی رقم خُدا دَ وسِیلِه فَیض، مردُم ره قد خُو آشتی‌دَلجی کد و مُوگیه که یهُود و غَیرِ یهُود لازِم اَسته که رابِطِه خُو ره قد خُدا جور کنه، چُون پگِ اِنسان_ها یگ رقم زیرِ بارِ گُناه اَسته. پولُس بیان کده مُوگیه که امُو فَیض، عیسیٰ مسیح اَسته و مردُم دَ وسِیلِه ایمان اَوُردو دَ مسیح مِیتَنه قد خُدا آشتی کنه و صاحِبِ زِندگی نَو دَ مسیح شُنه و از قَیدِ گُناه و مَرگ خلاصی پَیدا کُنه.
پولُس امچُنان دَ فصل_های ۹ تا ۱۱ بیان مُونه که ایمان نَوُردونِ مردُمِ یهُود دَ عیسیٰ بحَیثِ مسیح دَزی معنیٰ نِیَسته که خُدا اُونا ره رَد کده؛ پس مردُمای غَیرِ یهُود نَباید یهُودیا ره خار-و-حقِیر حِساب کُنه، چراکه دَ آخِر مردُمِ یهُود ام دَ عیسیٰ ایمان میره.
طبقه-بَندی مَوضوع_ها
دُعا و سلام (فصلِ ۱)
غَضَبِ خُدا دَ ضِدِ مردُمای بےایمان (فصلِ ۱)
یهُودیا و شریعت (فصلِ ۲)
وفاداری خُدا، عدالت دَ وسِیلِه ایمان (فصلِ ۳-۴)
صُلح و آشتی قد خُدا (فصلِ ۵)
زِندگی نَو دَ وسِیلِه مسیح و دَ هِدایتِ روح اُلقُدس (فصلِ ۶-۸)
اِنتِخاب شُدونِ قَومِ اِسرائیل و بےایمانی ازوا (فصلِ ۹)
نِجات بَلدِه پگ؛ رَحمتِ بےپایانِ خُدا (فصلِ ۱۰-۱۱)
زِندگی دَ خِدمتِ خُدا (فصلِ ۱۲-۱۵)
تصمِیمِ پولُس بَلدِه دِیدونِ ایماندارای رُوم (فصلِ ۱۵)
دُعا و سلام و آخرِین هِدایتِ پولُس (فصلِ ۱۶)