فصلِ پوزدَهُم
پادشاهی عَزَریا دَ یهُودا
1 دَ سالِ بِیست و هفتُمِ پادشاهی یرُبعامِ پادشاهِ اِسرائیل، عَزَریا باچِه اَمَصیا پادشاهِ یهُودا شُد. 2 اُو شوزده ساله بُود که پادشاه شُد و پِنجاه و دُو سال دَ اورُشَلیم پادشاهی کد. آبِه شی یکُلیا نام دَشت و از اورُشَلیم بُود. 3 اُو چِیزای ره که دَ نظرِ خُداوند دُرُست بُود انجام دَد، امُو رقم که آتِه شی اَمَصیا انجام دَدُد. 4 لیکِن عِبادت‌گاه های جای‌های بِلند از بَین بُرده نَشُد و مردُم هنوز ام دَ جای‌های بِلند قُربانی تقدِیم مُوکد و بُخورِ خوشبُوی مُوسوختَند. 5 خُداوند عَزَریا ره دَ مَرَضِ کولیa گِرِفتار کد و اُو تا روزی مُردون خُو کولی گِرِفته بُود و دَ یگ خانِه جدا زِندگی مُوکد. یوتام باچِه پادشاه مسئُولِ قصر شی بُود و مردُمِ سرزمِین یهُودا ره اِداره مُوکد. 6 باقی کارای عَزَریا و چِیزای که کد، دَ کِتابِ تَوارِیخِ پادشایونِ یهُودا نوِشته یَه. 7 وختی عَزَریا فَوت کده قد بابه‌کَلونای خُو خاو کد و دَ مینکلِ بابه‌کَلونای خُو دَ شارِ داوُود دَفن شُد، باچِه شی یوتام دَ جای ازُو پادشاه شُد.
پادشاهی زِکریا دَ اِسرائیل
8 دَ سالِ سی و هشتُمِ پادشاهی عَزَریا پادشاهِ یهُودا، زِکریا باچِه یرُبعام دَ سامِره پادشاهِ اِسرائیل شُد و شَش ماه پادشاهی کد. 9 اُو چِیزای ره که دَ نظرِ خُداوند بَد بُود انجام دَد، امُو رقم که بابه‌کَلونای شی انجام دَدُد؛ اُو از گُناه های یرُبعام باچِه نِباط که باعِث شُد اِسرائیل گُناه کنه، ام دُوری نَکد. 10 پس شَلّوم باچِه یابیشِ دَ خِلافِ ازُو شورِش کد و اُو ره دَ پیشِ رُوی مردُم زَده کُشت و خود شی دَ جای ازُو پادشاه شُد. 11 باقی کارای زِکریا دَ کِتابِ تَوارِیخِ پادشایونِ اِسرائیل نوِشته یَه. 12 اینی کلامِ خُداوند بُود که دَ ییهُو گُفتُد: ”اَولادِه تُو تا پُشتِ چارُمb دَ تَختِ اِسرائیل مِیشِینه.“ و امُو رقم شُد.
پادشاهی شَلّوم دَ اِسرائیل
13 دَ سالِ سی و نُھُمِ پادشاهی عُزیاc پادشاهِ یهُودا، شَلّوم باچِه یابیش پادشاه شُد و یگ ماه دَ سامِره پادشاهی کد. 14 دَ امزُو غَیت مِنَحیم باچِه جادی از تِرصه حَرکت کده دَ سامِره اَمَد و شَلّوم باچِه یابیش ره دَ سامِره زَده کُشت و خود شی دَ جای ازُو پادشاه شُد. 15 باقی کارای شَلّوم و شورِشی که کد، دَ کِتابِ تَوارِیخِ پادشایونِ اِسرائیل نوِشته یَه. 16 بعد ازُو مِنَحیم که از تِرصه اَمدُد شارِ تِفسَح و هر چِیزی ره که دَ مَنِه ازُو بُود و گِرد-و-بَر شی ره زَده تَباه کد و کورِه خاتُونوی شِکامتُو ره چَک کد، چراکه مردُمِ تِفسَح درگه های شار ره بَلدِه شی واز نَکدُد.
پادشاهی مِنَحیم دَ اِسرائیل
17 دَ سالِ سی و نُھُمِ پادشاهی عَزَریا پادشاهِ یهُودا، مِنَحیم باچِه جادی پادشاهِ اِسرائیل شُد و دَه سال دَ سامِره پادشاهی کد. 18 اُو چِیزای ره که دَ نظرِ خُداوند بَد بُود انجام دَد و از گُناه های یرُبعام باچِه نِباط که باعِث شُد اِسرائیل گُناه کنه، دُوری نَکد. 19 دَ امزُو زمان فُولd پادشاهِ آشُور دَ سرزمِینِ اِسرائیل هُجُوم اَوُرد، لیکِن مِنَحیم بَلدِه فُول یگ هزار وَزنهe نُقره دَد تا فُول دِست خُو ره قد ازُو یگ کنه و پادشاهی دَ دِست مِنَحیم مُستَحکم باقی بُمنه. 20 مِنَحیم امی پَیسه ره از مردُمِ اِسرائیل دَ زور گِرِفت، یعنی از پگِ آدمای ثُروَتمَند، از هر کُدَم شی پِنجاه مِثقال نُقره گِرِفته دَ پادشاهِ آشُور دَد؛ امزی خاطر پادشاهِ آشُور پس رفت و دَ سرزمِینِ ازوا نَشِشت. 21 باقی کارای مِنَحیم و چِیزای که کد دَ کِتابِ تَوارِیخِ پادشایونِ اِسرائیل نوِشته یَه. 22 وختی مِنَحیم فَوت کده قد بابه‌کَلونای خُو خاو کد، باچِه شی پِقَحیا دَ جای ازُو پادشاه شُد.
پادشاهی پِقَحیا دَ اِسرائیل
23 دَ سالِ پِنجاهُمِ پادشاهی عَزَریا پادشاهِ یهُودا، پِقَحیا باچِه مِنَحیم دَ سامِره پادشاهِ اِسرائیل شُد و دُو سال حُکمرانی کد. 24 اُو چِیزای ره که دَ نظرِ خُداوند بَد بُود انجام دَد و از گُناه های یرُبعام باچِه نِباط که باعِث شُد اِسرائیل گُناه کنه، دُوری نَکد. 25 پس پِقَح باچِه رِمَلیا که یکی از قومَندانای پِقَحیا بُود، پِنجاه نفر از مردُمای جِلعاد ره قد خُو گِرِفته دَ خِلافِ پِقَحیا نقشه کشِید و اُو ره قد اَرجوب و اَریه دَ بُرجِ قصرِ پادشاهی زَده کُشت و خود شی دَ جای ازُو پادشاه شُد. 26 باقی کارای پِقَحیا و هر چِیزی که کد، دَ کِتابِ تَوارِیخِ پادشایونِ اِسرائیل نوِشته یَه.
پادشاهی پِقَح دَ اِسرائیل
27 دَ سالِ پِنجاه و دوّمِ پادشاهی عَزَریا پادشاهِ یهُودا، پِقَح باچِه رِمَلیا دَ سامِره پادشاهِ اِسرائیل شُد و بِیست سال حُکمرانی کد. 28 اُو چِیزای ره که دَ نظرِ خُداوند بَد بُود انجام دَد و از گُناه های یرُبعام باچِه نِباط که باعِث شُد اِسرائیل گُناه کنه، دُوری نَکد.
29 دَ دَورونی که پِقَح پادشاهِ اِسرائیل بُود، تِغلَت-فِلاسر پادشاهِ آشُور اَمَده عِیون، آبِلِ-بَیت-مَعکه، یانوَح، قادِش، حاصور، جِلعاد، جلِیلیه و تمامِ سرزمِینِ نَفتالی ره گِرِفت و مردُمای شی ره اسِیر کده دَ آشُور بُرد. 30 دَ سالِ بِیستُمِ پادشاهی یوتام باچِه عُزیا، هوشِعَ باچِه ایله دَ خِلافِ پِقَح باچِه رِمَلیا نقشه کشِید و اُو ره زَده کُشت و خود شی دَ جای ازُو پادشاه شُد. 31 باقی کارای پِقَح و چِیزای که کد، دَ کِتابِ تَوارِیخِ پادشایونِ اِسرائیل نوِشته یَه.
پادشاهی یوتام دَ یهُودا
32 دَ سالِ دوّمِ پادشاهی پِقَح باچِه رِمَلیا پادشاهِ اِسرائیل، یوتام باچِه عُزیا پادشاهِ یهُودا شُد. 33 اُو بِیست و پَنج ساله بُود که پادشاه شُد و شوزده سال دَ اورُشَلیم پادشاهی کد. آبِه شی یرُوشه نام دَشت و دُخترِ صادوق بُود. 34 اُو چِیزای ره که دَ نظرِ خُداوند دُرُست بُود انجام دَد و مُطابِقِ تمامِ چِیزای که آتِه شی عُزیا کدُد، رفتار کد. 35 لیکِن عِبادت‌گاه های جای‌های بِلند از بَین بُرده نَشُد و مردُم هنوز ام دَ جای‌های بِلند قُربانی تقدِیم مُوکد و بُخورِ خوشبُوی مُوسوختَند. یوتام کسی بُود که درگِه بَلنِه خانِه خُداوند ره جور کد. 36 باقی کارای یوتام و چِیزای که کد، دَ کِتابِ تَوارِیخِ پادشایونِ یهُودا نوِشته یَه. 37 دَ امزُو روزا خُداوند رَیی کدونِ رِصِین پادشاهِ ارام و پِقَح باچِه رِمَلیا ره دَ خِلافِ یهُودا شُروع کد. 38 وختی یوتام فَوت کده قد بابه‌کَلونای خُو خاو کد و دَ شارِ بابه‌کَلون خُو داوُود، دَ مینکلِ بابه‌کَلونای خُو دَفن شُد، باچِه شی آحاز دَ جای ازُو پادشاه شُد.