فصلِ چاردَهُم
پادشاهی اَمَصیا دَ یهُودا
1 دَ سالِ دوّمِ پادشاهی یهوآش باچِه یهواَخاز پادشاهِ اِسرائیل، اَمَصیا باچِه یوآش پادشاهِ یهُودا دَ پادشاهی شُروع کد. 2 اُو بِیست و پَنج ساله بُود که پادشاه شُد و بِیست و نُه سال دَ اورُشَلیم پادشاهی کد. آبِه شی یهوعَدان نام دَشت و از اورُشَلیم بُود. 3 اَمَصیا چِیزای ره که دَ نظرِ خُداوند دُرُست بُود انجام دَد، لیکِن نَه رقمِ بابه‌کَلون خُو داوُود، بَلکِه چِیزای ره که آتِه شی یوآش کدُد، مُطابِقِ ازوا رفتار کد، 4 چُون عِبادت‌گاه های جای های بِلند از بَین بُرده نَشُد و مردُم هنوز ام دَ جای‌های بِلند قُربانی تقدِیم مُوکد و بُخورِ خوشبُوی مُوسوختَند.
5 امی که پادشاهی اَمَصیا مُستَحکم شُد و اُو قُدرت ره کامِلاً دَ دِست خُو گِرِفت، اُو خِدمتگارای خُو ره که آتِه شی پادشاه ره کُشتُد، از بَین بُرد. 6 لیکِن باچه های قاتِلا ره نَکُشت، چراکه دَ کِتابِ تَوراتِ مُوسیٰ نوِشته یَه و خُداوند اَمر کده گُفته، ”آته‌گو نَباید بخاطرِ اَولادای خُو کُشته شُنه و نَه ام اَولادا بخاطرِ آته‌گون خُو کُشته شُنه، بَلکِه هر کس باید بخاطرِ گُناهِ خود خُو کُشته شُنه.“a
7 اَمَصیا دَه هزار نفرِ اِدومیا ره دَ دَرِّه نَمَک کُشت و شارِ سِلاع ره دَ جنگ گِرِفته یُقتئیل نام کد که تا اِمروز دَ امزی نام یاد مُوشه.
8 بعد ازُو اَمَصیا قاصِدا ره پیشِ یهوآش باچِه یهواَخاز، نوسِه ییهُو پادشاهِ اِسرائیل رَیی کده گُفت: ”بیه که ما و تُو رُوی دَ رُوی شُده زورآزمایی کنی.“ 9 لیکِن یهوآش پادشاهِ اِسرائیل دَ اَمَصیا پادشاهِ یهُودا پَیغام رَیی کده اینی رقم گُفت: ”اُشتُرخارِ لِبنان دَ سَروِ لِبنان پَیغام رَیی کده گُفت، ’دُختر خُو ره دَ باچِه مه بِدی تا خاتُون شی شُنه، لیکِن یگ حَیوانِ وَحشی لِبنان ازُونجی تیر شُده اُشتُرخار ره پایمال کد.‘ 10 دُرُست اَسته که تُو اِدومیا ره شِکست دَدی و اِی باعِث شُده که تُو دَ دِل خُو مغرُور شُنی؛ لیکِن ما دَزتُو مشوَره مِیدیُم که دَ امزُو اِفتخار خُو قانِع بَش و دَ خانِه خُو بِشی. چرا میخاهی خود ره دَ بَلا-و-مُصِیبت گِرِفتار کنی تا ام خود ره سرنِگون کنی و ام یهُودا ره؟“
11 لیکِن اَمَصیا دَ تورای ازُو گوش نَدَد. پس یهوآش پادشاهِ اِسرائیل باله اَمَد و اُو و اَمَصیا پادشاهِ یهُودا دَ بَیت-شَمسِ یهُودا رُوی دَ رُوی شُده قد یگدِیگِه خُو جنگ کد. 12 یهُودا از پیشِ اِسرائیل شِکست خورد و مَردای یهُودا پگ شی دُوتا کده دَ خانه های خُو رفت. 13 یهوآش پادشاهِ اِسرائیل اَمَصیا پادشاهِ یهُودا ره که باچِه یوآش و نوسِه اَخَزیاه بُود، دَ بَیت-شَمس دِستگِیر کد و بعد ازُو دَ اورُشَلیم اَمَده دیوالِ اورُشَلیم ره از درگِه اِفرایم تا درگِه نَوش بیرو کد. امُو حِصِّه دیوال چار صد توغَی دِرازی دَشت. 14 اُو تمامِ طِلّا و نُقره و تمامِ ظرفای ره که دَ خانِه خُداوند و دَ خزانه های قصرِ پادشاه بُود گِرِفت و یگ تِعداد مردُم ره گِرَوگان گِرِفته پس دَ سامِره رفت.
15 باقی کارای که یهوآش کد و قُدرت شی و ام اِی که چی رقم قد اَمَصیا پادشاهِ یهُودا جنگ کد، دَ کِتابِ تَوارِیخِ پادشایونِ اِسرائیل نوِشته یَه. 16 وختی یهوآش فَوت کده قد بابه‌کَلونای خُو خاو کد و دَ مینکلِ پادشایونِ اِسرائیل دَ سامِره دَفن شُد، باچِه شی یرُبعام دَ جای ازُو پادشاه شُد.
17 اَمَصیا باچِه یوآش پادشاهِ یهُودا بعد از فَوتِ یهوآش باچِه یهواَخاز پادشاهِ اِسرائیل پوزده سالِ دِیگه ام زِندگی کد. 18 باقی کارای اَمَصیا دَ کِتابِ تَوارِیخِ پادشایونِ یهُودا نوِشته یَه. 19 دَ اورُشَلیم دَ خِلافِ اَمَصیا نقشه کشِیده شُد و اُو دَ لاخِیش دُوتا کد، لیکِن مُخالِفِین شی نفرا ره از پُشتِ ازُو دَ لاخِیش رَیی کد و اُو ره دَ امُونجی کُشت. 20 بعد ازُو اُو ره دَ بَلِه اَسپ ها باله کده اَوُرد و اُو دَ مینکلِ بابه‌کَلونای خُو دَ اورُشَلیم دَ شارِ داوُود دَفن شُد. 21 اوخته تمامِ مردُمِ یهُودا عَزَریا ره که شوزده ساله بُود، گِرِفته دَ جای آتِه شی اَمَصیا پادشاه جور کد. 22 بعد ازی که اَمَصیا پادشاه فَوت کده قد بابه‌کَلونای خُو خاو کد، عَزَریا ایلَت ره بازسازی کده پس مربُوطِ یهُودا ساخت.
پادشاهی یرُبعامِ دوّم دَ اِسرائیل
23 دَ سالِ پوزدَھُمِ پادشاهی اَمَصیا باچِه یوآش پادشاهِ یهُودا، یرُبعام باچِه یهوآش پادشاهِ اِسرائیل دَ سامِره دَ پادشاهی رسِید و چِل و یگ سال حُکمرانی کد. 24 اُو چِیزای ره که دَ نظرِ خُداوند بَد بُود انجام دَد و از گُناه های یرُبعام باچِه نِباط که باعِث شُد اِسرائیل گُناه کنه، دُوری نَکد. 25 اُو سرحدای اِسرائیل ره از لِبو-حمات تا دریای عَرَبه پس گِرِفت، امُو رقم که خُداوند، خُدای اِسرائیل دَ وسِیلِه خِدمتگار خُو یونُس باچِه اَمِیتای گُفتُد؛ یونُس نَبی از جَت-حِفِر بُود. 26 چُون وختی خُداوند رَنج-و-مُصِیبتِ اِسرائیل ره دِید که غَدر سخت-و-تَلخ اَسته و از غُلام و آزاد، هیچ کس نَمَنده که اِسرائیل ره کومَک کنه، 27 اوخته اِسرائیلیا ره دَ وسِیلِه دِستِ یرُبعام باچِه یهوآش نِجات دَد، چراکه خُداوند نَگُفتُد که نامِ اِسرائیل ره از زیرِ آسمو گُل مُونه.
28 باقی کارای یرُبعام، پگِ چِیزای که کد و قُدرت شی و ام اِی که چی رقم جنگ کد و چی رقم دَمِشق و حمات ره که از یهُودا بُود، بَلدِه اِسرائیل پس گِرِفت، دَ کِتابِ تَوارِیخِ پادشایونِ اِسرائیل نوِشته یَه. 29 وختی یرُبعام فَوت کده قد بابه‌کَلونای خُو، یعنی قد پادشایونِ اِسرائیل خاو کد، باچِه شی زِکریا دَ جای ازُو پادشاه شُد.