قاضی‌ها
فصلِ اوّل
جنگِ بَنی اِسرائیل قد باقی کِنعانیا
1 بعد از فَوتِ یوشِع، بَنی اِسرائیل از خُداوند پُرسان کده گُفت: ”کِی از جمِ ازمو اوّل دَ خِلافِ کِنعانیا بوره و قد ازوا جنگ کنه؟“ 2 خُداوند گُفت: ”یهُودا باید بوره؛ ما اُو سرزمی ره دَ دِستِ ازوا تسلِیم مُونُم.“ 3 اوخته مَردای یهُودا دَ بِرارون خُو اَولادِه شِمعون گُفت: ”بیِید قد ازمو دَ امزُو سرزمی که تقسِیم مو رَسِیده، بورِید تا قد کِنعانیا جنگ کنی و مو ام دَ سرزمِینی که تقسِیمِ ازشُمو رَسِیده، قد شُمو موری.“ پس شِمعونیا قد ازوا رفت. 4 وختِیکه مَردای یهُودا حَمله کد، خُداوند کِنعانیا و فِرِزیا ره دَ دِستِ ازوا تسلِیم کد و اُونا دَه هزار نفرِ ازوا ره دَ بِزِق کُشت. 5 دَ امزُو جنگ اُونا قد اَدونی-بِزِق رُوی دَ رُوی شُده دَ بَلِه شی حَمله کد و کِنعانیا و فِرِزیا ره شِکست دَد. 6 و اَدونی بِزِق دُوتا کد، لیکِن اُونا اُو ره دُمبال کده دِستگِیر کد و شَست_های دِست و پای شی ره مُونٹی کد. 7 اوخته اَدونی بِزِق گُفت: ”هفتاد پادشاه قد دِست_ها و پایای شَست مُونٹی شُده، مَیدگی_های دِسترخون مَره مُوخورد؛ امُو چِیز ره که ما کدُم، خُدا دَ مُطابِقِ ازُو جَزای مَره دَد.“ اُونا اَدونی بِزِق ره دَ اورُشَلیم اَوُرد و اُو دَ امُونجی مُرد.
8 مَردای یهُودا قد اورُشَلیم جنگ کد و اُو ره گِرِفت. اُونا اُو ره قد دَمِ شمشیر زَد و شار ره دَ آتِش سوختَند. 9 بعد ازُو مَردای یهُودا رفت تا قد کِنعانیای که دَ کوھِستو، دَ جنُوب و دَ تِپه_ها زِندگی مُوکد، جنگ کنه. 10 مَردای یهُودا دَ بَلِه کِنعانیای که دَ حِبرون زِندگی مُوکد حَمله کد و شیشای، اَخِیمان و تَلمای ره شِکست دَد. نامِ سابِقِ حِبرون قِریَت-اَربَع بُود.
11 ازُونجی دَ بَلِه باشِنده_های دبِیر حَمله کد؛ نامِ سابِقِ دبِیر قِریَت-سِفر بُود. 12 و کالیب گُفت: ”ھر کسی که دَ بَلِه قِریَت-سِفر حَمله کنه و اُو ره بِگِیره، ما دُختر خُو عَخسه ره دَ عِنوانِ خاتُو دَ امزُو مِیدیُم.“ 13 اوخته عُتنِئیل باچِه قِناز، باچِه بِرارِ ریزِه کالیب اُو ره گِرِفت و کالیب دُختر خُو عَخسه ره دَ عِنوانِ خاتُو دَزُو دَد. 14 وختِیکه عَخسه پیشِ عُتنِئیل اَمَد، عُتنِئیل اُو ره گپ دَدa که از آتِه خُو زمی طلب کُنه. غَیتِیکه عَخسه از اُلاغ خُو تاه شُد، کالیب ازُو پُرسان کده گُفت: ”چِطور که اِی سُونا اَمَدی؟“ 15 عَخسه دَزُو گُفت: ”مَره بَرکت بِدی؛ ازی که زمِینِ جنُوب ره دَز مه دَدے، چشمه_های آو ره ام دَز مه بِدی.“ اوخته کالیب چشمه_های باله و چشمه_های تاه ره دَزُو بخشِید.
16 دَ امزُو غَیت قینی_ها اَولادِه خُسُرِ مُوسیٰ از شارِ دِرختونِ خُرما دَ پیشِ اَولادِه یهُودا دَ بیابونِ یهُودا که دَ جنُوب دَ نزدِیکِ عَراد اَسته، رفت و دَ مینکلِ امزُو مردُم جای-دَ-جای شُد. 17 بعد ازُو مَردای یهُودا قد بِرارونِ شِمعونی خُو رفت و کِنعانیای ره که دَ صَفَت زِندگی مُوکد شِکست دَد و صَفَت ره کامِلاً نابُود کد؛ و نامِ امزُو شار حُرماb ایشته شُد.c 18 مَردای یهُودا غَزه ره قد منطقای گِرد-و-بر شی، اَشقِلون ره قد منطقای گِرد-و-بر شی و عِقرون ره قد منطقای گِرد-و-بر شی گِرِفت. 19 خُداوند قد مَردای یهُودا بُود و اُونا کوهِستو ره ام تَصَرُف کد، لیکِن باشِنده_های اَواری_ها ره هَی کده نَتنِست، چراکه اُونا گاڈی_های جنگی آینی دَشت. 20 حِبرون دَ کالیب دَده شُد، امُو رقم که مُوسیٰ گُفتُد؛ و اُو سِه اَولادِه عَناق ره ازُونجی هَی کد. 21 مگم اَولادِه بِنیامِین یبُوسیای ره که دَ اورُشَلیم زِندگی مُوکد بُر نَتنِست؛ پس یبُوسیا تا اِمروز قد اَولادِه بِنیامِین دَ اورُشَلیم زِندگی مُونه.
22 دَ عَینِ رقم مَردای خانَوارِ یوسُف دَ خِلافِ بَیت‌ئیل رفت و خُداوند قد ازوا بُود. 23 خانَوارِ یوسُف جاسُوسا ره دَ بَیت‌ئیل رَیی کد؛ نامِ سابِقِ امزُو شار لُوز بُود. 24 دَ اُونجی جاسُوسا یگ آدم ره که از شار بُرو میمَد دِید؛ اُونا دَزُو گُفت: ”راهِ داخِل شُدونِ شار ره دَز مو نِشو بِدی و مو دَ حق تُو خُوبی مُونی.“ 25 پس اُو راهِ داخِل شُدونِ شار ره دَزوا نِشو دَد و اُونا شار ره قد دَمِ شمشیر زَد، مگم امُو آدم ره قد پگِ خانَوار شی ایشت که بوره. 26 پس امُو آدم دَ سرزمِینِ حِتیا رفت و دَ اُونجی یگ شار آباد کده نام شی ره لُوز ایشت که تا اِمروز دَ امزی نام یاد مُوشه.
کِنعانیای که دَ منطقای خُو باقی مَند
27 مَردای مَنَسّی باشِنده_های بَیت شان و آغِیلای شی ره، تَعنک و آغِیلای شی ره، دور و آغِیلای شی ره، یبلِعام و آغِیلای شی ره و مِگِیدو و آغِیلای شی ره بُر نَتنِست، چُون کِنعانیا اِرادِه محکم دَشت که دَ امزُو سرزمی دَ زِندگی خُو اِدامه بِدیه. 28 وختِیکه اِسرائیل قَوی شُد، اُونا کِنعانیا ره وادار کد که کارِ جَبری کنه، لیکِن اُونا ره بیخی بُر نَکد.
29 مَردای اِفرایم کِنعانیای ره که دَ جازر زِندگی مُوکد بُر نَکد، پس کِنعانیا دَ مینکلِ ازوا دَ جازر دَ زِندگی کدو اِدامه دَد.
30 مَردای زِبُولُون باشِنده_های قِطرون و باشِنده_های نَهلول ره بُر نَکد؛ پس کِنعانیا دَ مینکلِ ازوا دَ زِندگی کدو اِدامه دَد، لیکِن وادار شُد که کارِ جَبری کنه.
31 مَردای اَشِیر باشِنده_های عَکو، صَیدون، اَحلَب، اَکزِیب، حِلبه، اَفیق و رِحوب ره بُر نَکد. 32 پس اَشِیریا دَ مینکلِ کِنعانیای که باشِنده_های امزُو سرزمی بُود جای-دَ-جای شُد، چُون اُونا ره بُر نَکد.
33 مَردای نَفتالی باشِنده_های بَیت-شَمس و باشِنده_های بَیت عَنات ره بُر نَکد، و دَ مینکلِ کِنعانیای که باشِنده_های امزُو سرزمی بُود جای-دَ-جای شُد؛ لیکِن باشِنده_های بَیت-شَمس و بَیت-عَنات وادار شُد که بَلدِه ازوا کارِ جَبری کنه.
34 اَموریا اَولادِه دان ره مجبُور کد که دَ کوهِستو بُمَنه و اُونا ره نَه‌ایشت که دَ اَواری تاه شُنه. 35 اَموریا اِرادِه محکم دَشت که دَ اَیَلون، شعلبِیم و کوهِ حارس باقی بُمَنه؛ لیکِن وختِیکه دِستِ خانَوارِ یوسُف قَوی شُد، اَموریا وادار شُد که کارِ جَبری کنه. 36 سرحدِ اَموریا از کوتَلِ عَقرَبِیم تا سِلاع و باله‌تَر مورفت.