عدَد‌ها 34

سرحدای کِنعان

خُداوند قد مُوسیٰ گپ زَده گُفت: ‏2 ”دَ بَنی اِسرائیل اَمر کُو و دَزوا بُگی: ’وختِیکه دَ سرزمِینِ کِنعان داخِل مُوشِید، یعنی دَ سرزمِینی که دَ عِنوانِ مُلکیَت دَز شُمو تعلُق مِیگِیره، سرحدای امزُو سرزمی ازی قرار اَسته:

‏3 قِسمَتِ جنُوبی مُلک شُمو از بیابونِ صِین دَ مَرزِ اِدوم اِدامه مِیدَشته بَشه و سرحدِ جنُوبی شُمو از آخرِ دریای مُرده طرفِ شَرق موره ‏4 و سرحد شُمو از جنُوبِ گردَنِه عَقرَبِیم دَور خورده سُون بیابونِ صِین تیر مُوشه و آخِر شی دَ جنُوبِ قادِش-بَرنیَع مِیرَسه؛ بعد ازُو طرفِ حَصَر-اَدار رفته دَ عَصمون تیر مُوشه؛ ‏5 سرحد از عَصمون سُون دریاچِه مِصر دَور مُوخوره و دَ دریای کٹه خَتم مُوشه.

‏6 سرحدِ غَربی شُمو دریای کٹه و ساحِل های شی اَسته؛ اینَمی سرحدِ غَربی شُمو اَسته.

‏7 سرحدِ شمالی شُمو ازی قرار اَسته: از دریای کٹه تا کوهِ هور ره نشانی کُنِید ‏8 و از کوهِ هور تا لِبو-حمات ره نشانی کُنِید و خَتمِ سرحد صِدَد اَسته؛ ‏9 بعد ازُو سرحد تا زِفرون اِدامه پَیدا مُونه و دَ حَصَر-عینان خَتم مُوشه. اینَمی سرحدِ شمالی شُمو اَسته.

‏10 بَلدِه سرحدِ شَرقی خُو از حَصَر-عینان تا شِفام ره نشانی کُنِید. ‏11 اِی سرحد از شِفام تاه رفته دَ رِبله دَ سَمتِ شرقِ عَین موره و سرحد تاه رفته دَ سَمتِ شرقِ دریای کِنِرِت مِیرَسه. ‏12 بعد ازُو اِی سرحد تاه رفته دَ دریای اُردُن موره و اِدامه پَیدا کده دَ دریای مُرده خَتم مُوشه. اینَمی سرزمی قد تمامِ سرحدای چارطرف خُو از شُمو بَشه.‘“

‏13 اوخته مُوسیٰ دَ بَنی اِسرائیل اَمر کده گُفت: ”اینَمی سرزمِینی اَسته که شُمو باید دَ وسِیلِه پِشک تقسِیم کُنِید، سرزمِینی که خُداوند اَمر کده که دَ نُه و نِیم طایفه دَده شُنه، ‏14 چُون طایفِه اَولادِه رئوبین مُطابِقِ اَولادِ بابه های خُو و طایفِه اَولادِه جاد مُطابِقِ اَولادِ بابه های خُو و نِیمِ طایفِه مَنَسّی تقسِیم خُو ره گِرِفته. ‏15 اِی دُو طایفه و نِیم طایفه دَ اُو طرفِ دریای اُردُن رُوی دَ رُوی اَریحا، طرفِ شَرق سُونِ آفتَو بُرشُد، تقسِیم خُو ره گِرِفته.“

‏16 اوخته خُداوند قد مُوسیٰ گپ زَده گُفت: ‏17 ”نام های مَردای که زمی ره باید بَلدِه شُمو تقسِیم کُنه اینیا اَسته: اِلعازار پیشوا و یوشِع باچِه نُون. ‏18 دَ پالُوی ازیا شُمو یگ رهبر از هر طایفه بِگِیرِید تا زمی ره بَلدِه شُمو تقسِیم کُنه. ‏19 نام ھای امزُو مَردا اینیا اَسته:

کالیب باچِه یفُنّه از طایفِه یهُودا؛

‏20 شمُوئیل باچِه عمِیهُود از طایفِه شِمعون؛

‏21 اِلیداد باچِه کِسلون از طایفِه بِنیامِین؛

‏22 بُقی باچِه یوگلی، یگ رهبر از طایفِه دان؛

‏23 از اَولادِه یوسُف:

حَنِیئیل باچِه ایفود، یگ رهبر از طایفِه مَنَسّی؛

‏24 قمُوئیل باچِه شِفطان، یگ رهبر از طایفِه اِفرایم؛

‏25 الِیصافان باچِه فَرناک، یگ رهبر از طایفِه زِبُولُون؛

‏26 فَلطِیئیل باچِه عَزّان، یگ رهبر از طایفِه یسّاکار؛

‏27 اَخِیهُود باچِه شلومی، یگ رهبر از طایفِه اَشِیر؛

‏28 فِدهئیل باچِه عمِیهُود، یگ رهبر از طایفِه نَفتالی.“

‏29 اینَمیا کسای بُود که خُداوند دَ بَلِه ازوا اَمر کد که مُلک ره دَ سرزمِینِ کِنعان بَلدِه بَنی اِسرائیل تقسِیم کُنه.