لاویا 14

فصلِ چاردَهُم

قانُون بَلدِه پاک شُدو از مَرَضِ کولی

‏1 خُداوند قد مُوسیٰ گپ زَده گُفت: ‏2 ”اِی مُقرَرات بَلدِه نفرِ کولی‌گِرِفته دَ روزِ پاک شُدون شی اَسته: اُو باید دَ دِیرِ پیشوا اَوُرده شُنه ‏3 و پیشوا از خَیمه‌گاه بُرو رفته اُو ره معاینه کنه. اگه نفرِ کولی گِرِفته از مَرَضِ کولی شَفا پَیدا کدُد، ‏4 پیشوا اَمر کُنه تا بَلدِه امزُو نفرِ که باید پاک شُنه دُو مُرغَکِ زِندِه پاک، یگ ٹوٹه چیوِ سَرو، چُوغِ سُرخ رنگ و علفِ زوفا گِرِفته بیره. ‏5 و پیشوا اَمر کُنه که یکی امزُو مُرغَکو ره دَ یگ ظرفِ گِلی دَ بَلِه آوِ تازه بُکُشه. ‏6 اوخته مُرغَکِ زِنده ره قد چیوِ سَرو و چُوغِ سُرخ رَنگ و علفِ زوفا گِرِفته دَ خُونِ مُرغَکی که دَ بَلِه آوِ تازه کُشته شُده، غوٹه کُنه. ‏7 بعد ازُو پیشوا خُون ره دَ بَلِه کسی که باید از مَرَضِ کولی پاک شُنه هفت دفعه پاش بِدیه و اُو ره پاک اِعلان کُنه؛ و مُرغَکِ زِنده ره دَ صحرا ایله بِدیه. ‏8 امُو نفرِ که باید پاک شُنه کالای خُو ره بُشویه، تمامِ مُوی خُو ره کَل کُنه و قد آو غُسل بِگِیره؛ اوخته اُو پاک حِساب مُوشه. بعد ازُو اُو مِیتَنه دَ خَیمه‌گاه داخِل شُنه، لیکِن تا هفت روز باید بُرو از خَیمِه خُو بُمنه. ‏9 و دَ روزِ هفتُم اُو باید تمامِ مُوی خُو ره کَل کُنه: مُوی سر، رِیش و قاش ره. وختِیکه تمامِ مُوی خُو ره کَل کد، اُو باید کالای خُو ره بُشویه و جان خُو ره قد آو غُسل بِدیه؛ اوخته اُو پاک اَسته.

‏10 دَ روزِ هشتُم اُو باید دُو بارِه نَرِ بےعَیب و یگ گوسپونِ میشِ یگ سالِه بےعَیب ره قد هدیِه غَلّه-و-دانه که سِه مَنَک بِهترِین آردِ روغو گٹ شُده و یگ لوگ روغو بَشه، گِرِفته بیره. ‏11 و پیشوای که اُو ره پاک مُونه، امُو نفر ره که باید پاک شُنه قد امزی چِیزا قتی دَ حُضُورِ خُداوند دَ دانِ درگِه خَیمِه مُلاقات بیره. ‏12 اوخته پیشوا یکی امزُو باره‌گونِ نَر ره بِگِیره و اُو ره قد امزُو لوگِ روغو دَ عِنوانِ جُرمانه تقدِیم کنه و اُونا ره دَ عِنوانِ هدیِه بِلند کدَنی دَ حُضُورِ خُداوند بِلند کُنه. ‏13 باره ره باید دَ جای مُقَدَّس حلال کنه، دَ امزُو جای که قُربانی گُناه و قُربانی سوختَنی حلال مُوشه، چراکه جُرمانه رقمِ قُربانی گُناه از پیشوا مُوشه. اِی کامِلاً مُقَدَّس اَسته. ‏14 بعد ازُو پیشوا یگ مِقدار از خُونِ قُربانی جُرم بِگِیره و دَ نَرمی گوشِ راستِ کسی که باید پاک شُنه و دَ شَستِ دِستِ راست و دَ شَستِ پای راست شی بُمَله. ‏15 امچُنان پیشوا یگ مِقدار روغو ره از لوگِ روغو بِگِیره و دَ اَلغِه دِستِ چَپ خُو شیو کُنه. ‏16 بعد ازُو پیشوا کِلکِ راست خُو ره دَ روغونی که دَ اَلغِه دِستِ چَپ شی اَسته غوٹه کُنه و روغو ره قد کِلک خُو هفت دفعه دَ حُضُورِ خُداوند پاش بِدیه. ‏17 و پیشوا یگ مِقدار روغونی ره که دَ اَلغِه شی باقی مَنده دَ نَرمی گوشِ راستِ کسی که باید پاک شُنه و دَ شَستِ دِستِ راست و دَ شَستِ پای راست دَ بَلِه خُونِ قُربانی جُرم بُمَله. ‏18 باقی‌مَندِه روغو ره که دَ اَلغِه پیشوا اَسته دَ سرِ کسی که باید پاک شُنه بُمَله و دَ امزی رقم دَ حُضُورِ خُداوند بَلدِه ازُو کِفاره کنه. ‏19 بعد ازُو پیشوا قُربانی گُناه ره تقدِیم کُنه و بَلدِه کسی که باید از ناپاکی خُو پاک شُنه کِفاره کنه. بعد ازقُربانی گُناه پیشوا قُربانی سوختَنی ره حلال کنه، ‏20 و اُو ره قد هدیِه غَلّه-و-دانه قَتی دَ بَلِه قُربانگاه تقدِیم کنه؛ دَ امزی رقم پیشوا بَلدِه امزُو نفر کِفاره کنه و اُو پاک مُوشه.

‏21 ولے اگه امُو نفر نادار بَشه و تَوان شی ره نَدَشته بَشه، اُو باید یگ بارِه نَر ره دَ عِنوانِ جُرمانه گِرِفته بیره تا بِلند شُنه و بَلدِه ازُو کِفاره کنه؛ امچُنان یگ مَنَک بِهترِین آرد ره که قد روغو گٹ شُده بَشه بَلدِه هدیِه غَلّه-و-دانه قد یگ لوگ روغو، ‏22 و دُو قُمری یا دُو کَوتر، هر کُدَم شی ره که دَ دِست اَوُرده تَنِست گِرِفته بیره: یگ شی ره بَلدِه قُربانی گُناه و دِیگِه شی ره بَلدِه قُربانی سوختَنی. ‏23 اُو دَ روزِ هشتُم باید اُونا ره بَلدِه پاک شُدون خُو دَ دِیرِ پیشوا دَ دانِ درگِه خَیمِه مُلاقات دَ حُضُورِ خُداوند بیره. ‏24 و پیشوا بارِه قُربانی جُرم و لوگِ روغو ره بِگِیره و اُونا ره دَ عِنوانِ هدیِه بِلند کدَنی دَ حُضُورِ خُداوند بِلند کُنه. ‏25 اوخته قُربانی جُرم ره حلال کُنه و پیشوا یگ مِقدار خُونِ قُربانی جُرم ره گِرِفته دَ نَرمی گوشِ راستِ کسی که باید پاک شُنه و دَ شَستِ دِستِ راست و دَ شَستِ پای راست شی بُمَله. ‏26 بعد ازُو پیشوا یگ مِقدار روغو ره دَ اَلغِه دِستِ چَپ خُو شیو کُنه ‏27 و قد کِلکِ راست خُو یگ مِقدار روغونی ره که دَ دِستِ چَپ شی اَسته هفت دفعه دَ حُضُورِ خُداوند پاش بِدیه. ‏28 و پیشوا یگ مِقدار امزُو روغو ره که دَ دِست شی اَسته دَ نَرمی گوشِ راستِ امزُو کسی که باید پاک شُنه و دَ شَستِ دِستِ راست و دَ شَستِ پای راست شی بُمَله، دَ جایی که خُونِ قُربانی جُرم ملِیده شُد. ‏29 و باقی‌مَندِه روغو ره که دَ دِستِ پیشوا اَسته دَ سرِ کسی که باید پاک شُنه شیو کنه و بَلدِه ازُو دَ حُضُورِ خُداوند کِفاره کنه. ‏30 بعد ازُو پیشوا یکی امزُو دُو قُمری یا دُو کَوتر ره تقدِیم کنه، هر کُدَم شی ره که دَ دِست اَوُرده تَنِسته بَشه: ‏31 یگ شی ره بَلدِه قُربانی گُناه و دِیگِه شی ره بَلدِه قُربانی سوختَنی قد هدیِه غَلّه-و-دانه. دَ امزی رقم پیشوا بَلدِه کسی که باید پاک شُنه دَ حُضُورِ خُداوند کِفاره مُونه.“

‏32 اِی مُقرَرات بَلدِه کسی اَسته که مَرَضِ کولی دَره و چِیزای ره که بَلدِه پاک شُدون شی ضرُورَت اَسته، دَ دِست اَوُرده نَمِیتنه.

مُقرَرات دَ بارِه پوپَنَک زَدگی خانه

‏33 خُداوند قد مُوسیٰ و هارُون گپ زَده گُفت: ‏34 ”وختی دَ سرزمِینِ کِنعان که ما اُو ره دَ عِنوانِ مُلکیَت بَلدِه شُمو مِیدیُم داخِل شُدِید و ما بَلای پوپَنَک ره دَ یگ خانه دَ مُلکی که شُمو صاحِب شی مُوشِید رَیی مُونُم، ‏35 صاحِبِ خانه باید رفته دَ پیشوا خبر دَده بُگیه، ’فِکر مُونُم که یَگو چِیز رقمِ پوپَنَک زَدگی دَ خانِه مه اَسته.‘ ‏36 اوخته پیشوا اَمر کُنه که پیش از داخِل شُدون شی بَلدِه معاینه کدونِ پوپَنَک زَدگی خانه ره خالی کُنه، نَشُنه چِیزای که دَ خانه اَسته ناپاک اِعلان شُنه. بعد ازُو پیشوا بوره تا خانه ره معاینه کُنه. ‏37 اُو پوپَنَک زَدگی ره توخ کُنه و اگه پوپَنَک دَ دیوالای خانه قد لَکه های سَوزدیل و سُرخدیل بَشه و از رُوی دیوال غَوُجتَر معلُوم شُنه، ‏38 اوخته پیشوا از خانه بُر شُده دَ دانِ درگه بوره و خانه ره بَلدِه هفت روز بسته کنه. ‏39 دَ روزِ هفتُم پیشوا بسم بییه و توخ کُنه. اگه پوپَنَک دَ دیوالای خانه تِیت شُدُد، ‏40 پیشوا اَمر کُنه که سنگای امزُو جای پوپَنَک زَدگی ره کَنده کُنه و بُرو از شار دَ یگ جای ناپاک بِندَزه. ‏41 بعد ازُو مَنِه خانه ره از هر طرف شی تَراش کنه و خاکی ره که تَراش کده بُرو از شار دَ یگ جای ناپاک پورته کنه. ‏42 بعد ازُو اُونا سنگای دِیگه ره گِرِفته دَ جای سنگای کَنده شُده بیله و خاکِ نَو گِرِفته خانه ره سِنگِل کُنه. ‏43 ولے اگه پوپَنَک بسم دَ خانه پَیدا شُنه و بعد از کندونِ سنگا و تَراش کدو و سِنگِل کدونِ خانه بسم تِیت شُنه، ‏44 اوخته پیشوا باید اَمَده خانه ره معاینه کُنه؛ اگه پوپَنَک زَدگی دَ خانه تِیت شُدُد، اُو پوپَنَکِ مُضِر اَسته که دَ خانه پَیدا شُده؛ اُو خانه ناپاک اَسته. ‏45 پس امُو خانه باید چَپه شُنه و سنگای شی و چیوای شی قد تمامِ خاکِ امزُو خانه بُرو از شار دَ یگ جای ناپاک پورته شُنه. ‏46 هر کسی که دَ مَنِه امزُو خانه دَ روزای که بسته یَه داخِل شُنه، اُو تا شام ناپاک مُومَنه. ‏47 و هر کسی که دَزُو خانه خاو کُنه باید کالای خُو ره بُشویه و هر کسی که دَ مَنِه ازُو خانه چِیزی بُخوره باید کالای خُو ره بُشویه.

‏48 لیکِن اگه پیشوا بییه و خانه ره معاینه کُنه و بِنگره که بعد از سِنگِل کدونِ خانه پوپَنَک زَدگی دَ خانه تِیت نَشُده، اوخته پیشوا باید خانه ره پاک اِعلان کنه، چراکه اُو از پوپَنَک پاک شُده. ‏49 بَلدِه پاک شُدونِ خانه اُو باید دُو مُرغَک، چیوِ سَرو، چُوغ سُرخ رَنگ و علفِ زوفا بِگِیره. ‏50 یکی امزُو مُرغَکو ره دَ یگ ظرفِ گِلی دَ بَلِه آوِ رَوان بُکُشه ‏51 و چیوِ سَرو، علفِ زوفا و چُوغ سُرخ رَنگ ره قد مُرغَکِ زِنده گِرِفته دَ خُونِ مُرغَکِ کُشته شُده و دَ آوِ رَوان غوٹه کُنه و هفت دفعه دَ امزُو خانه پاش بِدیه. ‏52 دَ امزی رقم خانه ره قد خُونِ مُرغَک و آوِ رَوان و قد مُرغَکِ زِنده، چیوِ سَرو، علفِ زوفا و چُوغ سُرخ رَنگ پاک کُنه. ‏53 اوخته امُو مُرغَکِ زِنده ره بُرو از شار دَ صحرا ایله بِدیه. دَ امزی طرِیق اُو بَلدِه خانه کِفاره مُونه و خانه پاک مُوشه.

‏54 اینَمی مُقرَرات بَلدِه هر رقم مَرَضِ کولی، بَلدِه کَلی گِرِفتَگی، ‏55 بَلدِه پوپَنَکِ کالا و خانه، ‏56 بَلدِه اَماس کدَگی، بَلدِه بیخ‌کٹه و لَکِه روشو اَسته، ‏57 تا پَی بُبرِید که چی وخت یگ چِیز پاک اَسته و چی غَیت ناپاک.

اینَمی مُقرَرات دَ بارِه مَرَض های کولی-و-پوپَنَک زَدگی اَسته.“