فصلِ دوازدَهُم
پاکی خاتُونو بعد از زَیدو
1 خُداوند قد مُوسیٰ گپ زَده گُفت: 2 ”قد بَنی اِسرائیل گپ زَده بُگی، ’وختِیکه یگ خاتُو شِکامتُو مُوشه و یگ باچه دَ دُنیا میره، اُو هفت روز ناپاک مُومنه، امُو رقم که دَ غَیتی عادتِ ماهوار خُو ناپاک مُوشه. 3 دَ روزِ هشتُم گوشتِ اِضافی نِلغه باید خَتنه شُنه. 4 مُدَتِ پاک شُدونِ خُونریزی امزُو خاتُو سی و سِه روز اَسته؛ اُو باید دَ هیچ چِیزِ مُقَدَّس دِست نَزَنه و دَ جایگاهِ مُقَدَّس داخِل نَشُنه تا وختِیکه روزای پاک شُدونِ ازُو تَکمِیل شُنه. 5 اگه اُو یگ دُختر دَ دُنیا بیره، اُو دُو هفته ناپاک مُومنه، رقمِ وختِ عادتِ ماهوار خُو؛ و مُدَتِ پاک شُدونِ خُونریزی ازُو شصت و شَش روز اَسته. 6 وختِیکه روزای پاک شُدونِ ازُو بَلدِه باچه یا دُختر تکمِیل شُد، اُو باید یگ بارِه یگ ساله ره بَلدِه قُربانی سوختَنی و یگ کَوتر یا قُمری ره بَلدِه قُربانی پاک شُدوa دَ دانِ درگِه خَیمِه مُلاقات دَ پیشوا بیره. 7 پیشوا اُونا ره دَ حُضُورِ خُداوند تقدِیم کُنه و بَلدِه ازُو کِفاره کُنه؛ اوخته اُو از خُونریزی خُو پاک مُوشه. اینَمی قانُون بَلدِه خاتُونی اَسته که نِلغه مِیزَیه، چی باچه، چی دُختر. 8 لیکِن اگه اُو تَوانِ یگ باره ره نَدَشته بَشه، اُو باید یگ جوره قُمری یا دُو چُوچِه کَوتر ره گِرِفته بیره، یگ شی ره بَلدِه قُربانی سوختَنی و دِیگِه شی ره بَلدِه قُربانی پاک شُدو.b اوخته پیشوا بَلدِه ازُو کِفاره کُنه و اُو پاک مُوشه.‘“