SRAT GI NICAN DI PAULUS PAS
MEM MBUSYAMEI EI MINU NDIG
TESALONIKA
Paulus pigo yo di inggre kin mbusyamei ei minu ndig Tesalonika
1
1 Srat dini leu da di Paulus kin Silas kin Timotius. Dipinak srat dini bak je di mbusyamei di jinok Icig Allah kin Tuhan Yesus Kristus ide limwa nya ei minu ndig Tesalonika. 2 Handei kon ba, Icig Allah kin Tuhan Yesus Kristus isingat tut je ba, ibiyai jingon jo nyahan.Hukum di mittau kep tungwatu nya mem Kristus nikwei hanyenti
3 Disut bat jen, suar nijem sigyo bak Allah bikwop njap-njap mem je. Gi nijem sigyo mem je dima ne igbit rin lewo jikum ei jide niba ningon com Yesus Kristusti ba, jikum ei jide ningon ngakei yamti cem. 4 Gima rino ninggei-nggwang tut je ei Allah de mbusyamei nindigsi nya ikieti. Niba ninggei-nggwang tut je bipui biyok tut gi jingon nddong ba, jingon jo kep Allah lene tut tungwatu di ihwen bit je bigyai ninghuisi wei bije.
5 Mun dini yok hagom nok bindo tut gima Allah ba ningon sren bimbus tungwatu nya ingonti. Jiyai ninghuisi wei mem Noni ba, gini mibindei bijidem mem gima jicoi bit Allah Ninyeng Tak Kepti. 6 Allah mibon mun di igbit. Noni miba ninghuisi wei bibirop hanyen bak yo di igyai ninghuisi wei bije lene, 7 bindei jeni kin nyeni di igyai inghuisi di wei ingon nggan-triot hanyen. Mun dini mipek kep mem nye mpe dino Tuhan Yesus kin Nide malaikati di isindem bibor nya mittau hanyen kwei leu gwamti. 8 Ba, Noni mittau kwei sut hum njeng di cig-cai leu binhyepo bikes hukum ei yo di irok Allah kin yo di ingkek ndok tut Nihyet Di Kei tut ide Tuhan Yesus dip. 9 Yo dima mitug ndei hukum nibindei sar yok di bit bon ug hon nohonti kan bi bisrawir ei minu ting leu Tuhan Noho bei kin Nide nikei-kau-keisi cem. 10 Ba, gini hagom mipek kep mem njap dino Noni kwei hanyen leu api Nide limwa nya yahagom inggei sut Noni bikon ninyeng cem. Jeni cem jicoi bit yo dima lewo jingon jo kep nihyet di nitri tut bije tu.
11 Gima rino ningat nadi tindei je bikwop njap-njap. Nahara ide Allah leu binhyepo Noni mibindei ba, jidem mem gima jiyaijo bit leu ningon kanti lewo Noni hig je mem gima. Handei kon ba, Noni sindem tut je ba, jiyai mun di kei bibor di jijoi sut nya lene bindei bijiyai mun tug hon jingon di jo kep Noni biput ug e ba, hagom put kei cem. 12 Tug hon nisinati dima mijinggei sut Tuhan Yesus ninyeng ba, Noni minggei sut jeni cem tug hon ide Allah kin Tuhan Yesus Kristus ide nisingat tut jeti.