Tesalonika Gi Nigom i

SRAT GI NIGOM DI PAULUS PAS

MEM MBUSYAMEI EI MINU NDIG

TESALONIKA

NIHYET GI BIBIE TUT

Minu ndig Tesalonika ne nibousi mem hanjop Makedonia rin ba, nibou ndig Roma ninyeng tak kep hanjop dima nisurti-nipekti. Paulus ta mbusyamei ei minu ndig Tesalonika niabiati noni jo leu minu ndig Filipi. Noro jei bi lene mben Yahudi di ingon kinei sut Paulus ibigen ser nide midyai dino tri tut Yesus ningginausi bak ngkiai nya di sindi itti kin Puig Yahudi ningginausi. Gima rino gi ibigen ser Paulus dima ribindei di noni kes mben Tesalonika ei buug kikau ug ei minu ndig Berea. Mpe hi bu tirigi noni ningat rin ei minu ndig Korintus lene noni yai srat leu nisut Timotius di ya tut noni. Srat dima pui sut mbusyamei minu ndig Tesalonika igyai munti nya.

Srat Gi Nigom Mem Mbusyamei Ei Minu Ndig Tesalonika di Paulus pas bak yo di mbusyamei dima biwin kep ingonti leu binhyepo igya nddong kei. Noni pai sigyo bak Allah tut mbusyamei minu ndig Tesalonika ide niba ningon com Kristusti kin ide ningon ngakei yamti. Noni pus kiek ingonti tut niyai munti nya di noni yai tirigi noni ningat rin ei ikieti. Niabiati noni ndo mun dima yok hagom brei biyok lene noni buhup mun di ingon kiowi eisi tut Kristus nikwei hanyenti. Gino no di Kresten mai nipou tirigi Kristus kwei hanyen bigyo ne notou no dima miyai niyaijo kikau leu Kristus i? Tou rikan tut tto bou mem Kristus nikwei hanyenti i? Paulus pingok ingonti leu binhyepo inda jo kep ide midyai nya ba, ingon jo nyahan lene iba ide niba ningon comti bimem kep ser Kristus nikwei hanyenti.

Nirop Ninda Ndigsi

Paulus pigo yo di mbusyamei nya 1:1

Paulus pai sigyo binggei sut Allah 1:2--3:13

Paulus pus kiek ingonti leu binhyepo igyai munti nya bit leu Kristus ningginausi 4:1-12

Paulus ngginau yok tut Kristus nikwei hanyenti 4:13--5:11

Paulus nipingok yokti ningwigsi 5:12-28